ടെഹ്റാൻ: ഇറാന്റെ എണ്ണക്കയറ്റുമതിയുടെ നട്ടെല്ലായ ഖാർഗ് ദ്വീപിന് നേരെ അമേരിക്കൻ സൈന്യം ശക്തമായ ബോംബിങ് നടത്തി (US attack on Kharg Island 2026). ആക്രമണത്തിൽ ദ്വീപിലെ പ്രധാന സൈനിക പ്രതിരോധ സംവിധാനങ്ങൾ തകർന്നതായി യുഎസ് പ്രസിഡന്റ് ഡൊണാൾഡ് ട്രംപ് സ്ഥിരീകരിച്ചു. ഇതിന് പിന്നാലെ, പശ്ചിമേഷ്യൻ മേഖലയിൽ യുഎസുമായി സഹകരിക്കുന്ന എല്ലാ എണ്ണക്കമ്പനികൾക്കും കേന്ദ്രങ്ങൾക്കും നേരെ ആക്രമണം നടത്തുമെന്ന് ഇറാൻ സായുധ സേന തിരിച്ചടിച്ചു.
ഖാർഗ് ദ്വീപിലെ എയർപോർട്ട് കൺട്രോൾ ടവർ, സൈനിക പ്രതിരോധ സംവിധാനങ്ങൾ, ഹെലികോപ്റ്റർ ഹാങ്ങറുകൾ എന്നിവ തകർന്നതായാണ് പ്രാഥമിക റിപ്പോർട്ട്.ഇറാന്റെ എണ്ണക്കയറ്റുമതി പൂർണ്ണമായും തടയുക എന്ന ലക്ഷ്യത്തോടെ സൈനിക കേന്ദ്രങ്ങൾ നശിപ്പിച്ചതായി ട്രംപ് അറിയിച്ചു.
ദ്വീപിൽ 15-ലധികം സ്ഫോടനങ്ങൾ ഉണ്ടായെങ്കിലും എണ്ണ ഉൽപ്പാദനത്തെയോ കയറ്റുമതിയെയോ ബാധിക്കുന്ന അടിസ്ഥാന സൗകര്യങ്ങൾ സുരക്ഷിതമാണെന്ന് ഇറാന്റെ ഔദ്യോഗിക വാർത്താ ഏജൻസിയായ ‘ഫാർസ്’ റിപ്പോർട്ട് ചെയ്തു.ഇറാന്റെ ആകെ എണ്ണക്കയറ്റുമതിയുടെ ഭൂരിഭാഗവും നടക്കുന്നത് ഖാർഗ് ദ്വീപ് വഴിയാണ്. ഈ കേന്ദ്രത്തെ ലക്ഷ്യമിട്ടതിലൂടെ ഇറാന്റെ സാമ്പത്തിക മേഖലയെ തകർക്കുകയാണ് അമേരിക്കയുടെ ലക്ഷ്യം. ഇതിന് മറുപടിയായി മേഖലയിലെ മറ്റ് രാജ്യങ്ങളിലെ അമേരിക്കൻ എണ്ണപ്പാടങ്ങൾക്ക് നേരെ ഇറാൻ തിരിഞ്ഞാൽ ആഗോള ഇന്ധന വിപണി കനത്ത തകർച്ചയെ നേരിടേണ്ടി വരും.
ഹോർമൂസ് കടലിടുക്കിലെ നിയന്ത്രണങ്ങൾ കടുപ്പിച്ചും യുഎസ് സൈനിക താവളങ്ങളെ ലക്ഷ്യമിട്ടും ഇറാൻ പ്രത്യാക്രമണത്തിന് തയ്യാറെടുക്കുകയാണ്. ഇത് ഇന്ത്യയുൾപ്പെടെയുള്ള രാജ്യങ്ങളിലെ ഇന്ധന-പാചകവാതക ലഭ്യതയെ വീണ്ടും പ്രതിസന്ധിയിലാക്കും.
Story Summary: Tensions escalated in the Middle East as the US targeted Iran’s key oil export hub, Kharg Island. President Donald Trump claimed military infrastructure on the island was destroyed. In response, Iran’s armed forces warned of retaliatory strikes against all oil companies collaborating with the US in the region.
