മെക്സിക്കോ സിറ്റി: ലോകാവസാനത്തിന്റെയോ വലിയ പ്രകൃതി ദുരന്തങ്ങളുടെയോ മുന്നോടിയായി പ്രത്യക്ഷപ്പെടുമെന്ന് വിശ്വസിക്കപ്പെടുന്ന അപൂർവ്വമായ ‘ഓർ ഫിഷ്’ (Oarfish) മെക്സിക്കോയിലെ കാബോ സാൻ ലൂക്കാസ് കടൽത്തീരത്ത് കണ്ടെത്തി (Rare Doomsday Fish Sighting Mexico). സമുദ്രത്തിന്റെ ഏകദേശം 3000 അടി താഴ്ചയിൽ വസിക്കുന്ന ഈ മത്സ്യങ്ങൾ കരയോട് അടുക്കുന്നത് ഭൂകമ്പത്തിന്റെയും സുനാമിയുടെയും ലക്ഷണമാണെന്നാണ് ജാപ്പനീസ് നാടോടിക്കഥകളിൽ പറയുന്നത്. ഇതേത്തുടർന്ന് ‘ലോകാവസാന മത്സ്യം’ (Doomsday Fish) എന്നാണ് ഇവ അറിയപ്പെടുന്നത്.
രണ്ട് ഓർ ഫിഷുകളെയാണ് മെക്സിക്കൻ തീരത്ത് കണ്ടെത്തിയത്. തീരത്ത് എന്തോ ഒന്ന് മിന്നിത്തിളങ്ങുന്നത് കണ്ട് പരിശോധിച്ച രണ്ട് സഹോദരിമാരാണ് ഈ അപൂർവ്വ മത്സ്യങ്ങളെ ആദ്യം കണ്ടത്. ഏകദേശം 30 അടി വരെ നീളം വയ്ക്കാവുന്ന ഈ മത്സ്യങ്ങൾ വെള്ളിനിറത്തിൽ റിബൺ പോലെ കാണപ്പെടുന്നു. ആഴക്കടലിൽ മാത്രം കാണാറുള്ള ഇവ ആഴം കുറഞ്ഞ ഭാഗത്ത് അവശനിലയിലായിരുന്നുവെന്നും ഇവയെ രക്ഷിക്കാൻ ശ്രമിച്ചുവെന്നും വീഡിയോ പങ്കുവെച്ച മോണിക്ക പിറ്റെൻഗർ പറഞ്ഞു.
ശാസ്ത്രം പറയുന്നത് എന്ത്?
കടലിനടിയിലുണ്ടാകുന്ന ചലനങ്ങൾ തിരിച്ചറിയാൻ പ്രത്യേക കഴിവുള്ളവയാണ് ഓർ ഫിഷുകളെന്നും അതുകൊണ്ടാണ് പ്രകൃതി ദുരന്തങ്ങൾക്ക് മുന്നോടിയായി ഇവ കരയിലേക്ക് വരുന്നതെന്നുമാണ് സോഷ്യൽ മീഡിയയിലെ സംസാരം. എന്നാൽ, ഈ മത്സ്യങ്ങൾ പ്രത്യക്ഷപ്പെടുന്നതും പ്രകൃതി ദുരന്തങ്ങളും തമ്മിൽ ശാസ്ത്രീയമായ ബന്ധമില്ലെന്നാണ് ഗവേഷകർ വ്യക്തമാക്കുന്നത്. എന്നിരുന്നാലും, അടുത്ത കാലത്തായി തമിഴ്നാട്ടിലും ഓസ്ട്രേലിയയിലും ഈ മത്സ്യങ്ങളെ കണ്ടെത്തിയത് വലിയ രീതിയിലുള്ള ചർച്ചകൾക്ക് വഴിതെളിച്ചിരുന്നു.
View this post on Instagram
