ചെന്നൈ: തമിഴ് സിനിമയിലെ ബദ്ധവൈരികളായി ആരാധകർ കണക്കാക്കുന്ന അജിത് കുമാറും വിജയും യഥാർത്ഥ ജീവിതത്തിൽ അടുത്ത സുഹൃത്തുക്കളാണെന്ന് അജിത്തിന്റെ ഭാര്യയും നടിയുമായ ശാലിനി. ചെന്നൈയിൽ നടന്ന പുരസ്കാര ചടങ്ങിലാണ് ആരാധകരുടെ ചേരിതിരിഞ്ഞുള്ള പോരിനിടെ ഇരുവരുടെയും ആത്മബന്ധത്തെക്കുറിച്ച് ശാലിനി മനസ്സ് തുറന്നത്.
“അജിത്തും വിജയും തമ്മിൽ വളരെ നല്ല ബന്ധമാണുള്ളത്. രണ്ടുപേരും പരസ്പരം വിജയങ്ങളിൽ വളരെയധികം സന്തോഷിക്കുന്നവരാണ്. അത് കാണാൻ തന്നെ മനോഹരമാണ്,” ശാലിനി പറഞ്ഞു. സിനിമകൾ തിയേറ്ററിൽ ഏറ്റുമുട്ടുമ്പോഴും വ്യക്തിജീവിതത്തിൽ ഇരുവരും ശത്രുത പുലർത്താറില്ലെന്ന് താരം വ്യക്തമാക്കി.
കഴിഞ്ഞ വർഷം അജിത്തിന് പത്മഭൂഷൺ പുരസ്കാരം ലഭിച്ചപ്പോൾ വിജയ് അദ്ദേഹത്തെ അഭിനന്ദിച്ചില്ലെന്ന തരത്തിൽ വ്യാപകമായ പ്രചാരണങ്ങൾ നടന്നിരുന്നു. എന്നാൽ ഇതിനെതിരെ അജിത്തിന്റെ ടീം അന്ന് തന്നെ രംഗത്തെത്തിയിരുന്നു. അജിത്തിനെ ഏറ്റവും ആദ്യം അഭിനന്ദിച്ചവരിൽ ഒരാൾ വിജയ് ആയിരുന്നുവെന്നും വ്യാജവാർത്തകൾ പ്രചരിപ്പിക്കരുതെന്നും അവർ പ്രസ്താവനയിലൂടെ അറിയിച്ചിരുന്നു. ശാലിനിയുടെ പുതിയ വെളിപ്പെടുത്തൽ കൂടി വന്നതോടെ താരങ്ങൾ തമ്മിലുള്ള സൗഹൃദത്തിന് കൂടുതൽ വ്യക്തത വന്നിരിക്കുകയാണ്.
Story Summary:
Actress Shalini Ajith clarified that superstars Ajith Kumar and Vijay share a beautiful friendship and celebrate each other’s successes, putting an end to fan-driven rivalry rumors during the JFW awards ceremony.
