ന്യൂഡൽഹി: പശ്ചിമ ബംഗാളിലെ ബിജെപിയുടെ കന്നി വിജയത്തെ സാംസ്കാരിക പ്രതീകങ്ങൾ കൊണ്ട് അടയാളപ്പെടുത്തി പ്രധാനമന്ത്രി നരേന്ദ്ര മോദി (PM Modi Bengali Dress). വെളുത്ത കുർത്തയും പട്ടുനൂൽ കൊണ്ട് നിർമ്മിച്ച പരമ്പരാഗത ബംഗാളി മുണ്ടും (Gorod Dhuti) ഉത്തരിയവും ധരിച്ചാണ് അദ്ദേഹം പാർട്ടി ആസ്ഥാനത്തെ വിജയാഘോഷത്തിന് എത്തിയത്. ബംഗാളിലെ ജനങ്ങളോടുള്ള ആദരസൂചകമായാണ് പ്രധാനമന്ത്രി ഈ വേഷം തിരഞ്ഞെടുത്തത്.
“ഗംഗോത്രി മുതൽ ഗംഗാ സാഗർ വരെ ഇപ്പോൾ താമര വിരിഞ്ഞിരിക്കുകയാണ്” എന്ന് പ്രധാനമന്ത്രി തന്റെ പ്രസംഗത്തിൽ പ്രഖ്യാപിച്ചു. ഉത്തരാഖണ്ഡ്, ഉത്തർപ്രദേശ്, ബിഹാർ എന്നിവയ്ക്ക് പിന്നാലെ ബംഗാളിലും ബിജെപി സർക്കാർ വരുന്നതോടെ ഗംഗാ നദി ഒഴുകുന്ന എല്ലാ സംസ്ഥാനങ്ങളിലും എൻഡിഎ ഭരണമായെന്ന് അദ്ദേഹം ചൂണ്ടിക്കാട്ടി. 2013-ൽ കാശിയിൽ വെച്ച് താൻ പറഞ്ഞ “അമ്മ ഗംഗ എന്നെ വിളിച്ചു” എന്ന വാക്കുകൾ ഇന്ന് പൂർണ്ണമായെന്നും അദ്ദേഹം കൂട്ടിച്ചേർത്തു.
ടാഗോറിന്റെ വരികളെ ഉദ്ധരിച്ചുകൊണ്ട്, ബംഗാൾ ഇനി ഭയത്തിൽ നിന്ന് മുക്തമാണെന്നും വികസനത്തിന്റെ പുതിയ പാതയിലാണെന്നും അദ്ദേഹം പറഞ്ഞു. രാഷ്ട്രീയ പ്രതികാരത്തിനല്ല (Badla), മറിച്ച് മാറ്റത്തിനാണ് (Badlav) മുൻഗണന നൽകേണ്ടതെന്ന് അദ്ദേഹം പ്രവർത്തകരെ ഓർമ്മിപ്പിച്ചു.ബംഗാളിൽ ബിജെപി സർക്കാർ അധികാരമേറ്റാലുടൻ ആദ്യ മന്ത്രിസഭാ യോഗത്തിൽത്തന്നെ ആയുഷ്മാൻ ഭാരത് പദ്ധതിക്ക് അനുമതി നൽകുമെന്ന് അദ്ദേഹം ഉറപ്പുനൽകി.
View this post on Instagram
ആർ.ജി കർ മെഡിക്കൽ കോളേജ് സംഭവം പരാമർശിച്ചുകൊണ്ട്, ബംഗാളിലെ സ്ത്രീകൾക്ക് സുരക്ഷ ഉറപ്പാക്കുന്ന അന്തരീക്ഷം സൃഷ്ടിക്കുമെന്ന് അദ്ദേഹം പറഞ്ഞു.
“ബംഗ്ലായേ പൊരിബർത്തൻ ഹോയേ ഗെച്ചേ” (ബംഗാളിൽ മാറ്റം സംഭവിച്ചു കഴിഞ്ഞു) എന്ന് ബംഗാളി ഭാഷയിൽ പറഞ്ഞുകൊണ്ടാണ് അദ്ദേഹം തന്റെ പ്രസംഗം അവസാനിപ്പിച്ചത്. വോട്ട് ചെയ്തവർക്കും അല്ലാത്തവർക്കും വേണ്ടി സർക്കാർ പ്രവർത്തിക്കുമെന്നും അദ്ദേഹം വ്യക്തമാക്കി.
Story Summary: PM Narendra Modi addressed BJP workers in Delhi wearing traditional Bengali attire to celebrate the party’s historic win in West Bengal. He emphasized that the “lotus has bloomed from Gangotri to Ganga Sagar” and promised a new era of development and security in Bengal.
