ലഖ്നൗ: ഉത്തർപ്രദേശിലെ മഹാരാജ്ഗഞ്ചിൽ വീട്ടുകാരുടെ എതിർപ്പിനെത്തുടർന്ന് യുവാവും യുവതിയും ട്രെയിനിന് മുന്നിൽ ചാടി ആത്മഹത്യ ചെയ്തു. ബുധനാഴ്ച ഭഗീരഥ് റെയിൽവേ സ്റ്റേഷന് സമീപമാണ് സംഭവം. പരസ്പരം കൈകൾ കോർത്തുപിടിച്ചാണ് ഇരുവരും ട്രെയിനിന് മുന്നിലേക്ക് ചാടിയതെന്ന് ദൃക്സാക്ഷികൾ പറഞ്ഞതായി പോലീസ് അറിയിച്ചു.(Families opposed marriage, In Uttar Pradesh, lovers committed suicide by jumping in front of a train)
നൗതൻവ-ഗോരഖ്പൂർ ഇന്റർസിറ്റി എക്സ്പ്രസിന് മുന്നിലേക്കാണ് ഇരുപതുകളിലായിരുന്ന യുവാവും യുവതിയും ചാടിയത്. ദീർഘനാളായി പ്രണയത്തിലായിരുന്ന ഇവരുടെ വിവാഹത്തിന് വീട്ടുകാർ സമ്മതം മൂളിയിരുന്നില്ല. ഈ എതിർപ്പിനെത്തുടർന്നുള്ള മാനസിക വിഷമമാണ് ഇത്തരമൊരു കടുംകൈ ചെയ്യാൻ ഇവരെ പ്രേരിപ്പിച്ചതെന്ന് നൗതൻവ എസ്.എച്ച്.ഒ പുരുഷോത്തം റാവു പറഞ്ഞു.
സംഭവസ്ഥലത്തെത്തിയ പോലീസ് മൃതദേഹങ്ങൾ പോസ്റ്റ്മോർട്ടത്തിന് അയച്ചു. നടപടിക്രമങ്ങൾക്ക് ശേഷം മൃതദേഹങ്ങൾ ബന്ധുക്കൾക്ക് വിട്ടുനൽകി. സംഭവത്തിൽ പോലീസ് കൂടുതൽ അന്വേഷണം നടത്തിവരികയാണ്.
