ജറുസലേം: പാകിസ്ഥാനിൽ നാളെ നടക്കാനിരിക്കുന്ന നിർണ്ണായക സമാധാന ചർച്ചകൾക്ക് മുൻപേ, യുഎസും ഇറാനും തമ്മിലുള്ള രണ്ടാഴ്ചത്തെ വെടിനിർത്തൽ കരാർ കടുത്ത പ്രതിസന്ധിയിലേക്ക് (US Iran Peace Talks Pakistan). ഹോർമുസ് കടലിടുക്ക് വഴിയുള്ള എണ്ണനീക്കം പുനഃസ്ഥാപിക്കുമെന്ന വാഗ്ദാനം ഇറാൻ ലംഘിച്ചതായി വാഷിംഗ്ടൺ ആരോപിച്ചു. അതേസമയം, ലബനനിൽ ഇസ്രായേൽ തുടരുന്ന ആക്രമണങ്ങൾ വെടിനിർത്തൽ കരാറിന്റെ ലംഘനമാണെന്ന് ഇറാനും ചൂണ്ടിക്കാട്ടുന്നു.
ലോകത്തെ എണ്ണനീക്കത്തിന്റെ അഞ്ചിലൊന്ന് നടക്കുന്ന ഹോർമുസ് കടലിടുക്കിൽ ഇറാൻ ഏർപ്പെടുത്തിയ ഉപരോധം ഇതുവരെ നീക്കിയിട്ടില്ല. വെടിനിർത്തൽ പ്രഖ്യാപിച്ച ശേഷമുള്ള ആദ്യ 24 മണിക്കൂറിൽ ആകെ ആറ് കപ്പലുകൾ മാത്രമാണ് ഇതുവഴി കടന്നുപോയത്. ഇറാൻ കരാർ പാലിക്കുന്നില്ലെന്ന് പ്രസിഡന്റ് ഡൊണാൾഡ് ട്രംപ് സമൂഹമാധ്യമങ്ങളിലൂടെ വിമർശിച്ചു. വെടിനിർത്തൽ കരാറിൽ ലബനനും ഉൾപ്പെടുമെന്ന് ഇറാനും മധ്യസ്ഥരായ പാകിസ്ഥാനും അവകാശപ്പെടുമ്പോൾ, ഇത് ഇറാനുമായുള്ള യുദ്ധത്തിന് മാത്രമാണെന്നാണ് യുഎസിന്റെയും ഇസ്രായേലിന്റെയും നിലപാട്. വെള്ളിയാഴ്ചയും ലബനനിലെ ഹിസ്ബുള്ള കേന്ദ്രങ്ങൾക്ക് നേരെ ഇസ്രായേൽ ആക്രമണം നടത്തി. ഹിസ്ബുള്ള തലവന്റെ അനന്തരവനെ വധിച്ചതായും ഇസ്രായേൽ അവകാശപ്പെട്ടു. യുദ്ധത്തിലൂടെ ഇറാനുണ്ടായ എല്ലാ നാശനഷ്ടങ്ങൾക്കും പകരം ചോദിക്കുമെന്നും നഷ്ടപരിഹാരം വാങ്ങുമെന്നും ഇറാന്റെ പരമോന്നത നേതാവ് ആയത്തുള്ള മുജ്തബ ഖമേനി പ്രസ്താവനയിൽ പറഞ്ഞു.
നാളെ ഇസ്ലാമാബാദിൽ നടക്കുന്ന ചർച്ചയിൽ യുഎസ് വൈസ് പ്രസിഡന്റ് ജെ.ഡി. വാൻസും ഇറാന്റെ പാർലമെന്റ് സ്പീക്കർ മുഹമ്മദ് ബാഖർ ഖാലിബാഫും പങ്കെടുക്കും. ലബനനുമായി നേരിട്ടുള്ള ചർച്ചകൾക്ക് തയ്യാറാണെന്ന് ഇസ്രായേൽ പ്രധാനമന്ത്രി ബെഞ്ചമിൻ നെതന്യാഹു അറിയിച്ചിട്ടുണ്ടെങ്കിലും, ഹിസ്ബുള്ളയെ നിരായുധരാക്കുക എന്നതാണ് തങ്ങളുടെ ലക്ഷ്യമെന്ന് അദ്ദേഹം വ്യക്തമാക്കി. എന്നാൽ ഇസ്രായേലുമായി നേരിട്ടുള്ള ചർച്ചകൾക്കില്ലെന്നും വെടിനിർത്തൽ പ്രഖ്യാപിച്ചാൽ മാത്രമേ മറ്റ് കാര്യങ്ങൾ പരിഗണിക്കൂ എന്നും ഹിസ്ബുള്ള അറിയിച്ചു. ചർച്ചകൾക്കായി ഇസ്ലാമാബാദിൽ കനത്ത സുരക്ഷയാണ് ഏർപ്പെടുത്തിയിരിക്കുന്നത്.
Summary: The fragile two-week U.S.-Iran ceasefire is under strain as peace talks are set to begin in Pakistan tomorrow. While the U.S. accuses Tehran of failing to restore oil flows through the Strait of Hormuz, Iran claims Israel’s ongoing strikes in Lebanon violate the truce. Disagreements persist over whether the ceasefire covers Lebanon, with Iran insisting it does and Israel focusing on disarming Hezbollah. Despite tensions, both sides are preparing for high-level negotiations in Islamabad, mediated by Pakistan.
