അന്താരാഷ്ട്ര ലൈംഗികാതിക്രമക്കേസിലെ പ്രതി ജെഫ്രി എപ്സ്റ്റീന്റെ പുത്തൻ വെളിപ്പെടുത്തലുകളിൽ അമ്പരപ്പിക്കുന്ന മറ്റൊരു വിവരവും പുറത്ത് (Jeffrey Epstein Datura Connection). എപ്സ്റ്റീന്റെ നഴ്സറിയിൽ ‘ട്രമ്പറ്റ് പ്ലാന്റുകൾ’ (Trumpet Plants) അഥവാ ‘ഉമ്മം’ ചെടികൾ വളർത്തിയിരുന്നതായാണ് പുറത്തുവന്ന ഇമെയിൽ രേഖകൾ സൂചിപ്പിക്കുന്നത്. ആളുകളുടെ സ്വതന്ത്രചിന്തയെയും തീരുമാനമെടുക്കാനുള്ള ശേഷിയെയും ഇല്ലാതാക്കുന്ന ‘സ്കോപ്പോളമൈൻ’ (Scopolamine) എന്ന മാരക മയക്കുമരുന്ന് ഈ ചെടികളിൽ നിന്നാണ് ഉത്പാദിപ്പിക്കുന്നത്.
2015-ൽ എപ്സ്റ്റീന് ലഭിച്ച ഒരു ഇമെയിലിൽ, കൊളംബിയയിലെ കാടുകളിൽ വളരുന്നതും മനുഷ്യനെ കുട്ടികളെപ്പോലെ അനുസരണയുള്ളവരാക്കി മാറ്റുന്നതുമായ മരുന്നിനെക്കുറിച്ച് പരാമർശമുണ്ട്. ‘ഡെവിൾസ് ബ്രീത്ത്’ (Devil’s Breath) എന്ന് വിളിക്കപ്പെടുന്ന ഈ മരുന്ന് ഉപയോഗിച്ചാൽ ഇരകൾക്ക് ഓർമ്മക്കുറവും അമിതമായ ഉറക്കവും അനുഭവപ്പെടും. എപ്സ്റ്റീന്റെ നഴ്സറിയിലെ ചെടികളെക്കുറിച്ച് അദ്ദേഹം തന്നെ അയച്ച മറ്റൊരു ഇമെയിലും ഈ വാദത്തെ ശരിവെക്കുന്നു. മാരകമായ വിഷാംശമുള്ള ഈ ചെടിയുടെ എല്ലാ ഭാഗങ്ങളും അപകടകാരിയാണ്.
പുരാണങ്ങളിലെ സാന്നിധ്യം
ഇന്ത്യയിൽ ഉമ്മം (Datura) എന്നറിയപ്പെടുന്ന ഈ പുഷ്പത്തിന് മറ്റൊരു പവിത്രമായ അർത്ഥമാണുള്ളത്. ഹിന്ദു പുരാണങ്ങൾ പ്രകാരം ഭഗവാൻ ശിവനുമായി ഈ പുഷ്പം ആഴത്തിൽ ബന്ധപ്പെട്ടിരിക്കുന്നു. പാലാഴി മഥന വേളയിൽ ഉയർന്നുവന്ന മാരകമായ കാളകൂട വിഷം പ്രപഞ്ച രക്ഷയ്ക്കായി ശിവൻ പാനം ചെയ്തപ്പോൾ അദ്ദേഹത്തിന്റെ നെഞ്ചിൽ നിന്നും ഉമ്മം ചെടി മുളച്ചു വന്നതായാണ് ഐതിഹ്യം. വിഷാംശമുണ്ടെങ്കിലും സഹിഷ്ണുതയുടെയും തപസ്സിന്റെയും പ്രതീകമായി ഇതിനെ കാണുന്നു. മഹാശിവരാത്രി വേളയിൽ ശിവക്ഷേത്രങ്ങളിൽ ഭഗവാന് അർപ്പിക്കുന്ന പ്രധാന പുഷ്പങ്ങളിൽ ഒന്നാണിത്.
വൈദ്യശാസ്ത്ര വശം
ട്രമ്പറ്റ് പ്ലാന്റുകളിൽ സ്കോപ്പോളമൈൻ കൂടാതെ അട്രോപിൻ, ഹയോസ്യാമിൻ തുടങ്ങിയ ആൽക്കലോയിഡുകൾ അടങ്ങിയിട്ടുണ്ട്. ഇവ കേന്ദ്ര നാഡീവ്യൂഹത്തെ ബാധിക്കും. ചെറിയ അളവിൽ യാത്രയ്ക്കിടയിലുണ്ടാകുന്ന ശാരീരിക അസ്വസ്ഥതകൾക്ക് മരുന്നായി ഉപയോഗിക്കാറുണ്ടെങ്കിലും, അമിതമായ അളവ് ബോധക്ഷയത്തിനും മസ്തിഷ്ക തകരാറിനും മരണത്തിനും വരെ കാരണമായേക്കാം.
Summary: Recent leaks from the Epstein files reveal that Jeffrey Epstein grew “trumpet plants” (Datura) in his nursery, likely for their psychoactive properties.
