ലണ്ടനിലെ ഗോൾഡേഴ്സ് ഗ്രീനിൽ ജൂത സന്നദ്ധ സംഘടനയുടെ നാല് ആംബുലൻസുകൾ തിങ്കളാഴ്ച പുലർച്ചെ സാമൂഹിക വിരുദ്ധർ തീയിട്ടു നശിപ്പിച്ചു (London Jewish Ambulance Fire). ജൂത സമൂഹത്തിന് അടിയന്തര വൈദ്യസഹായം നൽകുന്ന ‘ഹത്സോല നോർത്ത് വെസ്റ്റ്’ (Hatzola Northwest) എന്ന സംഘടനയുടെ വാഹനങ്ങളാണ് ആക്രമിക്കപ്പെട്ടത്. സംഭവത്തെ അങ്ങേയറ്റം ഞെട്ടിക്കുന്ന വിദ്വേഷ ആക്രമണമെന്ന് വിശേഷിപ്പിച്ച ബ്രിട്ടീഷ് പ്രധാനമന്ത്രി കെയർ സ്റ്റാർമർ ഇതിനെ കടുത്ത ഭാഷയിൽ അപലപിച്ചു. നമ്മുടെ സമൂഹത്തിൽ ജൂതവിരുദ്ധതയ്ക്ക് സ്ഥാനമില്ലെന്നും അദ്ദേഹം കൂട്ടിച്ചേർത്തു.
ആംബുലൻസുകളിലെ ഗ്യാസ് സിലിണ്ടറുകൾ സ്ഫോടനത്തോടെ പൊട്ടിത്തെറിച്ചതിനെത്തുടർന്ന് സമീപത്തെ അപ്പാർട്ട്മെന്റ് ബ്ലോക്കിന്റെ ജനൽ ചില്ലകൾ തകർന്നു. സ്ഫോടനശബ്ദം കേട്ട് പരിഭ്രാന്തരായ പ്രദേശവാസികളെ മുൻകരുതൽ നടപടിയായി സ്ഥലത്തുനിന്ന് ഒഴിപ്പിച്ചു. തീ പിന്നീട് നിയന്ത്രണവിധേയമാക്കിയെന്നും സംഭവത്തിൽ ആർക്കും പരിക്കേറ്റിട്ടില്ലെന്നും മെട്രോപൊളിറ്റൻ പോലീസ് അറിയിച്ചു. സംഭവവുമായി ബന്ധപ്പെട്ട് മൂന്ന് സംശയാസ്പദമായ വ്യക്തികളെ പോലീസ് തിരഞ്ഞുവരികയാണ്.
പ്രാദേശിക ജൂത സമൂഹത്തിന് അത്യാവശ്യമായ ജീവൻരക്ഷാ സേവനം നൽകുന്ന വാഹനങ്ങൾ തിരഞ്ഞുപിടിച്ച് ആക്രമിച്ചത് വലിയ ആശങ്കയാണ് ഉയർത്തുന്നത്. ഇത് കേവലം ഒരു ക്രിമിനൽ കുറ്റമല്ലെന്നും ആസൂത്രിതമായ നീക്കമാണെന്നും സന്നദ്ധ സംഘടനകൾ ആരോപിച്ചു. ഇസ്രായേൽ-ഹമാസ് യുദ്ധം ആരംഭിച്ചതിന് ശേഷം ബ്രിട്ടനിൽ ജൂതവിരുദ്ധ ആക്രമണങ്ങളിൽ വലിയ വർദ്ധനവാണ് രേഖപ്പെടുത്തിയിരിക്കുന്നത്. 2022-ൽ 1,662 കേസുകൾ റിപ്പോർട്ട് ചെയ്ത സ്ഥാനത്ത് 2025-ൽ ഇത് 3,700 ആയി ഉയർന്നിട്ടുണ്ട്.
കഴിഞ്ഞ ഒക്ടോബറിൽ മാഞ്ചസ്റ്ററിലെ സിനഗോഗിന് പുറത്ത് നടന്ന ആക്രമണത്തിൽ ഒരാൾ കൊല്ലപ്പെട്ട സംഭവം നിലനിൽക്കുന്ന സാഹചര്യത്തിൽ ലണ്ടനിലെ പുതിയ ആക്രമണത്തെ ഗൗരവത്തോടെയാണ് അധികൃതർ കാണുന്നത്. വിദ്വേഷം പടർത്തുന്നവർക്കെതിരെ ശക്തമായ നടപടി സ്വീകരിക്കുമെന്ന് സർക്കാർ ഉറപ്പുനൽകി. പ്രതികളെ നിയമത്തിന് മുന്നിൽ കൊണ്ടുവരുന്നതിനായി പോലീസ് അന്വേഷണം ഊർജ്ജിതമാക്കിയിട്ടുണ്ട്.
Summary: Four ambulances belonging to the Jewish charity Hatzola Northwest were set on fire in London’s Golders Green in a suspected antisemitic hate crime. UK PM Keir Starmer condemned the arson attack, which caused gas cylinders to explode and damage nearby buildings. Police are searching for three suspects as antisemitic incidents continue to rise in the UK.
