തിരുവനന്തപുരം: കേന്ദ്രം ഭരിക്കുന്ന പാർട്ടിയുടെ ഓഫീസ് സീൽ പതിപ്പിച്ച സർക്കുലർ വിതരണം ചെയ്ത സംഭവത്തിൽ വിമർശനം ഉന്നയിച്ചവർക്കെതിരെ പോലീസ് നടപടി സ്വീകരിക്കുന്നതിനെ മുഖ്യമന്ത്രി പിണറായി വിജയൻ അപലപിച്ചു (Pinarayi Vijayan Letter to Kerala CEO). കമ്മീഷന്റെ ആവശ്യപ്രകാരമാണ് പോലീസ് നോട്ടീസ് അയച്ചതെന്നാണ് കരുതുന്നതെന്ന് അദ്ദേഹം കത്തിൽ ചൂണ്ടിക്കാട്ടി. ജനാധിപത്യ രാജ്യത്ത് ഇത്തരം ഗുരുതരമായ വീഴ്ചകൾ പൊതുജനമധ്യത്തിൽ വിമർശനത്തിന് വഴിവെക്കുന്നത് സ്വാഭാവികമാണെന്നും അദ്ദേഹം ഓർമ്മിപ്പിച്ചു.
വിമർശനങ്ങൾ മാന്യതയുടെ അതിർവരമ്പുകൾ ലംഘിക്കാത്ത കാലത്തോളം അവയെ അഭിപ്രായ പ്രകടനങ്ങളായി മാത്രമേ കാണാവൂ. ഭരണഘടനാ സ്ഥാപനങ്ങളെ വിമർശിക്കുന്നത് കുറ്റകരമായി കാണുന്നത് ജനാധിപത്യ വിരുദ്ധമാണ്- മുഖ്യമന്ത്രി പറഞ്ഞു. തിരഞ്ഞെടുപ്പ് കമ്മീഷൻ പോലെയുള്ള ഒരു ഉന്നത സ്ഥാപനത്തിന്റെ ബഹുമാന്യത നിലനിർത്താൻ ഉദ്യോഗസ്ഥരുടെ ഭാഗത്തുനിന്ന് സമ്പൂർണ്ണമായ രാഷ്ട്രീയ നിഷ്പക്ഷത ഉണ്ടാകണം. നിഷ്പക്ഷമായി പ്രവർത്തിച്ചാൽ മാത്രമേ കമ്മീഷന് അർഹമായ ബഹുമാനം ലഭിക്കൂ.ഒരു രാഷ്ട്രീയ പാർട്ടിയുടെ സീൽ പതിപ്പിച്ച സർക്കുലർ പുറത്തുപോയത് വെറുമൊരു ഉദ്യോഗസ്ഥന്റെ പിഴവായി കണ്ട് നിസ്സാരവൽക്കരിക്കാൻ കഴിയില്ല. മുതിർന്ന ഉദ്യോഗസ്ഥർ പരിശോധിക്കാതെ ഇത്തരമൊരു ആശയവിനിമയം നടന്നത് യാദൃശ്ചികമായ വീഴ്ചയാണെന്ന് കരുതാനാകില്ല-അദ്ദേഹം കൂട്ടിച്ചേർത്തു.
വിഷയത്തിൽ തിരഞ്ഞെടുപ്പ് കമ്മീഷൻ തലത്തിൽ അന്വേഷണം ഉണ്ടാകുമെന്ന് കേരള സിഇഒ വ്യക്തമാക്കിയിട്ടുണ്ട്. ഈ അന്വേഷണത്തിന്റെ കണ്ടെത്തലുകൾ രാഷ്ട്രീയ പാർട്ടികളെയും പൊതുസമൂഹത്തെയും അറിയിക്കണമെന്നും മുഖ്യമന്ത്രി ആവശ്യപ്പെട്ടു. തിരഞ്ഞെടുപ്പ് പ്രക്രിയയുടെ സുതാര്യത ഉറപ്പാക്കാൻ ഇത്തരം വീഴ്ചകൾക്ക് കാരണക്കാരായവർക്കെതിരെ കർശന നടപടി വേണമെന്നും അദ്ദേഹം കത്തിൽ കുറിച്ചു.
Short Story Summary:
Kerala CM Pinarayi Vijayan has condemned the action taken against those who criticized the Election Commission for distributing a circular with the seal of the central ruling party. In a letter to the CEO, the CM emphasized that the Commission must remain politically neutral to uphold its dignity and that criticism in a democracy should be viewed as freedom of expression. He demanded a transparent investigation and public disclosure of the findings regarding this serious lapse.
