തങ്ങളുടെ രണ്ടാമത്തെ കൺമണിക്കായുള്ള കാത്തിരിപ്പിലാണെന്ന സന്തോഷവാർത്ത പങ്കുവെച്ചിരിക്കുകയാണ് ബോളിവുഡ് താരദമ്പതികളായ ദീപിക പദുകോണും രൺവീർ സിംഗും (Deepika Padukone Second Pregnancy News). ഇന്ന് (2026 ഏപ്രിൽ 19, ഞായറാഴ്ച) ഇൻസ്റ്റാഗ്രാമിലൂടെയാണ് ഇരുവരും ഈ വിവരം ആരാധകരെ അറിയിച്ചത്.തങ്ങൾ രണ്ടാമതും മാതാപിതാക്കളാകാൻ പോകുന്നു എന്ന വിവരം ദീപികയും രൺവീറും സംയുക്തമായാണ് പ്രഖ്യാപിച്ചത്. ആദ്യത്തെ കൺമണി ദുവയുടെ (Dua) ജനനത്തിന് ശേഷം ഏകദേശം ഒന്നര വർഷം പിന്നിടുമ്പോഴാണ് ഈ പ്രഖ്യാപനം.
ദമ്പതികളുടെ മൂത്ത മകൾ ദുവ ഒരു പ്രെഗ്നൻസി കിറ്റ് കൈവശം വെച്ചിരിക്കുന്ന മനോഹരമായ ഒരു ചിത്രം പങ്കുവെച്ചുകൊണ്ടാണ് ഈ വാർത്ത സ്ഥിരീകരിച്ചത്. “നസർ” (nazar) ഇമോജികൾ മാത്രമാണ് കുറിപ്പായി താരം പങ്കുവെച്ചത്.
2024 സെപ്റ്റംബർ 8-നാണ് ദീപികയ്ക്കും രൺവീറിനും മകൾ ദുവ ജനിച്ചത്. ദുവയുടെ ജനനത്തിന് ശേഷം ദീപിക തന്റെ മാതൃത്വത്തെക്കുറിച്ചും കുടുംബ ജീവിതത്തെക്കുറിച്ചും പലപ്പോഴും വാചാലയാകാറുണ്ട്. രൺവീർ സിംഗ് നായകനായ ‘ധുരന്ധർ’ (Dhurandhar) എന്ന ചിത്രം വൻ വിജയമായി തുടരുന്നതിനിടയിലാണ് കുടുംബത്തിൽ നിന്നുള്ള ഈ പുതിയ വിശേഷം എത്തുന്നത്.
വാർത്ത പുറത്തുവന്നതിന് പിന്നാലെ ബോളിവുഡ് താരങ്ങളും ആരാധകരും ദമ്പതികൾക്ക് ആശംസകളുമായി രംഗത്തെത്തി. ‘ദീപ്വീർ’ (DeepVeer) ആരാധകർക്ക് ഇത് വലിയൊരു ആഘോഷമായി മാറിയിരിക്കുകയാണ്.
