വാഷിംഗ്ടൺ: അമേരിക്കയിലെ കാലിഫോർണിയയിൽ മരിച്ച നിലയിൽ കണ്ടെത്തിയ ഇന്ത്യൻ വിദ്യാർത്ഥി സാകേത് ശ്രീനിവാസയ്യയുടെ അവസാന നാളുകളെക്കുറിച്ചുള്ള റൂംമേറ്റിന്റെ വെളിപ്പെടുത്തൽ നൊമ്പരമാകുന്നു (Saketh Sreenivasaiah Death). ബെർക്കിലിയിലെ കാലിഫോർണിയ സർവകലാശാലയിൽ കെമിക്കൽ ആൻഡ് ബയോമോളിക്യുലർ എൻജിനീയറിംഗ് വിദ്യാർത്ഥിയായിരുന്ന സാകേതിനെ കഴിഞ്ഞ ഫെബ്രുവരി 9-നാണ് കാണാതായത്. ആറ് ദിവസത്തെ തിരച്ചിലിനൊടുവിൽ ഫെബ്രുവരി 14-ന് ലേക്ക് അൻസയ്ക്ക് സമീപം മൃതദേഹം കണ്ടെത്തുകയായിരുന്നു. മരണത്തിന് തൊട്ടുമുൻപുള്ള ദിവസങ്ങളിൽ സാകേത് വലിയ മാനസിക വിഷമത്തിലായിരുന്നുവെന്ന് റൂംമേറ്റ് ബനീത് സിംഗ് സോഷ്യൽ മീഡിയയിൽ കുറിച്ചു.
അവസാന രണ്ടാഴ്ചയോളം സാകേത് ആരോടും സംസാരിക്കാതെയും ഭക്ഷണം കഴിക്കാതെയും ഒറ്റപ്പെട്ട നിലയിലായിരുന്നുവെന്ന് ബനീത് പറയുന്നു. ബിസ്കറ്റും ചിപ്സും മാത്രമായിരുന്നു ആ ദിവസങ്ങളിൽ ഭക്ഷണം. ഒരിക്കൽ കുളിമുറിയിൽ ഉപയോഗിക്കുന്ന ബാത്ത്റോബ് ധരിച്ച് ക്ലാസിൽ പോയ സാകേതിനോട് അതേക്കുറിച്ച് ചോദിച്ചപ്പോൾ, “എനിക്കിനി എന്തിനെക്കുറിച്ചും ആകുലതകളില്ല, മറ്റുള്ളവർ എന്ത് വിചാരിക്കുമെന്നത് ഞാൻ ശ്രദ്ധിക്കുന്നില്ല” എന്നായിരുന്നു മറുപടി. സാകേത് തമാശ പറയുകയാണെന്നാണ് അന്ന് കരുതിയതെന്നും എന്നാൽ അത് ജീവിതത്തോടുള്ള വിരക്തിയായിരുന്നുവെന്ന് ഇപ്പോഴാണ് തിരിച്ചറിയുന്നതെന്നും ബനീത് വ്യക്തമാക്കി.
കർണാടക സ്വദേശിയായ സാകേത് ഐഐടി മദ്രാസിലെ പൂർവ്വ വിദ്യാർത്ഥിയാണ്. പഠനത്തിൽ അതീവ മിടുക്കനായിരുന്ന അദ്ദേഹം ഹൈപ്പർലൂപ്പ് സാങ്കേതികവിദ്യയുമായി ബന്ധപ്പെട്ട പേറ്റന്റ് നേടിയ ആറ് കണ്ടുപിടുത്തക്കാരിൽ ഒരാളായിരുന്നു. സാകേതിന്റെ പാസ്പോർട്ടും ലാപ്ടോപ്പും അടങ്ങിയ ബാഗ് ടിൽഡൻ റീജിയണൽ പാർക്കിന് സമീപം നേരത്തെ കണ്ടെത്തിയിരുന്നു. സാകേതിന്റെ മൃതദേഹം നാട്ടിലെത്തിക്കാനുള്ള നടപടികൾ പുരോഗമിക്കുകയാണെന്ന് സാൻഫ്രാൻസിസ്കോയിലെ ഇന്ത്യൻ കോൺസുലേറ്റ് അറിയിച്ചു. കുടുംബത്തിന് അടിയന്തര വിസ ലഭ്യമാക്കാൻ റൂംമേറ്റ് അധികൃതരുമായി ചേർന്ന് പ്രവർത്തിക്കുന്നുണ്ട്.
Summary: The roommate of 22-year-old Indian student Saketh Sreenivasaiah, who was found dead in California, shared chilling details of his final days.
