Follow on Google News
ഭോപ്പാൽ : മധ്യപ്രദേശ് ബോർഡ് പന്ത്രണ്ടാം ക്ലാസ് പരീക്ഷാ ഫലം വന്നതിന് പിന്നാലെ ഇൻഡോറിൽ 18 വയസ്സുകാരനായ വിദ്യാർത്ഥി ആത്മഹത്യ ചെയ്തു (Indore Student Suicide Class 12 Fail). പരീക്ഷയിൽ പരാജയപ്പെട്ടതിലുള്ള കടുത്ത മാനസിക വിഷമമാണ് ഈ കടുംകൈയ്ക്ക് പ്രേരിപ്പിച്ചത്. ഇൻഡോറിലെ ഗാന്ധി നഗർ (Gandhi Nagar) പോലീസ് സ്റ്റേഷൻ പരിധിയിലാണ് സംഭവം നടന്നത്. പരീക്ഷാ ഫലം അറിഞ്ഞതിന് പിന്നാലെ വിദ്യാർത്ഥി വിഷം കഴിക്കുകയായിരുന്നു. അവശനിലയിലായ വിദ്യാർത്ഥിയെ ഉടൻ തന്നെ അടുത്തുള്ള സ്വകാര്യ ആശുപത്രിയിൽ എത്തിച്ചെങ്കിലും ചികിത്സയിലിരിക്കെ മരണം സംഭവിക്കുകയായിരുന്നു.
പഠനത്തിൽ മിടുക്കനായിരുന്ന വിദ്യാർത്ഥി പരീക്ഷയിൽ പരാജയപ്പെടുമെന്ന് പ്രതീക്ഷിച്ചിരുന്നില്ലെന്ന് ബന്ധുക്കൾ പറയുന്നു. ഫലം വന്നതോടെ കുട്ടി വലിയ നിരാശയിലായിരുന്നു. ഗാന്ധി നഗർ പോലീസ് അസ്വാഭാവിക മരണത്തിന് കേസെടുത്ത് അന്വേഷണം ആരംഭിച്ചു. മൃതദേഹം പോസ്റ്റ്മോർട്ടത്തിനായി ജില്ലാ ആശുപത്രിയിലേക്ക് മാറ്റി.
പരീക്ഷാ ഫലം ജീവിതത്തിന്റെ അവസാനമല്ലെന്നും ഇത്തരം സാഹചര്യങ്ങളിൽ കുട്ടികൾക്ക് കൃത്യമായ കൗൺസിലിംഗും കുടുംബത്തിന്റെ പിന്തുണയും ആവശ്യമാണെന്നും അധികൃതർ ഓർമ്മിപ്പിച്ചു.
