തിരുവനന്തപുരം: ജില്ലയിലെ നെടുമങ്ങാട് ഒന്നര വയസ്സുള്ള കുഞ്ഞിനെ ക്രൂരമായി ഉപദ്രവിച്ച കേസിൽ അറസ്റ്റിലായ അഷ്കറിന്റെ ക്രൂരതകൾക്ക് ഇരയായത് രണ്ടാം ഭാര്യയും കുഞ്ഞും മാത്രമല്ല (Ashkar Torture Case), ഒന്നാം ഭാര്യയും കൂടിയാണെന്ന ഞെട്ടിക്കുന്ന വിവരങ്ങൾ പുറത്തുവരുന്നു. അഷ്കറിന്റെ ക്രൂരമായ മർദ്ദനത്തെ തുടർന്ന് തലച്ചോറിൽ രക്തം കട്ടപിടിച്ച് ശസ്ത്രക്രിയയ്ക്ക് വിധേയയായ ആദ്യ ഭാര്യ ആമിന നിലവിൽ ശരീരം തളർന്ന് എഴുന്നേറ്റിരിക്കാൻ പോലും കഴിയാത്ത അവസ്ഥയിൽ ചികിത്സയിലാണ്.
2022-ലാണ് പാലോട് സ്വദേശിനിയായ ആമിനയെ അഷ്കർ വിവാഹം കഴിക്കുന്നത്. വിവാഹം കഴിഞ്ഞതിന്റെ തൊട്ടടുത്ത ദിവസം മുതൽ അഷ്കറും അമ്മയും സഹോദരിയും ചേർന്ന് ആമിനയെ ക്രൂരമായ ശാരീരിക-മാനസിക പീഡനങ്ങൾക്ക് ഇരയാക്കാൻ തുടങ്ങി. കേട്ടാൽ അറപ്പുളവാക്കുന്ന രീതിയിലുള്ള ശാരീരിക ഉപദ്രവങ്ങളാണ് യുവതി നേരിട്ടത്. മുഖത്തടിക്കുക, മുഷ്ടി ചുരുട്ടി തലയ്ക്ക് ഇടിക്കുക എന്നിവയ്ക്ക് പുറമെ ബലമായി വായ് കുത്തിത്തുറന്ന് വിഷം ഒഴിച്ചു നൽകാനും ഇയാൾ ശ്രമിച്ചിരുന്നു.
മർദ്ദനമേറ്റ് അവശയായി ബോധംകെട്ടു വീണ യുവതിയെ അഷ്കറും കുടുംബവും ചേർന്ന് ഫാനിൽ കെട്ടിത്തൂക്കി കൊലപ്പെടുത്താൻ ശ്രമിച്ചതായും ആമിനയുടെ അമ്മ ഷജീല ബീവി വെളിപ്പെടുത്തുന്നു. തൂക്കാൻ ശ്രമിക്കുന്നതിനിടെ ബോധം തിരികെ ലഭിച്ചതിനാലാണ് അന്ന് ആമിന ഓടി രക്ഷപ്പെട്ടത്. കിണറ്റിൽ തള്ളിയിട്ടും സഞ്ചരിക്കുന്ന ഓട്ടോറിക്ഷയിൽ നിന്ന് പുറത്തേക്ക് തള്ളിയിട്ടും കൊലപ്പെടുത്താൻ അഷ്കർ ശ്രമിച്ചിരുന്നു. തന്റെ മുന്നിൽ വെച്ച് മറ്റൊരു വിവാഹം കഴിക്കുമെന്നും തന്റെ അടിമയായി കഴിയണമെന്നും ഇയാൾ ആമിനയെ ഭീഷണിപ്പെടുത്തിയിരുന്നു.
ഏറ്റവും ഒടുവിൽ 2024-ൽ ആമിനയുടെ തല ഭിത്തിയിലേക്ക് നിരന്തരം പിടിച്ചടിച്ചതിനെ തുടർന്ന് തലച്ചോറിൽ കടുത്ത രക്തസ്രാവം ഉണ്ടാവുകയും രക്തം കട്ടപിടിക്കുകയുമായിരുന്നു. തുടർന്ന് നടത്തിയ അടിയന്തര ശസ്ത്രക്രിയയ്ക്ക് ശേഷമാണ് 21 വയസ്സ് മാത്രം പ്രായമുള്ള ആമിനയുടെ ശരീരം പൂർണ്ണമായും തളർന്നുപോയത്. നിലവിൽ മെഡിക്കൽ കോളേജിന് സമീപമുള്ള ഫിസിയോതെറാപ്പി സെന്ററിൽ കടുത്ത ആരോഗ്യ പ്രശ്നങ്ങളോട് പോരാടുകയാണ് ഈ യുവതി. അഷ്കർ പുറംലോകം കാണാൻ യോഗ്യനല്ലാത്ത കൊടും കുറ്റവാളിയാണെന്നും കർശന ശിക്ഷ ഉറപ്പാക്കണമെന്നും കുടുംബം ആവശ്യപ്പെടുന്നു.
