ബെംഗളൂരു: കർണാടകയിലെ സർക്കാർ ബസുകളിൽ സ്ത്രീകൾക്ക് സൗജന്യ യാത്ര അനുവദിക്കുന്ന ‘ശക്തി’ പദ്ധതിയുടെ ഭാഗമായി സ്മാർട്ട് കാർഡുകൾ പുറത്തിറക്കാൻ സർക്കാർ നടപടികൾ തുടങ്ങി. സർക്കാർ ബസുകളിൽ സൗജന്യ യാത്ര നടത്തുന്ന സ്ത്രീകൾക്ക് തിരിച്ചറിയൽ രേഖയായും ഈ സ്മാർട്ട് കാർഡ് ഉപയോഗിക്കാം. ഗതാഗത മന്ത്രി ബൈരതി സുരേഷാണ് ഇക്കാര്യം അറിയിച്ചത്.(Karnataka Government To Issue Smart Cards For Shakti Scheme Free Bus Travel)
സ്ത്രീകൾക്ക് വളരെ കുറഞ്ഞ നിരക്കിൽ ഈ കാർഡ് വാങ്ങാം. ഇവർക്ക് ഇതിൽ റീചാർജ് ചെയ്യേണ്ടതില്ല. പദ്ധതിയുടെ ഭാഗമായി പുരുഷന്മാർക്കും സ്മാർട്ട് കാർഡുകൾ നൽകും. എന്നാൽ, ഇവർക്ക് റീചാർജ് ചെയ്ത് യാത്ര ചെയ്യാൻ സാധിക്കും. ഏകദേശം 3 കോടി സ്മാർട്ട് കാർഡുകൾ വിതരണം ചെയ്യാനാണ് സർക്കാർ ലക്ഷ്യമിടുന്നത്. ഇതിനായി കാർഡ് നിർമ്മാണത്തിനായി ടെൻഡറുകൾ ക്ഷണിക്കും.
ജൂൺ 11-ന് മൂന്ന് വർഷം പൂർത്തിയാക്കുന്ന ‘ശക്തി’ പദ്ധതി വൻ വിജയമാണെന്ന് സർക്കാർ വിലയിരുത്തുന്നു. പദ്ധതിക്ക് ശേഷം ബസുകളിലെ യാത്രികരുടെ എണ്ണത്തിൽ 40 ശതമാനം വർധനവാണ് ഉണ്ടായത്. കഴിഞ്ഞ മൂന്ന് വർഷത്തിനിടയിൽ 19,771 കോടി രൂപയാണ് സർക്കാർ ഈ പദ്ധതിക്കായി ചെലവഴിച്ചത്. ഏകദേശം 753.7 കോടി സൗജന്യ ടിക്കറ്റുകളാണ് സ്ത്രീകൾക്ക് മാത്രം വിതരണം ചെയ്തത്. ബെംഗളൂരു മെട്രോപൊളിറ്റൻ ട്രാൻസ്പോർട്ട് കോർപ്പറേഷനിലാണ് ഏറ്റവും കൂടുതൽ വനിതാ യാത്രക്കാർ ഈ സേവനം പ്രയോജനപ്പെടുത്തിയത്.
കൂടാതെ, ഗതാഗത സംവിധാനം ശക്തിപ്പെടുത്തുന്നതിനായി സംസ്ഥാന സർക്കാർ 1,000 ബസുകൾ സ്വന്തം നിലയ്ക്കും, 4,000 ഇലക്ട്രിക് ബസുകൾ കേന്ദ്ര സർക്കാരിന്റെ സഹായത്തോടെയും വാങ്ങുമെന്ന് മന്ത്രി വ്യക്തമാക്കി. വിദ്യാർഥികൾക്കായി സൗജന്യ ബസ് പാസുകൾ നൽകാനുള്ള തീരുമാനവും സർക്കാർ അടുത്തിടെ പ്രഖ്യാപിച്ചിരുന്നു.
Story Summary
The Karnataka government is set to introduce smart cards for the ‘Shakti scheme’, allowing women to access free bus rides across state-run transport services. The government also plans to extend prepaid rechargeable smart cards to men, aiming to streamline travel following the scheme’s massive success, which has seen a 40% increase in passenger numbers over the past three years.
