ഗുവാഹത്തി: അസമിലെ ബിശ്വനാഥ് ജില്ലയിൽ ഓടിക്കൊണ്ടിരുന്ന കാറിനുള്ളിൽ 15 വയസ്സുകാരിയെ ക്രൂരമായി കൂട്ടബലാത്സംഗം ചെയ്തു (Assam gang rape case). സംഭവവുമായി ബന്ധപ്പെട്ട് അഞ്ചുപേരെ പോലീസ് അറസ്റ്റ് ചെയ്തു. പ്രദേശവാസികളായ നാട്ടുകാരുടെ കൃത്യസമയത്തുള്ള ഇടപെടലും ധീരതയും കൊണ്ടാണ് പെൺകുട്ടിയുടെ ജീവൻ രക്ഷിക്കാനായത്.
മേഖലയിലൂടെ സംശയാസ്പദമായ സാഹചര്യത്തിൽ അമിതവേഗതയിൽ സഞ്ചരിച്ചിരുന്ന കാർ ശ്രദ്ധയിൽപ്പെട്ട നാട്ടുകാർ വാഹനം തടഞ്ഞുനിർത്തി പരിശോധിക്കുകയായിരുന്നു. തുടർന്ന് കാറിനുള്ളിൽ അർധനഗ്നയായ നിലയിൽ ഭയന്നുവിറച്ചു കിടന്നിരുന്ന പെൺകുട്ടിയെ കണ്ടെത്തുകയും ഉടൻ തന്നെ രക്ഷപ്പെടുത്തി പോലീസിൽ വിവരമറിയിക്കുകയുമായിരുന്നു.
വിശന്നു വലഞ്ഞിരുന്ന തനിക്ക് ആഹാരം വാഗ്ദാനം ചെയ്താണ് പ്രതികൾ വഞ്ചനാപരമായി വാഹനത്തിൽ കയറ്റിയതെന്ന് പെൺകുട്ടി പോലീസിന് മൊഴി നൽകി. തുടർന്ന് കാർ ഓടിക്കുന്നതിനിടയിൽ പ്രതികൾ മാറിമാറി തന്നെ ക്രൂരമായി പീഡിപ്പിക്കുകയായിരുന്നുവെന്നും പെൺകുട്ടിയുടെ മൊഴിയിലുണ്ട്.
സംഭവത്തിൽ അറസ്റ്റിലായ അഞ്ച് പ്രതികളെയും കോടതിയിൽ ഹാജരാക്കി റിമാൻഡ് ചെയ്തു. കുറ്റകൃത്യത്തിന് ഉപയോഗിച്ച വാഹനം പോലീസ് കസ്റ്റഡിയിലെടുത്തിട്ടുണ്ട്. പ്രതികൾക്കെതിരെ പോക്സോ (POCSO) നിയമപ്രകാരവും തട്ടിക്കൊണ്ടുപോകൽ, കൂട്ടബലാത്സംഗം തുടങ്ങിയ കടുത്ത വകുപ്പുകൾ ചുമത്തിയാണ് കേസ് രജിസ്റ്റർ ചെയ്തിരിക്കുന്നതെന്ന് ബിശ്വനാഥ് അഡീഷനൽ പോലീസ് സൂപ്രണ്ട് ദീപ്തി മാലി അറിയിച്ചു.
Story Summary: A 15-year-old girl was gang-raped inside a moving car in Assam’s Biswanath district. Alert local residents intercepted the suspicious vehicle and rescued the victim, leading to the arrest of five individuals who have been remanded under the POCSO Act.
