കൊച്ചി: രാജ്യത്തെ പ്രമുഖ ടെലികോം ഓപ്പറേറ്ററായ വോഡഫോണ് ഐഡിയ (Vi) ആഗോള സോഷ്യല് മീഡിയ ഭീമന്മാരായ മെറ്റയുമായി (Vodafone Idea Meta partnership) തന്ത്രപ്രധാനമായ പങ്കാളിത്തം പ്രഖ്യാപിച്ചു. മെറ്റയുടെ കീഴിലുള്ള വാട്സാപ്പ്, ഫേസ്ബുക്ക്, ഇന്സ്റ്റാഗ്രാം എന്നിവ ഉപയോഗിക്കുന്ന ‘വി’ ഉപഭോക്താക്കള്ക്ക് കൂടുതല് സുരക്ഷിതവും വേഗമേറിയതുമായ ഡിജിറ്റല് അനുഭവം ഉറപ്പാക്കുന്നതിനായി ‘സൈലന്റ് മൊബൈല് വെരിഫിക്കേഷന്’ (Silent Mobile Verification) സംവിധാനമാണ് ഇരു കമ്പനികളും ചേർന്ന് അവതരിപ്പിച്ചത്.
പൂർണ്ണമായും നെറ്റ്വര്ക്ക് അധിഷ്ഠിതമായി പ്രവര്ത്തിക്കുന്ന ഈ ആധികാരികത ഉറപ്പാക്കൽ (Network-based Authentication) സാങ്കേതികവിദ്യയിലൂടെ, പരമ്പരാഗത രീതിയിലുള്ള ഒ.ടി.പി (OTP) അല്ലെങ്കിൽ പാസ്വേഡ് എന്നിവ മാനുവലായി ടൈപ്പ് ചെയ്യാതെ തന്നെ ഉപഭോക്താക്കളുടെ മൊബൈല് നമ്പര് പശ്ചാത്തലത്തില് (Background) സ്വയമേവ വെരിഫൈ ചെയ്യപ്പെടും.
‘വി’ മൊബൈല് നെറ്റ്വര്ക്ക് ഡാറ്റ ഉപയോഗിച്ച് ഉപഭോക്താക്കള് വാട്സാപ്പോ മറ്റ് മെറ്റാ ആപ്പുകളോ തുറക്കുമ്പോള് ടെലികോം നെറ്റ്വര്ക്ക് നേരിട്ട് ഈ വെരിഫിക്കേഷന് പ്രക്രിയ പൂര്ത്തിയാക്കുന്നു. പുതിയ അക്കൗണ്ട് രജിസ്ട്രേഷന്, ലോഗിന്, അക്കൗണ്ട് റിക്കവറി, അടിയന്തിര സെക്യൂരിറ്റി ചെക്കുകള് എന്നിവയിലെല്ലാം ഈ സുരക്ഷിത പാസ്വേഡ് രഹിത സേവനം ഉപഭോക്താക്കൾക്ക് ലഭ്യമാകും.
വ്യാജ അക്കൗണ്ടുകള് വഴിയുള്ള ഡിജിറ്റല് തട്ടിപ്പുകള്, സിം സ്വാപ്പിംഗ്, ഫിഷിംഗ് (Phishing) എന്നിവയില് നിന്ന് ഉപഭോക്താക്കള്ക്ക് നൂറു ശതമാനം സുരക്ഷ നല്കാന് ഈ സംവിധാനത്തിലൂടെ സാധിക്കുമെന്നും മെറ്റയുമായുള്ള ഈ സഹകരണം രാജ്യത്തെ സൈബര് സുരക്ഷ വർദ്ധിപ്പിക്കുന്നതിൽ വലിയൊരു നാഴികക്കല്ലാണെന്നും വിലയിരുത്തപ്പെടുന്നു.
മെറ്റയുമായുള്ള പങ്കാളിത്തത്തിലൂടെ രാജ്യത്ത് ഏറ്റവും കൂടുതല് ഉപയോഗിക്കുന്ന ഡിജിറ്റല് പ്ലാറ്റ്ഫോമുകളിലെ ഉപഭോക്താക്കള്ക്ക് തടസ്സങ്ങളില്ലാത്ത വെരിഫിക്കേഷന് അനുഭവം നല്കുന്നതിനൊപ്പം തന്നെ സൈബര് സുരക്ഷ വര്ദ്ധിപ്പിക്കുന്നതിനും തട്ടിപ്പുകള്ക്കുള്ള സാധ്യത കുറയ്ക്കുന്നതിനുമുള്ള സൈലന്റ് മൊബൈല് വെരിഫിക്കേഷന് സംവിധാനമാണ് ഇതിലൂടെ സാധ്യമാക്കുന്നതെന്ന് വോഡഫോണ് ഐഡിയ ലിമിറ്റഡ് സി.ഇ.ഒ അഭിജിത് കിഷോര് വ്യക്തമാക്കി.
ഉപഭോക്താക്കള്ക്ക് ഒ.ടി.പി കാത്തിരിപ്പുകളില്ലാതെ വെരിഫിക്കേഷന് പ്രക്രിയകള് കൂടുതല് ലളിതവും സുരക്ഷിതവുമാക്കുന്നതില് നെറ്റ്വര്ക്ക് അധിഷ്ഠിത ഓഥന്റിക്കേഷന് ഒരു സുപ്രധാന ചുവടുവെപ്പാണെന്ന് മെറ്റാ ഇന്ത്യയുടെ മാനേജിംഗ് ഡയറക്ടറും കണ്ട്രി ഹെഡുമായ അരുണ് ശ്രീനിവാസ് പറഞ്ഞു. വരും ദിവസങ്ങളില് കൂടുതൽ ആപ്ലിക്കേഷനുകളിലേക്കും മറ്റ് സാമ്പത്തിക പങ്കാളികളിലേക്കും തട്ടിപ്പ് തടയല് സംവിധാനങ്ങളിലേക്കും ഈ സേവനം വിപുലീകരിക്കാൻ വോഡഫോൺ ഐഡിയയ്ക്ക് പദ്ധതിയുണ്ട്.
Story Summary: Telecom operator Vodafone Idea (Vi) has partnered with Meta to introduce a ‘Silent Mobile Verification’ feature for its users on WhatsApp, Facebook, and Instagram. This network-based authentication automatically verifies the user’s mobile number in the background, eliminating the need for manual OTPs or passwords, thereby enhancing cyber security and preventing digital fraud.
