ലോസ് ഏഞ്ചൽസ്: മികച്ച നടനുള്ള ഓസ്കാർ പുരസ്കാര പട്ടികയിൽ മുൻനിരയിലുണ്ടായിരുന്ന തിമോത്തി ഷാലമേയ്ക്ക് തിരിച്ചടിയായി താരത്തിന്റെ പുതിയ വിവാദ പരാമർശം (Timothee Chalamet Oscar Best Actor Chances). ‘മാർട്ടി സുപ്രീം’ എന്ന ചിത്രത്തിലെ പ്രകടനത്തിലൂടെ പുരസ്കാരം നേടുമെന്ന് കരുതിയിരുന്ന ഷാലമേ, ഓപ്പറ, ബാലെ എന്നീ കലാരൂപങ്ങളെക്കുറിച്ച് നടത്തിയ പരാമർശമാണ് അക്കാദമി അംഗങ്ങളെ ചൊടിപ്പിച്ചിരിക്കുന്നത്. ഇതോടെ താരത്തിന് ഓസ്കാർ ലഭിക്കാനുള്ള സാധ്യത മങ്ങുകയാണെന്ന് അക്കാദമി ഓഫ് മോഷൻ പിക്ചർ ആർട്സ് ആൻഡ് സയൻസസ് അംഗത്തെ ഉദ്ധരിച്ച് പുറത്തുവരുന്ന റിപ്പോർട്ടുകൾ സൂചിപ്പിക്കുന്നു.
തന്റെ പുതിയ ചിത്രത്തിന്റെ പ്രചരണാർത്ഥം നടന്ന ഒരു ചർച്ചയ്ക്കിടെയാണ് ഷാലമേ വിവാദമായ പ്രസ്താവന നടത്തിയത്. “എനിക്ക് ബാലെയിലോ ഓപ്പറയിലോ ജോലി ചെയ്യാൻ താല്പര്യമില്ല. ആരും ശ്രദ്ധിക്കാത്ത ഇത്തരം കാര്യങ്ങൾ നിലനിർത്താൻ ശ്രമിക്കുന്നത് പോലെയാണത്,” എന്നായിരുന്നു താരത്തിന്റെ വാക്കുകൾ. തുടർന്ന് ഇതിൽ മാപ്പ് പറഞ്ഞുവെങ്കിലും അക്കാദമി അംഗങ്ങൾക്കിടയിൽ ഇത് വലിയ അതൃപ്തി ഉണ്ടാക്കിയിട്ടുണ്ട്. ഒരു കലാകാരൻ മറ്റ് കലാരൂപങ്ങളെ പരിഹസിക്കുന്നത് അംഗീകരിക്കാനാവില്ലെന്നാണ് വോട്ടർമാരുടെ പക്ഷം.
വിവാദ പ്രസ്താവനയ്ക്ക് പുറമെ, പ്രശസ്ത മോഡലും സോഷ്യൽ മീഡിയ ഇൻഫ്ലുൻസറായ കൈലി ജെന്നറുമായുള്ള താരത്തിന്റെ ബന്ധവും ഓസ്കാർ വോട്ടർമാരുടെ കാഴ്ചപ്പാടിൽ മാറ്റം വരുത്തിയതായി റിപ്പോർട്ടുകൾ പറയുന്നു. ഒരു പ്രമുഖ ഓസ്കാർ നോമിനി കാർദാഷിയാൻ കുടുംബത്തിൽ നിന്നുള്ള ഒരാളുമായി പൊതുവേദികളിൽ പ്രത്യക്ഷപ്പെടുന്നത് ഗൗരവമേറിയ വോട്ടർമാർക്കിടയിൽ താരത്തിന്റെ പ്രതിച്ഛായയെ ബാധിച്ചിട്ടുണ്ടെന്ന് അക്കാദമി ഇൻസൈഡർ വെളിപ്പെടുത്തി. ഇത് പ്രകടനത്തെക്കാൾ ഉപരി താരത്തിന്റെ സ്വകാര്യ ജീവിതത്തിലേക്ക് കൂടുതൽ ശ്രദ്ധ ആകർഷിക്കാൻ കാരണമായി.
Summary: Hollywood actor Timothée Chalamet is reportedly facing a tough road to winning the Best Actor Oscar for his role in Marty Supreme following controversial remarks about opera and ballet.
