പാലക്കാട്: പാലക്കാട്ടെ യുഡിഎഫ് സ്ഥാനാർത്ഥി രമേശ് പിഷാരടിക്കെതിരെ ബിജെപി സൈബർ വിങ് വ്യാജ പ്രചാരണം നടത്തുന്നുവെന്ന് പരാതി (Ramesh Pisharody Palakkad UDF Candidate). താൻ നടന്നു വരുന്ന ഒരു വീഡിയോ ബോധപൂർവം എഡിറ്റ് ചെയ്ത് (ഫ്ലിപ്പ് ചെയ്ത്) മുണ്ട് ഇടത്തോട്ട് ഉടുത്തു എന്ന് വരുത്തിത്തീർക്കാനാണ് അവർ ശ്രമിച്ചതെന്ന് പിഷാരടി ആരോപിച്ചു. ഇതിലൂടെ വർഗീയ ചുവയുള്ള പ്രചാരണമാണ് ബിജെപി ലക്ഷ്യമിട്ടതെന്നും അദ്ദേഹം വ്യക്തമാക്കി.
‘ഇടത്തേക്ക് മുണ്ടുടുക്കുന്ന മതേതരനെ കണ്ടോ’ എന്ന പരിഹാസത്തോടെ ബിജെപി സൈബർ വിങ് വീഡിയോ പ്രചരിപ്പിച്ചു. വീഡിയോ ഫ്ലിപ്പ് ചെയ്ത് മുണ്ട് ഇടത്തോട്ട് ഉടുത്തതായി കാണിച്ചാണ് ഈ കുപ്രചാരണം നടത്തിയത്. വോട്ടർമാർക്ക് പണവും സാരിയും നൽകുന്ന ജനാധിപത്യവിരുദ്ധമായ നടപടികൾ മണ്ഡലത്തിൽ നടക്കുന്നുണ്ടെന്ന് പിഷാരടി ആരോപിച്ചു. ഇതിന്റെ ദൃശ്യങ്ങൾ പുറത്തുവന്നതോടെ ജനാധിപത്യം അട്ടിമറിക്കാനുള്ള ശ്രമമാണ് തെളിഞ്ഞതെന്നും അദ്ദേഹം കൂട്ടിച്ചേർത്തു.
മണ്ഡലത്തിന്റെ വിവിധ ഭാഗങ്ങളിൽ യുഡിഎഫിന്റെ പോസ്റ്ററുകളും ഫ്ലെക്സ് ബോർഡുകളും ബിജെപി പ്രവർത്തകർ വ്യാപകമായി നശിപ്പിക്കുകയാണ്.
തനിക്കെതിരെയുള്ള വ്യക്തിപരമായ അധിക്ഷേപങ്ങൾക്കും ശോഭാ സുരേന്ദ്രന്റെ പ്രസ്താവനകൾക്കും പിഷാരടി മറുപടി നൽകി.
“തനിക്കെതിരെ ചില കഥകളുണ്ടെന്നും പത്താം തീയതിക്ക് ശേഷം അത് പുറത്തുവിടുമെന്നുമാണ് അവർ പറയുന്നത്. വല്ലതും പറയാനുണ്ടെങ്കിൽ അത് തെരഞ്ഞെടുപ്പിന് മുൻപല്ലേ പറയേണ്ടത്? എന്നെ അരാഷ്ട്രീയവാദിയെന്നും ദുർബലനെന്നും വിളിക്കുന്നവർ, ഞാൻ അത്രമാത്രം ദുർബലനാണെങ്കിൽ എന്തിനാണ് എന്നെ ഇത്രയധികം ഭയപ്പെടുന്നത്?”
തന്നെ ‘നിഴൽ’ എന്ന് വിളിച്ച് അധിക്ഷേപിക്കുന്നതിനോട് പ്രതികരിക്കാനില്ലെന്നും മണ്ഡലത്തിൽ യുഡിഎഫിന് അനുകൂലമായ കാറ്റാണ് വീശുന്നതെന്നും പിഷാരടി ശുഭാപ്തിവിശ്വാസം പ്രകടിപ്പിച്ചു. പാലക്കാട്ടെ പ്രബുദ്ധരായ വോട്ടർമാർ ഇത്തരം തരംതാഴ്ന്ന രാഷ്ട്രീയ നീക്കങ്ങളെ തിരിച്ചറിയുമെന്നും അദ്ദേഹം പറഞ്ഞു.
Story Summary:
UDF candidate Ramesh Pisharody has accused the BJP cyber wing of spreading a manipulated video of him to incite communal sentiments during the Palakkad Assembly election. Pisharody claimed that his video was flipped to falsely show him wearing his mundu to the left side with a caption mocking his secularism. He also alleged that the BJP is distributing cash and sarees to influence voters and destroying UDF campaign materials. Responding to Sobha Surendran’s remarks, Pisharody questioned the delay in revealing supposed “stories” about him and expressed confidence in a UDF victory.
