വാഷിംഗ്ടൺ: ഇറാന്റെ ഭൂഗർഭ ആണവ നിലയങ്ങളെ തകർക്കാൻ ശേഷിയുള്ള ജിബിയു-57 (GBU-57) അഥവാ മാസീവ് ഓർഡനൻസ് പെനട്രേറ്റർ (MOP) ബോംബുകൾ വാങ്ങാൻ അമേരിക്കൻ വ്യോമസേന ബോയിങ്ങുമായി കരാർ ഒപ്പിട്ടു. ഏകദേശം 100 ദശലക്ഷം ഡോളർ (830 കോടി രൂപ) ചിലവ് വരുന്ന പദ്ധതി പ്രകാരം 2028-ഓടെ ബോംബുകൾ കൈമാറി തുടങ്ങും.(US to restock giant bombs that shook Iran’s nuclear facilities)
ഏകദേശം 13,000 കിലോഗ്രാമിലധികം ഭാരമുള്ള ഈ ഭീമൻ ഗൈഡഡ് ബോംബുകൾ ലോകത്തിലെ ഏറ്റവും മാരകമായ പരമ്പരാഗത ആയുധങ്ങളിലൊന്നാണ്. കോൺക്രീറ്റും പാറക്കെട്ടുകളും തുളച്ച് 200 അടി ആഴത്തിൽ വരെ ഇറങ്ങിച്ചെന്ന് പൊട്ടിത്തെറിക്കാൻ ഇവയ്ക്ക് സാധിക്കും. ഭൂമിക്കടിയിലെ ബങ്കറുകളും ലബോറട്ടറികളും ലക്ഷ്യം വെച്ചാണ് ഇവയുടെ നിർമ്മാണം.
റഡാറുകളിൽ പെടാത്ത ബി-2 സ്റ്റെൽത്ത് ബോംബറുകളിൽ നിന്നാണ് സാധാരണയായി ഈ ബോംബുകൾ വർഷിക്കുന്നത്. 2025 ജൂണിൽ ഇറാനിലെ ഫോർഡോ ഉൾപ്പെടെയുള്ള ആണവ കേന്ദ്രങ്ങളെ ലക്ഷ്യമിട്ട് നടത്തിയ വ്യോമാക്രമണത്തിൽ 14 ബോംബുകൾ അമേരിക്ക ഉപയോഗിച്ചിരുന്നു. ആകെ 20 എണ്ണം മാത്രം കൈവശമുള്ളതിൽ ശേഖരം തീരാറായതാണ് ഈ അടിയന്തര കരാറിലേക്ക് നയിച്ചത്. കരാർ വൈകുന്നത് സൈന്യത്തിന്റെ യുദ്ധസജ്ജതയെ ബാധിക്കുമെന്ന് വ്യോമസേന വിലയിരുത്തുന്നു.
