കോഴിക്കോട്/മടിക്കേരി: കർണാടകയിലെ കുടക് തടിയൻഡമോൾ മലയിൽ ട്രക്കിംഗിനിടെ കാണാതാവുകയും നാല് ദിവസത്തിന് ശേഷം തിരിച്ചെത്തുകയും ചെയ്ത നാദാപുരം സ്വദേശിനി ശരണ്യയുടെ വെളിപ്പെടുത്തലുകൾക്കെതിരെ ബിജെപി (Sharanya Nadapuram Missing Case). ശരണ്യയുടെ അതിജീവന കഥ വ്യാജമാണെന്നും ഇതിൽ അന്വേഷണം വേണമെന്നും ആവശ്യപ്പെട്ട് ബിജെപി കുടക് റൂറൽ യൂണിറ്റ് കമ്മിറ്റി നാപോക് പോലീസ് സ്റ്റേഷനിൽ പരാതി നൽകി.
ആഹാരമില്ലാതെ നാല് ദിവസം വന്യമൃഗങ്ങളുള്ള കൊടുംവനത്തിൽ കഴിഞ്ഞിട്ടും ശരണ്യയ്ക്ക് കാര്യമായ ശാരീരിക അസ്വസ്ഥതകൾ ഇല്ലാതിരുന്നത് സംശയകരമാണെന്ന് ബിജെപി ആരോപിക്കുന്നു. യുവതിക്കായി പോലീസ്, വനംവകുപ്പ്, നാട്ടുകാർ എന്നിവർ ചേർന്ന് വലിയ തോതിൽ സമയവും പണവും ചെലവഴിച്ചാണ് തിരച്ചിൽ നടത്തിയത്. തിരോധാനം വ്യാജമാണെങ്കിൽ സർക്കാർ സംവിധാനങ്ങളെ തെറ്റിദ്ധരിപ്പിച്ചതിന് നടപടി വേണമെന്നാണ് ബിജെപിയുടെ ആവശ്യം.
പർവ്വതാരോഹകൻ ഷെയ്ഖ് ഹസൻ ഖാൻ ഉൾപ്പെടെയുള്ളവർ ശരണ്യയുടെ കഥയിൽ സംശയം പ്രകടിപ്പിച്ച് രംഗത്തെത്തിയിരുന്നു. കാടിന്റെ ഭീകരത അറിയുന്നവർക്ക് ഈ വെളിപ്പെടുത്തലുകൾ വിശ്വസിക്കാൻ പ്രയാസമാണെന്ന് അദ്ദേഹം ഇൻസ്റ്റാഗ്രാമിലൂടെ പറഞ്ഞു.
ഏപ്രിൽ രണ്ടിനാണ് 12 അംഗ സംഘത്തോടൊപ്പം ഐടി ജീവനക്കാരിയായ ശരണ്യ തടിയൻഡമോൾ മല കയറാൻ പോയത്. മടക്കയാത്രയിൽ സംഘത്തിൽ നിന്ന് വേർപെട്ടുപോയ ശരണ്യയെ ഏപ്രിൽ അഞ്ചിനാണ് ഉൾവനത്തിൽ നിന്ന് കണ്ടെത്തിയത്. വെള്ളം മാത്രം കുടിച്ചാണ് താൻ അതിജീവിച്ചതെന്നായിരുന്നു ശരണ്യ മാധ്യമങ്ങളോട് പറഞ്ഞിരുന്നത്.
നിലവിൽ പരാതിയുടെ അടിസ്ഥാനത്തിൽ പോലീസ് അന്വേഷണം ആരംഭിച്ചിട്ടുണ്ട്. ഇതിനിടെ സോഷ്യൽ മീഡിയയിൽ ശരണ്യയ്ക്കെതിരെ കടുത്ത സൈബർ ആക്രമണവും നടക്കുന്നുണ്ട്. സംഭവത്തിലെ ദുരൂഹത നീക്കാൻ വിശദമായ മൊഴിയെടുക്കാനാണ് പോലീസ് തീരുമാനം.
Story Summary:
The BJP Kodagu Rural Unit has filed a police complaint seeking an investigation into the survival story of Sharanya, an IT professional from Nadapuram who went missing during a trek at Tadiandamol hills. Sharanya was found after four days, claiming she survived only on water. However, the BJP and experts like mountaineer Shaikh Hassan Khan have raised doubts about the lack of physical exhaustion after such an ordeal. The BJP demanded action if the disappearance was staged, citing the waste of government resources during the massive search operation.
