ന്യൂഡൽഹി: സാമ്പത്തിക ക്രമീകരണങ്ങളിലും നികുതി വ്യവസ്ഥകളിലും വലിയ അഴിച്ചുപണികളുമായാണ് 2026 ഏപ്രിൽ 1 പിറക്കുന്നത് (Income Tax Act 2025). ആദായനികുതി നിയമം പരിഷ്കരിച്ചതും ബാങ്കിങ് നിരക്കുകളിൽ വന്ന മാറ്റങ്ങളും ഓരോ പൗരനും അറിഞ്ഞിരിക്കേണ്ടതാണ്.
1. പുതിയ ആദായനികുതി നിയമം (Income Tax Act 2025)
പതിറ്റാണ്ടുകൾ പഴക്കമുള്ള 1961-ലെ നിയമത്തിന് പകരം ലളിതമായ ഭാഷയിലുള്ള ‘ഇൻകം ടാക്സ് ആക്ട് 2025’ നിലവിൽ വരും. സെക്ഷനുകളുടെ എണ്ണം 819-ൽ നിന്ന് 536 ആയി കുറഞ്ഞു. ‘അസസ്മെന്റ് ഇയർ’ എന്നതിന് പകരം ഇനി മുതൽ ‘ടാക്സ് ഇയർ’ എന്ന പദമാകും ഔദ്യോഗികമായി ഉപയോഗിക്കുക.
2. 12 ലക്ഷം രൂപ വരെ നികുതിയില്ല
പുതിയ നികുതി വ്യവസ്ഥ (New Tax Regime) തിരഞ്ഞെടുക്കുന്നവർക്ക് 12 ലക്ഷം രൂപ വരെയുള്ള വാർഷിക വരുമാനത്തിന് നികുതി നൽകേണ്ടതില്ല. സെക്ഷൻ 87A പ്രകാരമുള്ള റിബേറ്റ് 60,000 രൂപയായി വർധിപ്പിച്ചതാണ് ഇതിന് കാരണം. ശമ്പളക്കാരുടെ സ്റ്റാൻഡേർഡ് ഡിഡക്ഷൻ 75,000 രൂപയായി ഉയർത്തിയതോടെ ഫലത്തിൽ 12.75 ലക്ഷം രൂപ വരെ വരുമാനമുള്ളവർക്ക് നികുതിഭാരം ഒഴിവായി.
3. ടി.ഡി.എസ് (TDS) ഫോമുകളിൽ മാറ്റം
നികുതി ഫോമുകളുടെ പേര് മാറുന്നത് ശ്രദ്ധിക്കണം:
ഫോം 16 (ശമ്പള സർട്ടിഫിക്കറ്റ്) ഇനി മുതൽ ‘ഫോം 130’ ആയി മാറും.
ഫോം 16A (ശമ്പളേതര വരുമാനം) ഇനി മുതൽ ‘ഫോം 131’ എന്ന പേരിലാകും അറിയപ്പെടുക.
4. പാൻ കാർഡിന് കർശന നിയന്ത്രണം
പുതിയ പാൻ കാർഡിന് അപേക്ഷിക്കുമ്പോൾ ജനനത്തീയതി തെളിയിക്കാൻ ആധാർ കാർഡ് മാത്രം മതിയാകില്ല. പത്താം ക്ലാസ് സർട്ടിഫിക്കറ്റ്, പാസ്പോർട്ട് അല്ലെങ്കിൽ ബർത്ത് സർട്ടിഫിക്കറ്റ് എന്നിവയിലേതെങ്കിലും രേഖയായി സമർപ്പിക്കണം.
5. ഗോൾഡ് ബോണ്ട് നികുതി
റിസർവ് ബാങ്ക് വഴി നേരിട്ട് (Primary Issuance) വാങ്ങുന്ന ഗോൾഡ് ബോണ്ടുകൾക്ക് മാത്രമേ കാലാവധി പൂർത്തിയാകുമ്പോൾ നികുതി ഇളവ് ലഭിക്കൂ. സ്റ്റോക്ക് എക്സ്ചേഞ്ച് വഴി വാങ്ങുന്ന ബോണ്ടുകളുടെ ലാഭത്തിന് (Capital Gains) ഇനി മുതൽ നികുതി നൽകേണ്ടി വരും.
6. വിദേശയാത്ര ചിലവേറും
വിദേശ ടൂർ പാക്കേജുകൾക്ക് തുക എത്രയായാലും 2% ഫ്ലാറ്റ് ടി.സി.എസ് (TCS) ബാധകമാകും. പഴയ സ്ലാബ് സമ്പ്രദായം നിർത്തലാക്കി. എന്നാൽ വിദേശത്തെ ചികിത്സയ്ക്കും വിദ്യാഭ്യാസത്തിനും 10 ലക്ഷം രൂപയിൽ കൂടുതലുള്ള തുകയ്ക്ക് മാത്രമാണ് ഈ നിരക്ക് ബാധകം.
7. ബാങ്കിങ് നിയമങ്ങൾ
എച്ച്.ഡി.എഫ്.സി ബാങ്ക്: യു.പി.ഐ വഴി എ.ടി.എമ്മിൽ നിന്ന് പണം പിൻവലിക്കുന്നതും ഇനി മുതൽ മാസത്തിലെ നിശ്ചിത സൗജന്യ പരിധിയിൽ ഉൾപ്പെടുത്തും. പരിധി കഴിഞ്ഞാൽ ഓരോ തവണയും 23 രൂപ അധികം നൽകണം.
ബന്ധൻ ബാങ്ക്: മെട്രോ നഗരങ്ങളിൽ 3 തവണയും അല്ലാത്തയിടങ്ങളിൽ 5 തവണയും മാത്രമേ സൗജന്യമായി പണം പിൻവലിക്കാനാകൂ.
8. ഐ.ടി.ആർ (ITR) തിരുത്താൻ കൂടുതൽ സമയം
ആദായനികുതി റിട്ടേണിൽ തിരുത്തലുകൾ വരുത്താൻ ഇനി 12 മാസം വരെ സമയം ലഭിക്കും. എന്നാൽ ആദ്യ 9 മാസത്തിന് ശേഷം റിട്ടേൺ പുതുക്കി നൽകിയാൽ പിഴ അടയ്ക്കേണ്ടി വരും.
Story Summary:
Starting April 1, 2026, India transitions to the new Income Tax Act 2025, introducing simplified forms (Form 130 and 131) and a zero-tax limit of ₹12 lakh under the new regime. Key changes include stricter PAN card documentation, a 2% flat TCS on foreign tours, and new ATM withdrawal charges for HDFC and Bandhan Bank customers.
