മുംബൈ: തണ്ണിമത്തൻ കഴിച്ചതിനെത്തുടർന്നുണ്ടായ ഭക്ഷ്യവിഷബാധ മൂലമാണ് മുംബൈയിലെ നാലംഗ കുടുംബം മരിച്ചതെന്ന പ്രചാരണങ്ങൾ തള്ളി ഫോറൻസിക് റിപ്പോർട്ട് ( Mysterious Death Mumbai). മൊബൈൽ ഷോപ്പ് ഉടമയായ അബ്ദുള്ള ഡോകാഡിയ (45), ഭാര്യ നസ്രീൻ (35), മക്കളായ സൈനബ് (13), ആയിഷ (16) എന്നിവരുടെ മരണത്തിന് പിന്നിൽ മാരകമായ വിഷാംശമാണെന്ന സൂചനകളാണ് ഇപ്പോൾ പുറത്തുവരുന്നത്.
സാധാരണ ഭക്ഷ്യവിഷബാധയേറ്റു മരിക്കുന്നവരിൽ കാണാത്ത ലക്ഷണങ്ങളാണ് ഈ കുടുംബത്തിലുണ്ടായിരുന്നത്.
പ്രാഥമിക ഫോറൻസിക് പരിശോധനയിൽ കണ്ടെത്തിയ പ്രധാന കാര്യങ്ങൾ ഇവയാണ്:
മരിച്ചവരുടെ തലച്ചോറ്, ഹൃദയം, കുടൽ തുടങ്ങിയ ആന്തരാവയവങ്ങൾ അസാധാരണമാംവിധം പച്ചനിറത്തിൽ കണ്ടെത്തി. ഇത് ശരീരത്തിനുള്ളിലെത്തിയ ശക്തമായ ഏതോ വിഷാംശത്തിന്റെ ഫലമാണെന്നാണ് നിഗമനം. അബ്ദുള്ള ഡോകാഡിയയുടെ ശരീരത്തിൽ ശക്തമായ വേദനസംഹാരിയായ മോർഫിൻ (Morphine) കണ്ടെത്തി. മെഡിക്കൽ നിർദ്ദേശപ്രകാരം മാത്രം നൽകുന്ന ഈ മരുന്ന് എങ്ങനെ ശരീരത്തിലെത്തിയെന്നത് പോലീസിനെ കുഴപ്പിക്കുന്നുണ്ട്.
അതേസമയം , കുടുംബം പുലർച്ചെ തണ്ണിമത്തൻ കഴിച്ചതാണ് മരണകാരണമെന്നായിരുന്നു ആദ്യ റിപ്പോർട്ടുകൾ. ഇതേത്തുടർന്ന് വിപണിയിൽ തണ്ണിമത്തൻ വിൽപനയിൽ വലിയ ഇടിവുണ്ടായിരുന്നു. എന്നാൽ, തണ്ണിമത്തന് മരണവുമായി നേരിട്ട് ബന്ധമുണ്ടെന്ന് തെളിയിക്കപ്പെട്ടിട്ടില്ലെന്ന് ഫുഡ് ആൻഡ് ഡ്രഗ് അഡ്മിനിസ്ട്രേഷൻ (FDA) വ്യക്തമാക്കി. കുടുംബത്തോടൊപ്പം പുലാവ് കഴിച്ച മറ്റ് അഞ്ച് ബന്ധുക്കൾക്ക് ആരോഗ്യപ്രശ്നങ്ങളൊന്നുമില്ലാത്തതിനാൽ ഭക്ഷണത്തിൽ ആരെങ്കിലും വിഷം കലർത്തിയതാണോ എന്നും അന്വേഷിക്കുന്നുണ്ട്.
സാമ്പത്തിക പ്രതിസന്ധിയോ മറ്റേതെങ്കിലും തരത്തിലുള്ള മാനസിക സമ്മർദ്ദമോ കുടുംബത്തിനുണ്ടായിരുന്നോ എന്ന് പോലീസ് പരിശോധിച്ചു വരികയാണ്. ആത്മഹത്യയാണോ അതോ കൊലപാതകമാണോ എന്നറിയാൻ കൂടുതൽ രാസപരിശോധനകൾക്കായി ആന്തരാവയവങ്ങൾ ലാബിലേക്ക് അയച്ചിരിക്കുകയാണ്. നിലവിൽ അസ്വാഭാവിക മരണത്തിന് കേസെടുത്ത് ബന്ധുക്കളുടെ മൊഴി രേഖപ്പെടുത്തിയിട്ടുണ്ട്.
Story Summary: The forensic report in the Mumbai family death case suggests that the four members did not die of food poisoning from watermelon as previously rumored. Autopsy results showed their internal organs turned green due to a potent toxin, and morphine was detected in the father’s body. Police are investigating whether it was a case of poisoning or suicide, as other relatives who ate with them remained healthy.
