ബീജിങ്: ചൈനയിലെ ചോങ്കിങ് മുൻസിപ്പാലിറ്റിയിൽ നിർമ്മാണത്തിലിരുന്ന ദേശീയപാത തുരങ്കത്തിലുണ്ടായ ശക്തമായ സ്ഫോടനത്തിൽ നാല് തൊഴിലാളികൾ കൊല്ലപ്പെട്ടു (China Tunnel Explosion). പരിക്കേറ്റ ഒമ്പത് പേർ വിവിധ ആശുപത്രികളിൽ ചികിത്സയിലാണ്. ഹുബെയ്, സിചുവാൻ പ്രവിശ്യകളെ തമ്മിൽ ബന്ധിപ്പിക്കുന്ന ഹൈവേയുടെ നിർമ്മാണത്തിനിടെ തിങ്കളാഴ്ച ഉച്ചയോടെയാണ് അപകടമുണ്ടായത്.
തുരങ്കം തുരക്കുന്നതിനിടെ പാറക്കെട്ടുകൾക്കിടയിൽ നിന്ന് പുറത്തുവന്ന മീഥേൻ പോലുള്ള ജ്വലന വാതകങ്ങൾ വായുസഞ്ചാരമില്ലാത്ത ഭാഗങ്ങളിൽ കുടുങ്ങിക്കിടന്നതാണ് സ്ഫോടനത്തിന് കാരണമായതെന്നാണ് പ്രാഥമിക നിഗമനം. സ്ഫോടനത്തെത്തുടർന്ന് ഒരാളെ കാണാതാവുകയും പന്ത്രണ്ടോളം പേർക്ക് പരിക്കേൽക്കുകയും ചെയ്തിരുന്നു. ചൊവ്വാഴ്ച നടത്തിയ തിരച്ചിലിൽ കാണാതായ വ്യക്തിയുടെ മൃതദേഹം കണ്ടെത്തുകയായിരുന്നു. ചികിത്സയിലിരുന്ന മൂന്ന് പേർ കൂടി മരണത്തിന് കീഴടങ്ങിയതോടെയാണ് ആകെ മരണം നാലായി ഉയർന്നത്.
സംഭവത്തിൽ ചൈനീസ് ഭരണകൂടം ഉന്നതതല അന്വേഷണത്തിന് ഉത്തരവിട്ടു. വാഞ്ചോ ഡിസ്ട്രിക്റ്റ് ട്രാൻസ്പോർട്ട് കമ്മീഷനും ഔദ്യോഗിക വാർത്താ ഏജൻസിയായ സിൻഹുവയുമാണ് വിവരങ്ങൾ സ്ഥിരീകരിച്ചത്. നിർമ്മാണ വേളയിൽ പാലിക്കേണ്ട സുരക്ഷാ മാനദണ്ഡങ്ങളിൽ വീഴ്ച പറ്റിയിട്ടുണ്ടോ എന്ന് പരിശോധിക്കും. നിലവിൽ അപകടം നടന്ന പ്രദേശം അധികൃതർ സീൽ ചെയ്തിരിക്കുകയാണ്.
അതിവേഗത്തിലുള്ള അടിസ്ഥാന സൗകര്യ വികസനം ചൈനയിൽ നടക്കുന്നുണ്ടെങ്കിലും, ഉൾനാടൻ മേഖലകളിലെ നിർമ്മാണ സ്ഥലങ്ങളിൽ സുരക്ഷാ വീഴ്ചകൾ പതിവാകുന്നത് വലിയ വിമർശനങ്ങൾക്ക് ഇടയാക്കുന്നുണ്ട്. കഴിഞ്ഞ വർഷങ്ങളിലും സമാനമായ രീതിയിൽ ഖനികളിലും തുരങ്കങ്ങളിലും വാതക സ്ഫോടനങ്ങൾ റിപ്പോർട്ട് ചെയ്യപ്പെട്ടിരുന്നു. നിയമങ്ങൾ കടുപ്പിച്ചിട്ടുണ്ടെങ്കിലും ഭൂമിശാസ്ത്രപരമായ വെല്ലുവിളികൾ അപകടസാധ്യത വർദ്ധിപ്പിക്കുന്നു.
Story Summary:
A gas explosion in an under-construction highway tunnel in China’s Chongqing municipality has claimed four lives and left nine others injured. Preliminary reports suggest that combustible gases like methane trapped during drilling caused the blast. Authorities have sealed the site and ordered a high-level probe into potential safety violations.
