മൈദുഗുരി: നൈജീരിയയുടെ വടക്കുകിഴക്കൻ മേഖലയിൽ ബോക്കോ ഹറാം തീവ്രവാദി ഗ്രൂപ്പ് തടവിലാക്കിയ 360 പേരെ നൈജീരിയൻ സൈന്യം സുരക്ഷിതമായി മോചിപ്പിച്ചു. ബോർണോ സ്റ്റേറ്റിലെ മന്ദാര പർവതനിരകളിൽ തീവ്രവാദികൾ താവളമടിച്ചിരുന്ന കേന്ദ്രത്തിൽ നടത്തിയ പ്രത്യേക സൈനിക നീക്കത്തിലൂടെയാണ് ബന്ദികളെ മോചിപ്പിച്ചത്.(Nigerian military rescues 360 abductees from Boko Haram stronghold)
കടുത്ത പീഡനങ്ങളും ദുരിതങ്ങളും നിറഞ്ഞ സാഹചര്യത്തിലാണ് ബന്ദികളെ തീവ്രവാദികൾ പാർപ്പിച്ചിരുന്നത്. മാസങ്ങളോളം നീണ്ട തടവിനും ദുർഘടമായ മലനിരകളിലൂടെയുള്ള സഞ്ചാരത്തിനുമിടയിൽ രണ്ട് കുട്ടികൾ ക്ഷീണം കാരണം മരണപ്പെട്ടതായി സൈനിക വക്താവ് ഹരുണ സാനി അറിയിച്ചു. ബാക്കിയുള്ളവരെ സുരക്ഷിതമായി മാറ്റിപ്പാർപ്പിക്കുകയും ഇവർക്ക് ആവശ്യമായ വൈദ്യസഹായവും മാനുഷിക സഹായങ്ങളും ഉറപ്പാക്കുകയും ചെയ്തു.
തീവ്രവാദികളുടെ സംഘത്തിനുള്ളിൽ അവിശ്വാസം വളർത്താൻ ഉതകുന്ന ‘സൈക്കോളജിക്കൽ ഓപ്പറേഷൻസ്’ നടത്തിയ ശേഷമാണ് ആക്രമണം ആരംഭിച്ചതെന്ന് സൈന്യം വ്യക്തമാക്കി. സൈന്യത്തെ കണ്ടതോടെ നിരവധി തീവ്രവാദികൾ പരിസരത്തെ മലനിരകളിലേക്ക് ഓടി രക്ഷപ്പെടുകയും ചിലർ കീഴടങ്ങുകയും ചെയ്തു.
ബന്ദികളാക്കപ്പെട്ടവർക്കായി ബോക്കോ ഹറാം വൻ തുക മോചനദ്രവ്യമായി ആവശ്യപ്പെട്ടിരുന്നു. 2024 ജൂലൈ മുതൽ 2025 ജൂൺ വരെയുള്ള കാലയളവിൽ മാത്രം തട്ടിക്കൊണ്ടുപോകലിലൂടെ 1.66 മില്യൺ ഡോളറാണ് തീവ്രവാദികൾ സമാഹരിച്ചതെന്ന് റിപ്പോർട്ടുകൾ സൂചിപ്പിക്കുന്നു. ബോർണോ സ്റ്റേറ്റ് കേന്ദ്രീകരിച്ച് പ്രവർത്തിക്കുന്ന ബോക്കോ ഹറാമിനും അവരുടെ വിമത ഗ്രൂപ്പായ ഐഎസ്ഡബ്ല്യുഎപി എന്നിവർക്കെതിരെ സൈന്യം കടുത്ത നടപടികളാണ് സ്വീകരിക്കുന്നത്. അമേരിക്കയുമായി സഹകരിച്ച് നടത്തിയ സംയുക്ത നീക്കത്തിൽ കഴിഞ്ഞ മാസം 175 ഐഎസ്ഡബ്ല്യുഎപി തീവ്രവാദികളെ വധിക്കാൻ നൈജീരിയൻ സൈന്യത്തിന് സാധിച്ചിരുന്നു. 2009-ൽ ആരംഭിച്ച ബോക്കോ ഹറാമിന്റെ ഭീകരത നൈജീരിയയിൽ പതിനായിരക്കണക്കിന് ആളുകളുടെ മരണത്തിനും ഏകദേശം 20 ലക്ഷത്തോളം പേരുടെ പലായനത്തിനും കാരണമായിട്ടുണ്ട്.
Story Summary
The Nigerian military has successfully rescued 360 people held captive by the Boko Haram armed group in the Mandara mountains of Borno state. This significant operational success follows intelligence-led psychological warfare against the insurgents, who have been using kidnappings as a major source of revenue across Nigeria’s security-stricken northeast.
