ന്യൂയോർക്ക്: പശ്ചിമേഷ്യയിലെ യുദ്ധം കടുക്കുന്നതോടെ ആഗോള ഓഹരി വിപണികൾ കനത്ത തകർച്ച നേരിടുന്നു. തിങ്കളാഴ്ച യുഎസ് വിപണിയായ വാൾസ്ട്രീറ്റിൽ വ്യാപാരം ആരംഭിക്കുന്നതിന് മുൻപുള്ള ഫ്യൂച്ചേഴ്സ് സൂചികകളിൽ വൻ ഇടിവ് രേഖപ്പെടുത്തി (Wall Street Futures Slide Middle East Conflict). ഡൗ ജോൺസ് 1.39%, എസ് ആന്റ് പി 500 1.46%, നാസ്ഡാക്ക് 1.86% എന്നിങ്ങനെയാണ് ഇടിവ് രേഖപ്പെടുത്തിയത്. യുദ്ധം നീണ്ടുനിന്നേക്കാമെന്ന അമേരിക്കൻ പ്രസിഡന്റ് ഡൊണാൾഡ് ട്രംപിന്റെ പ്രസ്താവനയും എണ്ണവിലയിലെ വർദ്ധനവുമാണ് നിക്ഷേപകരെ ആശങ്കയിലാഴ്ത്തുന്നത്.
യുദ്ധം കാരണം ഓഹരി വിപണിയിൽ നിന്ന് നിക്ഷേപകർ പിൻവാങ്ങുകയും സുരക്ഷിത നിക്ഷേപമെന്ന നിലയിൽ സ്വർണ്ണത്തിലേക്കും ബോണ്ടുകളിലേക്കും മാറുകയും ചെയ്യുന്നു. ഇതിനെത്തുടർന്ന് ആഗോള വിപണിയിൽ സ്വർണ്ണവില 2 ശതമാനത്തോളം വർദ്ധിച്ചു. അമേരിക്കയുടെ 10 വർഷത്തെ ട്രഷറി ബോണ്ട് യീൽഡ് 11 മാസത്തെ ഏറ്റവും താഴ്ന്ന നിലയിലെത്തി. എണ്ണവില കുതിച്ചുയരുന്നത് നാണയപ്പെരുപ്പം വർദ്ധിപ്പിക്കാൻ കാരണമാകുമെന്ന ഭയത്താൽ അമേരിക്കൻ ഫെഡറൽ റിസർവ് പലിശ നിരക്കുകളിൽ ഉടൻ കുറവ് വരുത്താൻ സാധ്യതയില്ലെന്നും നിരീക്ഷകർ കരുതുന്നു.
സൗദിയിലെ റാസ് തനൂറ റിഫൈനറിക്ക് നേരെയുണ്ടായ ആക്രമണവും അബുദാബി, ദുബായ്, ദോഹ എന്നിവിടങ്ങളിലെ സ്ഫോടനങ്ങളും ആഗോള ബിസിനസ് രംഗത്തെ പൂർണ്ണമായും തളർത്തിയിരിക്കുകയാണ്. ഇന്ത്യൻ ഓഹരി വിപണിയിലും ഇന്ന് വൻ തകർച്ചയാണ് ഉണ്ടായത്. സെൻസെക്സ് 2000 പോയിന്റിലധികം ഇടിഞ്ഞതോടെ നിക്ഷേപകർക്ക് ലക്ഷക്കണക്കിന് കോടി രൂപയുടെ നഷ്ടം സംഭവിച്ചു. യുദ്ധം വരും ആഴ്ചകളിലും തുടരുമെന്ന ട്രംപിന്റെ മുന്നറിയിപ്പ് വരും ദിവസങ്ങളിലും വിപണിയെ കലുഷിതമാക്കും. ഐടി, ബാങ്കിംഗ് ഓഹരികളിലാണ് ഏറ്റവും വലിയ ഇടിവ് രേഖപ്പെടുത്തിയത്.
