ലക്നോ: ഉത്തർപ്രദേശിലെ ഗാസിയാബാദിൽ പതിനേഴുകാരനായ സൂര്യ പ്രതാപ് ചൗഹാൻ എന്ന വിദ്യാർത്ഥി കുത്തേറ്റു മരിച്ച കേസിൽ നാടകീയ തിരിവ് (UP police encounter Ghaziabad). ഒളിവിൽ പോയ കേസിലെ മുഖ്യപ്രതി അസദിനെ യുപി പോലീസ് എൻകൗണ്ടറിലൂടെ (Encounter) വെടിവെച്ചുകൊന്നു. ശനിയാഴ്ച അർധരാത്രിയോടെ ഉത്തർപ്രദേശിലെ ഖോദ പോലീസ് സ്റ്റേഷൻ പരിധിയിലാണ് ഇരുപക്ഷവും തമ്മിൽ കടുത്ത ഏറ്റുമുട്ടലുണ്ടായത്.
കഴിഞ്ഞ ദിവസം ബക്രീദ് ആഘോഷങ്ങളുമായി ബന്ധപ്പെട്ട് സുഹൃത്തുക്കൾ തമ്മിലുണ്ടായ വ്യക്തിപരമായ ചില തർക്കങ്ങളെ തുടർന്നാണ് പതിനൊന്നാം ക്ലാസ് വിദ്യാർത്ഥിയായ സൂര്യ പ്രതാപ് ചൗഹാൻ അതിക്രൂരമായി കൊല്ലപ്പെട്ടത്. കൗമാരക്കാരന്റെ കൊലപാതകത്തെ തുടർന്ന് ഗാസിയാബാദിലും പരിസര പ്രദേശങ്ങളിലും കനത്ത വർഗീയ സംഘർഷാവസ്ഥയും വലിയ ജനരോഷവും പുകയുകയായിരുന്നു. കുറ്റവാളികളെ ഉടനടി പിടികൂടണമെന്നും യോഗി സർക്കാരിന്റെ പതിവ് ശൈലിയിൽ എൻകൗണ്ടർ ചെയ്യണമെന്നും ആവശ്യപ്പെട്ട് വിവിധ സംഘടനകളും നാട്ടുകാരും പരസ്യമായി രംഗത്തിറങ്ങി വലിയ പ്രതിഷേധ പ്രകടനങ്ങൾ നടത്തിവരികയായിരുന്നു. ക്രമസമാധാന നില തകരുമെന്ന ഘട്ടത്തിലാണ് ഒളിവിൽ പോയ മുഖ്യപ്രതി അസദിനായി പോലീസ് തിരച്ചിൽ ഊർജ്ജിതമാക്കിയത്.
അതിനിടെ, അസദ് ഒളിത്താവളത്തിൽ നിന്നും പുറത്തിറങ്ങി തന്റെ ചില കൂട്ടാളികളെ കണ്ട് പണം വാങ്ങി സംസ്ഥാനം വിടാൻ ശ്രമിക്കുന്നതായി ജില്ലാ പോലീസ് മേധാവിക്ക് രഹസ്യവിവരം ലഭിച്ചു. ഇതിന്റെ അടിസ്ഥാനത്തിൽ പോലീസ് പ്രത്യേക സംഘം ഖോദ പ്രദേശത്ത് കനത്ത കാവൽ ഏർപ്പെടുത്തി പരിശോധന കർശനമാക്കി. ഒരു ബൈക്കിൽ സുഹൃത്തിനൊപ്പം സംശയാസ്പദമായ സാഹചര്യത്തിൽ എത്തിയ അസദിനെ പോലീസ് തടയാൻ ശ്രമിച്ചപ്പോൾ, ഇയാൾ പോക്കറ്റിൽ നിന്നും തോക്കെയുടുത്ത് പോലീസിന് നേരെ തുരുതുരാ വെടിയുതിർക്കുകയായിരുന്നു. തുടർന്ന് സ്വയരക്ഷയ്ക്കായി പോലീസ് നടത്തിയ ശക്തമായ പ്രത്യാക്രമണത്തിലാണ് അസദിന് വെടിയേറ്റത്. രക്തം വാർന്ന നിലയിൽ ഇയാളെ ഉടൻ തന്നെ തൊട്ടടുത്തുള്ള ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. പോലീസുമായുള്ള കടുത്ത ഏറ്റുമുട്ടലിൽ ഒരു പോലീസ് കോൺസ്റ്റബിളിനും വെടിയേറ്റ് പരിക്കേറ്റിട്ടുണ്ട്. ഇദ്ദേഹത്തെ വിദഗ്ദ്ധ ചികിത്സയ്ക്കായി പ്രവേശിപ്പിച്ചു. പ്രദേശത്ത് കൂടുതൽ അനിഷ്ട സംഭവങ്ങൾ ഉണ്ടാകാതിരിക്കാൻ കനത്ത പോലീസ് സന്നാഹത്തെ വിന്യസിച്ചിട്ടുണ്ട്.
Story Summary: The main accused, Asad, in the murder case of 17-year-old Surya Pratap Chauhan in Ghaziabad, was killed in a police encounter in the Khoda area of Uttar Pradesh on Saturday midnight. The teenager’s murder had sparked communal tension, leading the police to intensify their search and engage in a shootout when the suspect opened fire.
