ലൂസിയാന: അമേരിക്കയിലെ ലൂസിയാനയിൽ ഷോപ്പിംഗ് മാളിനുള്ളിലെ ഫുഡ് കോർട്ടിലുണ്ടായ വെടിവയ്പ്പിൽ ഒരാൾ കൊല്ലപ്പെട്ടു (Louisiana Mall Shooting). അഞ്ച് പേർക്ക് പരിക്കേറ്റു. ബാറ്റൺ റൂഷിലെ ‘മാൾ ഓഫ് ലൂസിയാന’യിലാണ് വെള്ളിയാഴ്ച ഉച്ചയോടെ വെടിവയ്പുണ്ടായത്. രണ്ട് സായുധ സംഘങ്ങൾ തമ്മിലുണ്ടായ തർക്കമാണ് വെടിവയ്പ്പിൽ കലാശിച്ചതെന്ന് പോലീസ് അറിയിച്ചു.
ഉച്ചയ്ക്ക് 1:30 ഓടെ മാളിലെ ഫുഡ് കോർട്ടിൽ വെച്ച് രണ്ട് ഗ്രൂപ്പുകൾ തമ്മിൽ തർക്കമുണ്ടാകുകയും പരസ്പരം വെടിയുതിർക്കുകയുമായിരുന്നു. എന്നാൽ വെടിയേറ്റവർ ഈ സംഘത്തിലുള്ളവരല്ലെന്നും ഭക്ഷണം കഴിക്കാനെത്തിയ സാധാരണക്കാരാണെന്നും ലൂസിയാന അറ്റോർണി ജനറൽ ലിസ് മുറിൽ പറഞ്ഞു. പരിക്കേറ്റവരിൽ അസൻഷൻ എപ്പിസ്കോപ്പൽ സ്കൂളിലെ മൂന്ന് ഹൈസ്കൂൾ വിദ്യാർത്ഥികളും ഉൾപ്പെടുന്നു. വെടിവയ്പിന് പിന്നാലെ പരിഭ്രാന്തരായ ജനങ്ങളെ ഉടൻ തന്നെ മാളിനുള്ളിൽ നിന്ന് ഒഴിപ്പിച്ചു.
സംഭവവുമായി ബന്ധപ്പെട്ട് അഞ്ച് പേരെ പോലീസ് കസ്റ്റഡിയിലെടുത്തതായി പോലീസ് മേധാവി ടി.ജെ. മോഴ്സ് അറിയിച്ചു. മരിച്ചയാളുടെയോ പരിക്കേറ്റവരുടെയോ പേരുവിവരങ്ങൾ അധികൃതർ ഔദ്യോഗികമായി പുറത്തുവിട്ടിട്ടില്ല. പരിക്കേറ്റവർ വിവിധ ആശുപത്രികളിൽ ചികിത്സയിലാണ്.
ലൂസിയാനയിൽ ഈ ആഴ്ച നടക്കുന്ന രണ്ടാമത്തെ വലിയ വെടിവയ്പ്പാണിത്. കഴിഞ്ഞ ഞായറാഴ്ച ഷ്രെവ്പോർട്ടിൽ ഒരു പിതാവ് സ്വന്തം മക്കളടക്കം എട്ട് കുട്ടികളെ വെടിവച്ചു കൊന്ന വാർത്തയുടെ നടുക്കം മാറുന്നതിന് മുൻപാണ് വീണ്ടും വെടിവയ്പ്പ് ഉണ്ടായിരിക്കുന്നത്. തോക്ക് ഉപയോഗിക്കുന്നതിലെ നിയന്ത്രണങ്ങളെക്കുറിച്ച് അമേരിക്കയിൽ വീണ്ടും ചർച്ചകൾ സജീവമാക്കാൻ ഈ സംഭവം കാരണമായിട്ടുണ്ട്.
Story Summary: One person was killed and five others, including high school students, were injured in a shooting at the Mall of Louisiana’s food court in Baton Rouge. Authorities confirmed that the incident stemmed from a dispute between two groups, and five suspects are currently in custody.
