കൊച്ചി: വയനാട് ദുരന്തബാധിതർക്കുള്ള വീടുകളുടെ നിർമ്മാണം പൂർത്തിയായ വേളയിൽ, ദുരിതാശ്വാസ നിധിയിലേക്ക് പണം നൽകിയവർക്ക് നന്ദി സന്ദേശം അയക്കാൻ അനുവാദം വേണമെന്ന് സംസ്ഥാന സർക്കാർ ഹൈക്കോടതിയിൽ ആവശ്യപ്പെട്ടു (CMDRF Donation Thank You Message). സർക്കാർ ജീവനക്കാർക്ക് നേരത്തെ സന്ദേശം അയച്ചതുമായി ബന്ധപ്പെട്ട വിവാദങ്ങളെത്തുടർന്ന് സമാന രീതിയിൽ സന്ദേശങ്ങൾ അയക്കരുതെന്ന് കോടതിയുടെ ഇടക്കാല ഉത്തരവുണ്ട്. ഈ സാഹചര്യത്തിലാണ് പ്രത്യേക അപേക്ഷയുമായി സർക്കാർ കോടതിയെ സമീപിച്ചത്.
നന്ദി അറിയിച്ച് സന്ദേശം അയക്കാൻ പ്രത്യേകം അപേക്ഷ നൽകാനും അത് പരിഗണിച്ച് തീരുമാനമെടുക്കാമെന്നും ജസ്റ്റിസ് ബെച്ചു കുര്യൻ തോമസ് വ്യക്തമാക്കി. സന്ദേശം അയക്കുന്നത് എങ്ങനെയാണ് സ്വകാര്യതാലംഘനമാകുന്നതെന്ന് വാദത്തിനിടെ കോടതി ചോദിച്ചു. സർക്കാർ ജീവനക്കാർക്ക് സന്ദേശം അയക്കുന്നതിൽ എന്താണ് തെറ്റെന്നും അത് എപ്പോൾ അയക്കണമെന്ന് തീരുമാനിക്കാൻ സർക്കാരിന് അവകാശമില്ലേ എന്നും കോടതി ആരാഞ്ഞു.
ഐടി മിഷൻ വികസിപ്പിച്ച ഡിജിറ്റൽ പ്ലാറ്റ്ഫോം വഴിയാണ് സന്ദേശങ്ങൾ അയച്ചതെന്നും ആരുടെയും വ്യക്തിഗത വിവരങ്ങൾ ചോർന്നിട്ടില്ലെന്നും സർക്കാർ സത്യവാങ്മൂലം നൽകിയിട്ടുണ്ട്.
ഹർജിയിൽ ബുധനാഴ്ചയും വാദം തുടരും. വയനാട് പുനരധിവാസ പ്രവർത്തനങ്ങളുടെ പുരോഗതി ജനങ്ങളെ അറിയിക്കുന്നതിന്റെ ഭാഗമായാണ് ഈ നന്ദി സന്ദേശമെന്നാണ് സർക്കാരിന്റെ വിശദീകരണം.
Story Summary: The Kerala government has approached the High Court seeking permission to send WhatsApp thank-you messages to donors of the CMDRF, following the completion of houses for Wayanad landslide survivors. The court previously restrained similar messaging to government employees. Justice Bechu Kurian Thomas directed the government to file a formal application, while questioning how such messages violate privacy.
