കൊച്ചി: അന്തരിച്ച നടൻ കൊല്ലം സുധിയുടെ മകൻ കിച്ചുവും ഭാര്യ രേണു സുധിയും തമ്മിലുള്ള തർക്കം സോഷ്യൽ മീഡിയയിൽ വലിയ ചർച്ചയാകുന്നതിനിടെ പ്രതികരണവുമായി രേണു സുധി രംഗത്ത് (Renu Sudhi Interview). കിച്ചുവിനോട് തനിക്ക് യാതൊരുവിധ പിണക്കവുമില്ലെന്നും ആരോ അവനെ തെറ്റിദ്ധരിപ്പിച്ചതാണെന്നും എയർപോർട്ടിൽ വെച്ച് യൂട്യൂബേഴ്സിനോട് സംസാരിക്കവെ രേണു വ്യക്തമാക്കി.
സുധി ചേട്ടൻ മരിക്കുമ്പോൾ കുറച്ച് കടങ്ങളും കഷ്ടപ്പാടുകളും രണ്ട് മക്കളെയുമാണ് തനിക്ക് തന്നത്. ഒരു സ്വത്തും തന്നിട്ടില്ല. തന്നാലാകുന്ന വിധം രണ്ട് മക്കളെയും നന്നായി നോക്കിയിട്ടുണ്ടെന്നും രേണു പറഞ്ഞു. കിച്ചുവിന് ഇപ്പോൾ 22 വയസ്സായി, അവൻ പ്രായപൂർത്തിയായ ഒരാളാണ്. സ്വന്തമായി അഭിപ്രായങ്ങളും സമ്പാദ്യവും അവനുണ്ട്. ഈ വിവാദങ്ങൾക്ക് പിന്നിൽ ആരെങ്കിലും അവനെ മാനിപുലേറ്റ് (Manipulate) ചെയ്തതായി തനിക്ക് അറിയാം. റീച്ചിന് വേണ്ടി പലരും പലതും ചെയ്യുന്നുണ്ടാകാം.
കിച്ചുവിനെ വീട്ടിൽ കയറ്റില്ലെന്ന് താൻ ഒരിക്കലും പറഞ്ഞിട്ടില്ല. രണ്ട് മക്കളും സുധി ചേട്ടന്റെ രക്തമാണ്, അതുകൊണ്ട് തന്നെ തനിക്ക് അവരെ തള്ളിപ്പറയാനാകില്ല. കിച്ചുവിനെ ഇന്നേവരെ തല്ലിയിട്ടില്ലെന്നും, സ്കൂളിൽ പോകാതെ ഷൂട്ടിംഗിന് പോകുന്ന കാര്യത്തിന് സുധി ചേട്ടനോടാണ് താൻ വഴക്കിട്ടിട്ടുള്ളതെന്നും രേണു വെളിപ്പെടുത്തി.
സുധി ചേട്ടൻ മരിച്ച ദിവസം താൻ പച്ചവെള്ളം പോലും കുടിച്ചിട്ടില്ല. ഫൈവ് സ്റ്റാർ ഹോട്ടലിൽ ആര് ഭക്ഷണം കഴിച്ചു എന്നതിനെക്കുറിച്ച് കിച്ചുവിനോട് തന്നെ ചോദിക്കണം. ആ സമയത്ത് തന്റെ പിതാവും ആശുപത്രിയിലായിരുന്നു.
വിവാദങ്ങൾക്ക് ശേഷം കിച്ചു തന്നെ വിളിച്ചിട്ടില്ല. എന്നാൽ ആറ് വയസ്സുകാരനായ തന്റെ ചെറിയ മകൻ റിതപ്പന് വേണ്ടി തനിക്ക് ജീവിച്ചേ മതിയാകൂ. തന്റെ യൂട്യൂബ് ചാനൽ സബ്സ്ക്രിപ്ഷൻ നിർത്താൻ ഉദ്ദേശിക്കുന്നില്ലെന്നും വരുമാനം വരുന്ന വഴി ആരെങ്കിലും വേണ്ടെന്ന് വെക്കുമോ എന്നും രേണു ചോദിച്ചു.
Story Summary:
Renu Sudhi, wife of the late actor Kollam Sudhi, has clarified that she holds no grudge against Sudhi’s elder son, Kichu. Speaking to YouTubers at the airport, Renu claimed that Kichu might have been misled or manipulated by others for social media reach. She emphasized that she has raised both children to the best of her ability despite financial struggles. Renu added that she still considers Kichu as her own son and needs to move forward with her life for the sake of her younger son, Rithappan.
