സനാ : സാമൂഹിക മാധ്യമങ്ങളിലെ തന്റെ സാഹസിക പ്രകടനങ്ങളിലൂടെ ലോകമെമ്പാടുമുള്ള ആരാധകരെ ആവേശം കൊള്ളിച്ച യമനിലെ പ്രശസ്തനായ സാഹസിക താരം അൽ ഖാഖ ബിൻ അൻ്റാർ (30) അന്തരിച്ചു. ‘അൻ്റാർ അൽ അബ്സി’ എന്ന പേരിൽ അറിയപ്പെട്ടിരുന്ന അദ്ദേഹം, യമനിലെ അൽ ധാലെ പ്രവിശ്യയിലുള്ള ഹരാദാത് ഡാംറ്റ് അഗ്നിപർവ്വത ക്രേറ്ററിൽ കയറുന്നതിനിടെയാണ് ദാരുണമായി അപകടത്തിൽപ്പെട്ടത്.( Yemen Spider Man Antar Al Absi dies falling into volcanic crater)
സുരക്ഷാ സംവിധാനങ്ങളൊന്നുമില്ലാതെ കുത്തനെയുള്ള പാറക്കെട്ടുകളിൽ വലിഞ്ഞുകയറുന്നതായിരുന്നു അദ്ദേഹത്തിൻ്റെ രീതി. വെള്ളിയാഴ്ച അത്തരമൊരു സാഹസിക ശ്രമത്തിനിടെ പിടിവിട്ട് അദ്ദേഹം ഏകദേശം 120 മീറ്ററോളം താഴ്ചയുള്ള ക്രേറ്ററിലേക്ക് വീഴുകയായിരുന്നു. ഇതിന്റെ ദൃശ്യങ്ങൾ സമൂഹമാധ്യമങ്ങളിൽ വ്യാപകമായി പ്രചരിക്കുന്നുണ്ട്.
വിവരമറിഞ്ഞ ഉടൻ തന്നെ യമനിലെ സിവിൽ ഡിഫൻസ് അതോറിറ്റിയുടെ നേതൃത്വത്തിൽ രക്ഷാപ്രവർത്തനം ആരംഭിച്ചു. ദുർഘടമായ ഭൂപ്രകൃതി കാരണം ഏറെ പരിശ്രമത്തിനൊടുവിൽ നാല് മണിക്കൂറിന് ശേഷമാണ് ക്രേറ്ററിന്റെ അടിയിലുള്ള തടാകത്തിൽ നിന്ന് അദ്ദേഹത്തിന്റെ മൃതദേഹം കണ്ടെടുത്തത്. യമനിലെ ഏറ്റവും സാഹസികനായ കണ്ടന്റ് ക്രിയേറ്ററായി അറിയപ്പെട്ടിരുന്ന അൻ്റാർ, യാതൊരുവിധ സുരക്ഷാ ഉപകരണങ്ങളുമില്ലാതെ പാറക്കെട്ടുകളിൽ വലിഞ്ഞുകയറുന്ന ദൃശ്യങ്ങളിലൂടെയാണ് ‘യമനിലെ സ്പൈഡർമാൻ’ എന്ന വിളിപ്പേര് നേടിയത്.
Story Summary
Yemeni social media star and adventurer, Al Qa’qa’ bin Antar, known as the “Spider-Man of Yemen,” died after falling into the Haradhat Damt volcanic crater while attempting a climb without safety gear. Despite a swift rescue operation, his body was recovered from the crater’s lake four hours later.