വയറ്റിലും തുടയിലും സിഗരറ്റ് കൊണ്ട് പൊള്ളിച്ചത് നിരവധി തവണ, ആന്തരിക രക്തസ്രാവവും, മർദ്ദിച്ചത് അമ്മയുടെ സാന്നിധ്യത്തിൽ; നെടുമങ്ങാട് ഒന്നരവയസ്സുകാരൻ നേരിട്ടത് സമാനതകളില്ലാത്ത ക്രൂരത
തിരുവനന്തപുരം: നെടുമങ്ങാട് ഒന്നരവയസ്സുകാരൻ അർഷാദ് രണ്ടാനച്ഛന്റെ മർദ്ദനമേറ്റു മരിച്ച സംഭവത്തിൽ പുറത്തുവരുന്നത് മനുഷ്യമനസ്സാക്ഷിയെ ഞെട്ടിക്കുന്ന കൊടും ക്രൂരതയുടെ വിവരങ്ങൾ (Nedumangad toddler murder case). കുഞ്ഞിന്റെ വയറ്റിലും തുടയിലും സിഗരറ്റ് കൊണ്ട് പലതവണ ക്രൂരമായി പൊള്ളിച്ചതിന്റെ പാടുകൾ ഇൻക്വസ്റ്റിൽ കണ്ടെത്തി. കാൽവിരലുകളുടെ അടിഭാഗം മുഴുവനായി പൊള്ളി അടർന്ന നിലയിലാണുള്ളത്. കുഞ്ഞിനെ രണ്ടാനച്ഛൻ അഷ്കർ മാരകമായി മർദ്ദിച്ചിരുന്നത് സ്വന്തം അമ്മ അഖിലയുടെ സാന്നിധ്യത്തിലായിരുന്നുവെന്നും, ഈ ക്രൂരതകൾക്കെല്ലാം താൻ ദൃക്സാക്ഷിയായിരുന്നുവെന്നും അമ്മ പോലീസിനോട് സമ്മതിച്ചു. സ്വന്തം കുഞ്ഞായി നോക്കിക്കൊള്ളാം എന്ന ഉറപ്പ് നൽകിയാണ് അഷ്കർ അഖിലയെ ഒപ്പം താമസിപ്പിച്ചിരുന്നതെന്നും ചോദ്യം ചെയ്യലിൽ വ്യക്തമായി.
അർഷാദിന്റെ മരണകാരണം തലയിലേറ്റ പരുക്കിനെത്തുടർന്നുണ്ടായ ആന്തരിക രക്തസ്രാവമാണെന്ന് (Internal Bleeding) പ്രാഥമിക പോസ്റ്റ്മോർട്ടം റിപ്പോർട്ടിൽ വ്യക്തമാക്കുന്നു. മരണപ്പെടുന്നതിന് തൊട്ടുമുൻപും കുട്ടി അതിരൂക്ഷമായ മർദ്ദനത്തിന് ഇരയായിരുന്നു. കുട്ടിയുടെ ആന്തരിക അവയവങ്ങൾക്ക് വരെ മർദ്ദനത്തിൽ ഗുരുതരമായി പരുക്കേറ്റിട്ടുണ്ടെന്ന് പോസ്റ്റ്മോർട്ടം റിപ്പോർട്ട് സ്ഥിരീകരിക്കുന്നുണ്ട്. കേസിൽ അമ്മയുടെയും രണ്ടാനച്ഛന്റെയും അറസ്റ്റ് പോലീസ് രാത്രിയോടെ ഔദ്യോഗികമായി രേഖപ്പെടുത്തി. സംഭവത്തിൽ കൂടുതൽ പേർക്ക് പങ്കുണ്ടോ എന്നതടക്കം വിശദമായ അന്വേഷണത്തിനാണ് നെടുമങ്ങാട് പോലീസ് ഒരുങ്ങുന്നത്.
കഴിഞ്ഞദിവസം ആഹാരം നൽകുന്നതിനിടെ തൊണ്ടയിൽ കുടുങ്ങിയെന്ന് വ്യാജക്കഥ ചമച്ചാണ് അഷ്കർ കുട്ടിയെ തിരുവനന്തപുരം എസ്.എ.റ്റി (SAT) ആശുപത്രിയിൽ എത്തിച്ചത്. എന്നാൽ ആശുപത്രിയിലെത്തി അധികം വൈകാതെ കുഞ്ഞ് മരണപ്പെടുകയായിരുന്നു. മരണത്തിൽ സംശയം തോന്നിയ കുഞ്ഞിന്റെ പിതാവിന്റെ കുടുംബം ഉടൻ തന്നെ പോലീസിൽ പരാതി നൽകി. കുട്ടി നിരന്തരം ക്രൂരമായ മർദ്ദനത്തിന് ഇരയായിട്ടുണ്ടെന്ന് ബന്ധുക്കൾ പരാതിയിൽ കൃത്യമായി ചൂണ്ടിക്കാണിച്ചിരുന്നു. തുടർന്ന് പോലീസ് നടത്തിയ ഇൻക്വസ്റ്റിലാണ് ശരീരത്തിലുടനീളമുള്ള മർദ്ദനമേറ്റ പാടുകളും പൊള്ളലുകളും കണ്ടെത്തിയത്. ഇതിന് പിന്നാലെയാണ് പ്രതികൾക്കെതിരെ കൊലക്കുറ്റം ചുമത്തി കേസെടുത്തതും അറസ്റ്റിലേക്ക് നീങ്ങിയതും.
Story Summary: Horrific details have emerged regarding Ashkar, who was recently arrested for brutally torturing his 1.5-year-old child, revealing that his first wife, Amina, was also a victim of his extreme cruelty. Married in 2022, 21-year-old Amina was subjected to severe physical and mental torture by Ashkar, his mother, and his sister.
