ന്യൂഡൽഹി: ടി20 ലോകകപ്പിൽ ഇന്ത്യക്കെതിരെ പാകിസ്ഥാൻ നേരിട്ട ദയനീയ പരാജയത്തിന് പിന്നാലെ പാക് ക്രിക്കറ്റ് ബോർഡ് (PCB) ചെയർമാൻ മൊഹ്സിൻ നഖ്വിക്കും ക്യാപ്റ്റൻ ബാബർ അസമിനുമെതിരെ രൂക്ഷവിമർശനവുമായി മുൻ പേസർ ഷുഐബ് അക്തർ (Shoaib Akhtar Mohsin Naqvi Controversy). ഇന്ത്യയോട് 61 റൺസിന് തോറ്റ പാക് ടീമിന്റേത് വെറും കീഴടങ്ങലായിരുന്നുവെന്ന് അക്തർ പറഞ്ഞു. പാകിസ്ഥാൻ ക്രിക്കറ്റ് ബോർഡിന്റെ തലപ്പത്തിരിക്കുന്നത് ഒന്നിനും കൊള്ളാത്തവരും വിവരമില്ലാത്തവരുമാണെന്ന് അദ്ദേഹം ഒരു ടിവി ചാനലിന് നൽകിയ അഭിമുഖത്തിൽ തുറന്നടിച്ചു.
ക്രിക്കറ്റിനെക്കുറിച്ച് ഒന്നും അറിയാത്ത ഒരാളാണ് ഇന്ന് പിസിബി ചെയർമാനായിരിക്കുന്നതെന്ന് മൊഹ്സിൻ നഖ്വിയെ ലക്ഷ്യം വെച്ച് അക്തർ പറഞ്ഞു. “അപ്രാപ്തരായ ആളുകളെ പ്രധാന ജോലികൾ ഏൽപ്പിക്കുന്നത് ലോകത്തിലെ ഏറ്റവും വലിയ കുറ്റമാണ്. നഖ്വി ഒരു ജാഹിൽ (വിവരമില്ലാത്തവൻ) ആണ്. ഇത്തരം ആളുകൾ ഉള്ളപ്പോൾ എങ്ങനെ ടീം മുന്നോട്ട് പോകും?” അക്തർ ചോദിച്ചു. ഒരു മത്സരത്തിൽ പോലും വിജയിപ്പിക്കാൻ കഴിയാത്ത ബാബർ അസമിനെ മാധ്യമങ്ങൾ വെറുതെ സൂപ്പർസ്റ്റാർ ആക്കി വെച്ചിരിക്കുകയാണെന്നും അദ്ദേഹം പരിഹസിച്ചു. ഷഹീൻ അഫ്രീദിയുടെ വേഗത 125 കി.മീറ്ററായി കുറഞ്ഞത് ആധുനിക ക്രിക്കറ്റിന് ചേർന്നതല്ലെന്നും കഴിഞ്ഞ 15-20 വർഷമായി പാക് ക്രിക്കറ്റിൽ ഒരു നിക്ഷേപവും നടക്കുന്നില്ലെന്നും അദ്ദേഹം കൂട്ടിച്ചേർത്തു.
മത്സരത്തിൽ ആദ്യം ബാറ്റ് ചെയ്ത ഇന്ത്യ ഇഷാൻ കിഷന്റെ (77) കരുത്തിൽ 175 റൺസെടുത്തു. എന്നാൽ മറുപടി ബാറ്റിംഗിനിറങ്ങിയ പാകിസ്ഥാൻ വെറും 114 റൺസിന് പുറത്തായി. ഹാർദിക് പാണ്ഡ്യ, ജസ്പ്രീത് ബുംറ, അക്സർ പട്ടേൽ എന്നിവരുടെ ബൗളിംഗിന് മുന്നിൽ പാക് ബാറ്റിംഗ് നിര തകർന്നടിയുകയായിരുന്നു. ഈ വിജയത്തോടെ ടി20 ലോകകപ്പ് ചരിത്രത്തിൽ പാകിസ്ഥാനെതിരെ ഇന്ത്യയുടെ റെക്കോർഡ് 8-1 ആയി ഉയർന്നു.
Summary: Former pacer Shoaib Akhtar slammed PCB Chairman Mohsin Naqvi and captain Babar Azam following Pakistan’s 61-run loss to India in the 2026 T20 World Cup.
