ടെൽ അവീവ്: ഇറാന്റെ പരമോന്നത നേതാവ് ആയത്തുള്ള അലി ഖമേനിയുടെ വധത്തിന് പ്രതികാരമായി ഹിസ്ബുള്ള നടത്തിയ റോക്കറ്റ് ആക്രമണങ്ങൾക്ക് മറുപടിയായി ലബനനിൽ ശക്തമായ സൈനിക നീക്കം ആരംഭിച്ചതായി ഇസ്രായേൽ (Israel Announces Offensive Campaign Against Hezbollah). ഇസ്രായേൽ സൈനിക മേധാവി ഇയാൽ സമീർ ആണ് ഹിസ്ബുള്ളയ്ക്കെതിരെയുള്ള ഈ പുതിയ ‘ആക്രമണ കാമ്പെയ്ൻ’ ഔദ്യോഗികമായി പ്രഖ്യാപിച്ചത്. തിങ്കളാഴ്ച നടന്ന ഇസ്രായേൽ വ്യോമാക്രമണങ്ങളിൽ ലബനനിൽ ഇതുവരെ 31 പേർ കൊല്ലപ്പെടുകയും 149 പേർക്ക് പരിക്കേൽക്കുകയും ചെയ്തതായി ലബനൻ ആരോഗ്യ മന്ത്രാലയം സ്ഥിരീകരിച്ചു.
ലബനൻ അതിർത്തിയിൽ ഹിസ്ബുള്ളയുടെ മിസൈൽ താവളങ്ങൾ ലക്ഷ്യമിട്ടാണ് ഇസ്രായേൽ ആക്രമണം കടുപ്പിക്കുന്നത്. ഇറാന്റെ റെവല്യൂഷണറി ഗാർഡ് തകർക്കപ്പെട്ടതായും ഉടൻ കീഴടങ്ങണമെന്നും അമേരിക്കൻ പ്രസിഡന്റ് ഡൊണാൾഡ് ട്രംപ് മുന്നറിയിപ്പ് നൽകിയതിന് പിന്നാലെയാണ് ഇസ്രായേലിന്റെ ഈ നീക്കം. ബെയ്റൂട്ടിലെ ദഹിയ മേഖലയിൽ നിന്ന് ജനങ്ങൾ കൂട്ടമായി പലായനം ചെയ്യുന്നത് തുടരുകയാണ്. അബുദാബി, ദോഹ, കുവൈത്ത് എന്നിവിടങ്ങളിൽ ഇറാന്റെ പ്രത്യാക്രമണങ്ങൾ നടക്കുമ്പോൾ, ലബനനിലെ ഈ പുതിയ പോരാട്ടം മേഖലയെ ഒരു മഹാദുരന്തത്തിലേക്ക് നയിക്കുമെന്ന് നിരീക്ഷകർ കരുതുന്നു.
