തിരുവനന്തപുരം: കേരള നിയമസഭാ തിരഞ്ഞെടുപ്പിനുള്ള ബിജെപിയുടെ പ്രകടനപത്രിക ഏറെ ആവേശത്തോടെയാണ് പ്രവർത്തകർ സ്വീകരിച്ചത് (BJP Kerala Manifesto 2026). “വികസിത കേരളം” എന്ന കാഴ്ചപ്പാട് മുന്നോട്ട് വെക്കുന്ന പത്രികയിൽ അടിസ്ഥാന ആവശ്യങ്ങൾക്കും കുടുംബങ്ങളുടെ സാമ്പത്തിക സുരക്ഷയ്ക്കും മുൻഗണന നൽകുന്നതാണ് ബിജെപിയുടെ പ്രകടനപത്രിക. ഏപ്രിൽ 9-ന് വോട്ടെടുപ്പും മെയ് 4-ന് വോട്ടെണ്ണലും നടക്കാനിരിക്കെയാണ് വോട്ടർമാരെ ആകർഷിക്കുന്ന വാഗ്ദാനങ്ങളുമായി ബിജെപി രംഗത്തെത്തിയത്.
സ്ത്രീ ശാക്തീകരണവും സാമ്പത്തിക സഹായവും: ഭക്ഷ്യ-ആരോഗ്യ സുരക്ഷാ കാർഡ് വഴി സ്ത്രീകൾക്ക് എല്ലാ മാസവും 2,500 രൂപ ലഭ്യമാക്കും. ബിപിഎൽ കുടുംബങ്ങൾക്ക് പ്രതിവർഷം 30,000 രൂപ ഇതിലൂടെ ഉറപ്പാക്കും.ദരിദ്രരായ വനിതകൾ, വിധവകൾ, 70 വയസ്സിന് മുകളിലുള്ള മുതിർന്ന പൗരന്മാർ എന്നിവർക്ക് പ്രതിമാസം 3,000 രൂപ പെൻഷൻ നൽകും-തുടങ്ങിയവയാണ് പത്രികയിലെ പ്രധാന വാഗ്ദാനങ്ങൾ.ഓരോ വീടിനും പ്രതിമാസം 20,000 ലിറ്റർ വരെ സൗജന്യ വെള്ളം. ഗാർഹിക വൈദ്യുതിക്ക് പ്രത്യേക സബ്സിഡി. കൂടാതെ പാവപ്പെട്ട കുടുംബങ്ങൾക്ക് വർഷത്തിൽ രണ്ട് പാചകവാതക സിലിണ്ടറുകൾ (ഓണം, ക്രിസ്മസ് കാലയളവിൽ) സൗജന്യമായി നൽകും.
എല്ലാ മലയാളികൾക്കും ആയുഷ്മാൻ ഭാരത് പദ്ധതി ലഭ്യമാക്കും. കേരളത്തിൽ ലോകോത്തര നിലവാരമുള്ള എയിംസ് (AIIMS) സ്ഥാപിക്കുമെന്നും ബിജെപി വാഗ്ദാനം ചെയ്യുന്നു. തിരുവനന്തപുരത്ത് നിന്ന് കണ്ണൂരിലേക്ക് അതിവേഗ റെയിൽവേ ഇടനാഴി സ്ഥാപിക്കുന്നത് പ്രകടനപത്രികയിലെ പ്രധാന വാഗ്ദാനമാണ്. ഇത് യാത്രാ സമയം കുറയ്ക്കാനും വ്യാപാര-ടൂറിസം മേഖലകളിൽ പുതിയ തൊഴിലവസരങ്ങൾ സൃഷ്ടിക്കാനും സഹായിക്കുമെന്ന് ബിജെപി അവകാശപ്പെടുന്നു.
ശബരിമല, ഗുരുവായൂർ തുടങ്ങിയ ക്ഷേത്രങ്ങളുടെ നടത്തിപ്പിൽ ഭക്തർക്ക് കൂടുതൽ പങ്കാളിത്തം ഉറപ്പാക്കും. ശബരിമല വികസനത്തിനായി പ്രത്യേക ദൗത്യം നടപ്പിലാക്കും. കൂടാതെ, ശബരിമലയിലെ സ്വർണ്ണ മോഷണക്കേസിൽ സമയബന്ധിതമായ സിബിഐ അന്വേഷണം നടത്തുമെന്നും പ്രകടനപത്രികയിൽ പറയുന്നു.
ഓരോ കുടുംബത്തിനും അന്തസ്സും സുരക്ഷയും ഉറപ്പാക്കി കേരളത്തെ വികസനത്തിന്റെ പുതിയ പാതയിലേക്ക് നയിക്കുകയാണ് ലക്ഷ്യമെന്ന് ബിജെപി നേതൃത്വം വ്യക്തമാക്കി. ത്രികോണ മത്സരം ശക്തമായ കഴക്കൂട്ടം ഉൾപ്പെടെയുള്ള മണ്ഡലങ്ങളിൽ ഈ വാഗ്ദാനങ്ങൾ വലിയ ചർച്ചകൾക്ക് വഴിവെക്കും.
Story Summary:
The BJP released its manifesto for the 2026 Kerala Assembly Elections, titled “Vikasitha Keralam.” Key promises include a monthly financial aid of ₹2,500 for women via food-health security cards, a ₹3,000 monthly pension for senior citizens and widows, and 20,000 liters of free water per household. The manifesto also guarantees the establishment of an AIIMS, a high-speed railway corridor from Thiruvananthapuram to Kannur, and a CBI probe into the Sabarimala gold theft case.
