ന്യൂഡൽഹി: ബോളിവുഡ് നടൻ രാജ്പാൽ യാദവിനെതിരെയുള്ള 9 കോടി രൂപയുടെ ചെക്ക് മടങ്ങിയ കേസ് വ്യക്തിവൈരാഗ്യത്തിന്റെ പുറത്തുണ്ടായതാണെന്ന് അഭിഭാഷകൻ ഭാസ്കർ ഉപാധ്യായ (Rajpal Yadav 9 Crore Cheque Bounce Case). 2012-ൽ നടന്ന ‘അതാ പാട ലാപത’ എന്ന ചിത്രത്തിന്റെ ഓഡിയോ ലോഞ്ച് ചടങ്ങിനിടെ അമിതാഭ് ബച്ചനൊപ്പം വേദി പങ്കിടാൻ പരാതിക്കാരനെ അനുവദിക്കാത്തതാണ് ഈ നിയമപോരാട്ടത്തിന് തുടക്കമിട്ടതെന്ന് അദ്ദേഹം അവകാശപ്പെട്ടു.
സിനിമയ്ക്കായി വാങ്ങിയ 5 കോടി രൂപയുടെ വായ്പയുമായി ബന്ധപ്പെട്ടാണ് കേസ് ആരംഭിച്ചത്. മ്യൂസിക് ലോഞ്ച് ചടങ്ങിൽ മുഖ്യാതിഥിയായി എത്തിയ അമിതാഭ് ബച്ചനൊപ്പം നിൽക്കാൻ പരാതിക്കാരനായ വ്യവസായി ആഗ്രഹിച്ചിരുന്നുവെന്നും എന്നാൽ രാജ്പാൽ യാദവിന്റെ ടീം ഇത് തടഞ്ഞതായും അഭിഭാഷകൻ പറയുന്നു. ഇതിൽ പ്രകോപിതനായ വ്യവസായി തന്റെ സ്വാധീനം ഉപയോഗിച്ച് പഴയ കരാറുകളിലെ ചെക്കുകൾ ഹാജരാക്കി നടനെ കുടുക്കുകയായിരുന്നു എന്നാണ് പ്രതിഭാഗത്തിന്റെ വാദം. 15 കോടി രൂപ വിലമതിക്കുന്ന സ്വത്ത് ജാമ്യമായി നൽകാൻ മറ്റൊരു വ്യക്തി തയ്യാറായിട്ടും പരാതിക്കാരൻ അത് സ്വീകരിക്കാതെ നടനെ ജയിലിലടക്കാൻ ശ്രമിക്കുകയാണെന്നും അഭിഭാഷകൻ ആരോപിച്ചു.
കേസിൽ രാജ്പാൽ യാദവിന് നിലവിൽ ഡൽഹി ഹൈക്കോടതി ഇടക്കാല ജാമ്യം അനുവദിച്ചിട്ടുണ്ട്. 2016-ൽ ഇരുവിഭാഗവും ഒപ്പിട്ട പുതിയ കരാർ നിലവിലിരിക്കെ, റദ്ദാക്കിയ പഴയ കരാറിലെ ചെക്കുകൾ ഉപയോഗിച്ചാണ് തന്നെ ശിക്ഷിച്ചതെന്നാണ് രാജ്പാൽ യാദവിന്റെ പരാതി. വായ്പത്തുകയുടെ ഒരു ഭാഗം ഇതിനോടകം തിരിച്ചടച്ചിട്ടുണ്ടെന്നും ബാക്കി തുക നൽകാൻ സാവകാശം വേണമെന്നുമാണ് നടന്റെ ആവശ്യം. കേസിന്റെ മെറിറ്റ് പൂർണ്ണമായും പരിശോധിക്കണമെന്ന നടന്റെ ടീമിന്റെ അഭ്യർത്ഥന കോടതി പരിഗണിച്ചുവരികയാണ്.
