ന്യൂഡൽഹി: ലോക്സഭാ സ്പീക്കർ ഓം ബിർളയെ പദവിയിൽ നിന്ന് നീക്കം ചെയ്യണമെന്നാവശ്യപ്പെട്ട് പ്രതിപക്ഷം കൊണ്ടുവന്ന അവിശ്വാസ പ്രമേയം ലോക്സഭ ശബ്ദവോട്ടോടെ തള്ളി (No-confidence motion Om Birla). ബുധനാഴ്ച സഭയിൽ നടന്ന നാടകീയമായ നീക്കങ്ങൾക്കും പ്രതിപക്ഷ പ്രതിഷേധങ്ങൾക്കും ഒടുവിലാണ് പ്രമേയം പരാജയപ്പെട്ടത്. നാല് പതിറ്റാണ്ടിന് ശേഷമാണ് ഇന്ത്യൻ പാർലമെന്റിൽ സ്പീക്കർക്കെതിരെ ഇത്തരമൊരു പ്രമേയം വരുന്നത്. പ്രമേയത്തിന്മേലുള്ള ചർച്ചയ്ക്ക് മറുപടി നൽകവേ കേന്ദ്ര ആഭ്യന്തര മന്ത്രി അമിത് ഷാ പ്രതിപക്ഷത്തെ രൂക്ഷമായി കടന്നാക്രമിച്ചു. സ്പീക്കർക്കെതിരായ നീക്കം പാർലമെന്ററി രാഷ്ട്രീയത്തിൽ അങ്ങേയറ്റം ഖേദകരമാണെന്ന് അദ്ദേഹം പറഞ്ഞു.
കഴിഞ്ഞ 75 വർഷത്തിനിടെ മൂന്ന് തവണ മാത്രമാണ് സ്പീക്കർക്കെതിരെ പ്രമേയം വന്നിട്ടുള്ളതെന്ന് അദ്ദേഹം ഓർമ്മിപ്പിച്ചു. സ്പീക്കർ ഭരണപക്ഷത്തിന്റെയും പ്രതിപക്ഷത്തിന്റെയും നിഷ്പക്ഷനായ സംരക്ഷകനാണെന്നും സഭ നടക്കേണ്ടത് ചട്ടങ്ങൾ അനുസരിച്ചാണെന്നും അമിത് ഷാ വ്യക്തമാക്കി. സ്പീക്കർ പക്ഷപാതപരമായാണ് പെരുമാറുന്നതെന്ന് പ്രതിപക്ഷ അംഗങ്ങൾ ആരോപിച്ചു.
അതേസമയം , ഒരൊറ്റ ദിവസം കൊണ്ട് 140-ലധികം എം.പിമാരെ സസ്പെൻഡ് ചെയ്ത നടപടി ജനാധിപത്യത്തിലെ ‘കറുത്ത ദിന’മാണെന്ന് ആർ.ജെ.ഡി എം.പി അഭയ് കുമാർ സിൻഹ പറഞ്ഞു. പ്രതിപക്ഷം സംസാരിക്കുമ്പോൾ ക്യാമറകൾ മാറ്റുന്നുവെന്നും പ്രസംഗങ്ങൾ തടസ്സപ്പെടുത്തുന്നുവെന്നും ജെ.എം.എം എം.പി വിജയ് കുമാർ ഹാൻസ്ദക് പരാതിപ്പെട്ടു.
സ്പീക്കറുടെ പ്രവർത്തനം ഒരു വശത്തേക്ക് മാത്രം കാറ്റ് നൽകുന്ന ടേബിൾ ഫാനിന് തുല്യമാണെന്ന് എൻ.സി.പി (എസ്.പി) എം.പി ബജ്രംഗ് മനോഹർ സോൻവാനെ പരിഹസിച്ചു.
പ്രമേയം തള്ളിയതിനെ തുടർന്ന് ലോക്സഭ ഇന്നത്തേക്ക് പിരിഞ്ഞു. വ്യാഴാഴ്ച രാവിലെ 11 മണിക്ക് സഭ വീണ്ടും ചേരും.
Story Summary:
The no-confidence motion against Lok Sabha Speaker Om Birla was defeated by a voice vote following intense debates. Union Home Minister Amit Shah criticized the opposition’s move as regrettable, while the opposition accused the Speaker of bias and cited the mass suspension of 140+ MPs as a dark day for democracy.
