തിരുവനന്തപുരം: നഗരത്തിലെ പ്ലാസ്റ്റിക് മാലിന്യങ്ങൾ ശാസ്ത്രീയമായി സംസ്കരിക്കുന്നതിനായി അത്യാധുനിക ഐഒടി (Internet of Things) സാങ്കേതികവിദ്യയിൽ പ്രവർത്തിക്കുന്ന ‘സ്മാർട്ട് ബിൻ’ പദ്ധതിക്ക് തുടക്കമായി. തിരുവനന്തപുരം നഗരസഭ മേയർ വി.വി. രാജേഷും ടെറുമോ പെൻപോൾ ലിമിറ്റഡ് സിഎംഡി ചേതൻ മക്കോമും ചേർന്ന് പദ്ധതിയുടെ ഔദ്യോഗിക ഉദ്ഘാടനം നിർവഹിച്ചു (Trivandrum Smart Bin Project).
ഐഒടി സാങ്കേതികവിദ്യ ഉപയോഗിക്കുന്നതിനാൽ ബിന്നിൽ ശേഖരിക്കുന്ന മാലിന്യത്തിന്റെ അളവ് തത്സമയം ഉദ്യോഗസ്ഥർക്ക് അറിയാൻ സാധിക്കും. ബിന്നുകൾ നിറയുന്ന മുറയ്ക്ക് വേഗത്തിൽ നീക്കം ചെയ്യാൻ ഇത് സഹായിക്കും. പ്ലാസ്റ്റിക് മാലിന്യങ്ങൾ ഉറവിടത്തിൽ തന്നെ കൃത്യമായി തരംതിരിച്ച് ശേഖരിക്കുന്നുണ്ടെന്ന് ഈ സംവിധാനം ഉറപ്പാക്കും.
കേന്ദ്ര ആരോഗ്യ കുടുംബക്ഷേമ മന്ത്രാലയത്തിന് കീഴിലുള്ള എച്ച്എൽഎൽ ലൈഫ് കെയർ ലിമിറ്റഡ് ആവിഷ്കരിച്ച പദ്ധതിയാണിത്. ടെറുമോ പെൻപോൾ പ്രൈവറ്റ് ലിമിറ്റഡിന്റെ സിഎസ്ആർ (CSR) ഫണ്ട് ഉപയോഗിച്ച് എച്ച്എൽഎൽ മാനേജ്മെന്റ് അക്കാദമിയാണ് പദ്ധതി നടപ്പിലാക്കുന്നത്.
ചടങ്ങിൽ എച്ച്എൽഎൽ ഡെപ്യൂട്ടി വൈസ് പ്രസിഡന്റുമാരായ ഷംനാദ് ഷംസുദ്ദീൻ, ഡോ. നിരീഷ് പി.എച്ച് എന്നിവരടക്കം പ്രമുഖ ഉദ്യോഗസ്ഥർ പങ്കെടുത്തു. നഗരത്തിന്റെ വിവിധ ഭാഗങ്ങളിലേക്ക് ഇത്തരം സ്മാർട്ട് ബിന്നുകൾ വ്യാപിപ്പിക്കുന്നതോടെ പ്ലാസ്റ്റിക് മുക്ത നഗരമെന്ന ലക്ഷ്യത്തിലേക്ക് തിരുവനന്തപുരം കൂടുതൽ അടുക്കും.
Story Summary: Thiruvananthapuram Corporation has launched IoT-enabled ‘Smart Bins’ for scientific plastic waste management. Inaugurated by Mayor V.V. Rajesh, the project is a collaboration between HLL Lifecare Ltd and Terumo Penpol Ltd (CSR). These bins use IoT technology to monitor waste levels in real-time, ensuring efficient collection and disposal.
