കൊച്ചി: മലയാളി പ്രേക്ഷകർക്കിടയിൽ വലിയ ചർച്ചയായ ‘ടിയാൻ’ എന്ന ബിഗ് ബജറ്റ് ചിത്രത്തിന് ശേഷം മുരളി ഗോപിയുടെ തിരക്കഥയിൽ ജിയെൻ കൃഷ്ണകുമാർ സംവിധാനം ചെയ്യുന്ന ഏറ്റവും പുതിയ തമിഴ്-മലയാളം ദ്വിഭാഷാ ചിത്രം ‘അനന്തൻ കാടിന്റെ’ പുതിയ ക്യാരക്ടർ പോസ്റ്റർ പുറത്തിറങ്ങി (Ananthan Kaadu). ചിത്രത്തിൽ ‘കാർത്തി’ എന്ന ഏറെ പ്രാധാന്യമുള്ള കഥാപാത്രമായി എത്തുന്ന നടി ശാന്തി ബാലചന്ദ്രന്റെ ലുക്കാണ് അണിയറപ്രവർത്തകർ ഇപ്പോൾ പുറത്തുവിട്ടിരിക്കുന്നത്. ചിത്രം ഇക്കഴിഞ്ഞ ജൂൺ 25-ന് ലോകമെമ്പാടുമുള്ള തിയേറ്ററുകളിൽ വൻ റിലീസിനായി തയ്യാറെടുക്കുകയാണ്.
തമിഴ് സൂപ്പർ താരം ആര്യ നായകനായെത്തുന്ന ഈ ബിഗ് ബജറ്റ് ത്രില്ലർ ചിത്രത്തിൽ വൻ താരനിരയാണ് അണിനിരക്കുന്നത്. ചിത്രത്തിൽ തമിഴ് സംസാരിക്കുന്ന ഒരു പ്രത്യേക പശ്ചാത്തലമുള്ള കഥാപാത്രമായിട്ടാണ് ആര്യ എത്തുന്നതെന്നാണ് സൂചന. ആകാംക്ഷയും നിഗൂഢതയും നിറയ്ക്കുന്ന രംഗങ്ങളുമായാണ് അടുത്തിടെ പുറത്തിറങ്ങിയ സിനിമയുടെ ഒഫീഷ്യൽ ടീസർ പ്രേക്ഷകരിലേക്ക് എത്തിയത്. ടീസറിന് സോഷ്യൽ മീഡിയയിൽ ഇതിനോടകം തന്നെ വലിയ രീതിയിലുള്ള വരവേൽപ്പാണ് ലഭിച്ചിട്ടുള്ളത്. ഹൊറർ-മിസ്റ്ററി ഘടകങ്ങൾ അടങ്ങിയ മികച്ചൊരു ദൃശ്യവിരുന്നായിരിക്കും ‘അനന്തൻ കാട്’ എന്ന് ടീസർ വ്യക്തമാക്കുന്നു.
വൻ വിജയമായി മാറിയ ‘മാർക്ക് ആന്റണി’ക്ക് ശേഷം മിനി സ്റ്റുഡിയോയുടെ ബാനറിൽ എസ്. വിനോദ് കുമാർ നിർമ്മിക്കുന്ന പതിനാലാമത്തെ ചിത്രമാണിത്. മലയാളത്തിലെ പ്രമുഖ നിർമ്മാണ കമ്പനിയായ ശ്രീ ഗോകുലം മൂവീസിന്റെ ബാനറിൽ ഗോകുലം ഗോപാലനാണ് ചിത്രം തിയേറ്ററുകളിൽ അവതരിപ്പിക്കുന്നത്. ആഗോളതലത്തിൽ തരംഗമായി മാറിയ കന്നഡ ചിത്രം ‘കാന്താര’, ‘കാന്താര ചാപ്റ്റർ 1’ എന്നീ സിനിമകളുടെ സംഗീത സംവിധായകനായ ബി. അജനീഷ് ലോക്നാഥ് ആണ് ഈ ചിത്രത്തിനും സംഗീതം നിർവ്വഹിക്കുന്നത് എന്ന പ്രത്യേകതയുമുണ്ട്.
ഇന്ദ്രൻസ്, മുരളി ഗോപി, പ്രമുഖ തെലുങ്ക് താരം സുനിൽ, അപ്പാനി ശരത്, നിഖില വിമൽ, ദേവ് മോഹൻ, സാഗർ സൂര്യ, റെജീന കസാൻഡ്ര, അജയ്, കന്നഡ താരം അച്യുത് കുമാർ തുടങ്ങി സൗത്ത് ഇന്ത്യൻ സിനിമയിലെ വലിയൊരു നാനാഭാഷാ താരനിര തന്നെയാണ് ഈ പാൻ-ഇന്ത്യൻ ചിത്രത്തിനായി ക്യാമറയ്ക്ക് മുന്നിൽ ഒന്നിക്കുന്നത്.
ചിത്രത്തിന്റെ അണിയറപ്രവർത്തകർ: ഛായാഗ്രഹണം: എസ്. യുവ, എഡിറ്റർ: രോഹിത് വി.എസ്. വാരിയത്ത്, എക്സിക്യൂട്ടീവ് പ്രൊഡ്യൂസർ: ജെയിൻ പോൾ, പ്രൊഡക്ഷൻ ഡിസൈനർ: രഞ്ജിത്ത് കോതേരി, ആക്ഷൻ ഡയറക്ടർ: ആർ. ശക്തി ശരവണൻ, വിഎഫ്എക്സ് ഡയറക്ടർ: ബിനോയ് സദാശിവൻ, പ്രൊഡക്ഷൻ കൺട്രോളർ: പ്രണവ് മോഹൻ, കോസ്റ്റ്യൂം: അരുൺ മനോഹർ, ഗാനരചനയും ആലാപനവും: മുരളി ഗോപി, പിആർഒ: ആതിര ദിൽജിത്ത്. ഡ്രീം ബിഗ് ഫിലിംസ് ആണ് ചിത്രത്തിന്റെ ഡിസ്ട്രിബ്യൂഷൻ പാർട്ണർ.
Story Summary: The character poster of Shanthi Balachandran as ‘Karthi’ from the upcoming Malayalam-Tamil bilingual movie ‘Ananthan Kaadu’ has been released. Scripted by Murali Gopy and directed by Jiyen Krishnakumar after ‘Tiyaan’, the big-budget mystery thriller features Tamil actor Arya in the lead role. Produced by S. Vinod Kumar under Mini Studio and presented by Sree Gokulam Movies, the film features music by ‘Kantara’ fame B. Ajaneesh Loknath and is scheduled for a worldwide release on June 25.
