ഏഥൻസ്: കുട്ടികളിലെ അമിതമായ ഉത്കണ്ഠ, ഉറക്കമില്ലായ്മ, സോഷ്യൽ മീഡിയ പ്ലാറ്റ്ഫോമുകളുടെ അടിമപ്പെടുത്തുന്ന സ്വഭാവം എന്നിവ കണക്കിലെടുത്ത് 15 വയസ്സിന് താഴെയുള്ളവർക്ക് സോഷ്യൽ മീഡിയ ഉപയോഗിക്കുന്നതിന് നിരോധനം ഏർപ്പെടുത്തുമെന്ന് ഗ്രീസ് പ്രധാനമന്ത്രി കിരിയാക്കോസ് മിത്സോട്ടാക്കിസ് പ്രഖ്യാപിച്ചു. 2027 ജനുവരി 1 മുതലായിരിക്കും ഈ നിയമം പ്രാബല്യത്തിൽ വരിക. (Greece Social Media Ban Under 15)
മണിക്കൂറുകളോളം സ്ക്രീനിന് മുന്നിൽ ചെലവഴിക്കുന്നത് കുട്ടികളുടെ മനസ്സിന് വിശ്രമം നൽകുന്നില്ലെന്നും, ഓൺലൈൻ കമന്റുകളും മറ്റുള്ളവരുമായുള്ള താരതമ്യവും അവർക്കിടയിൽ വലിയ മാനസിക സമ്മർദ്ദം ഉണ്ടാക്കുന്നുണ്ടെന്നും യുവാക്കൾക്കായി നൽകിയ വീഡിയോ സന്ദേശത്തിൽ പ്രധാനമന്ത്രി പറഞ്ഞു. ഗ്രീസിലെ 80 ശതമാനം രക്ഷിതാക്കളും ഈ തീരുമാനത്തെ അനുകൂലിക്കുന്നതായാണ് ഫെബ്രുവരിയിൽ നടന്ന സർവ്വേ ഫലങ്ങൾ സൂചിപ്പിക്കുന്നത്. സ്കൂളുകളിൽ മൊബൈൽ ഫോൺ ഉപയോഗിക്കുന്നതിന് ഗ്രീസ് നേരത്തെ തന്നെ നിരോധനം ഏർപ്പെടുത്തിയിരുന്നു.
യൂറോപ്യൻ യൂണിയനെ മൊത്തത്തിൽ ഇത്തരമൊരു തീരുമാനത്തിലേക്ക് നയിക്കുകയാണ് തങ്ങളുടെ ലക്ഷ്യമെന്നും ഗ്രീസ് പ്രധാനമന്ത്രി വ്യക്തമാക്കി. ഓസ്ട്രേലിയ കഴിഞ്ഞ വർഷം 16 വയസ്സിന് താഴെയുള്ളവർക്ക് സോഷ്യൽ മീഡിയ നിരോധിച്ചതിന് പിന്നാലെ ബ്രിട്ടൻ, സ്പെയിൻ, ഓസ്ട്രിയ തുടങ്ങിയ രാജ്യങ്ങളും സമാനമായ നടപടികളിലേക്ക് നീങ്ങുകയാണ്.
Summary: Greece has announced a ban on social media for children under the age of 15, starting January 1, 2027. Prime Minister Kyriakos Mitsotakis cited rising anxiety, sleep disorders, and the addictive nature of online platforms as reasons for the decision. While mobile phones are already banned in Greek schools, this new initiative aims to protect teenagers from online pressure. Following Australia’s lead, countries like Britain and Spain are also considering similar bans to safeguard minors.
