വാഷിംഗ്ടൺ: യുഎസ് അറ്റോർണി ജനറൽ പാം ബോണ്ടിയുടെ പുറത്താക്കലിന് പിന്നാലെ, പ്രതിരോധ സെക്രട്ടറി പീറ്റ് ഹെഗ്സെത്തും കടുത്ത ആശങ്കയിലാണെന്ന് റിപ്പോർട്ടുകൾ. തന്റെ പദവി നഷ്ടപ്പെടുമെന്ന ഭയവും സുരക്ഷാ ഉദ്യോഗസ്ഥരോടുള്ള അവിശ്വാസവുമാണ് യുഎസ് ആർമി ചീഫ് ജനറൽ ലാൽഡി ജോർജിനെ കഴിഞ്ഞ പുറത്താക്കാൻ കാരണമായതെന്നാണ് സൂചന.(Power struggle intensifies in the US Department of Defense, Pete Hegseth in fear of being fired?)
ഇറാനുമായുള്ള യുദ്ധം കൊടുമ്പിരിക്കൊള്ളുന്നതിനിടയിലാണ് സൈനിക മേധാവി ജനറൽ ലാൽഡി ജോർജിനോട് രാജി ആവശ്യപ്പെടാൻ ഹെഗ്സെത്ത് തുനിഞ്ഞത്. ഇതിന് പിന്നിലെ യഥാർത്ഥ കാരണങ്ങൾ ഇതുവരെ പരസ്യപ്പെടുത്തിയിട്ടില്ല. ആർമി സെക്രട്ടറി ഡാൻ ഡ്രിസ്കോൾ തന്റെ സ്ഥാനം തട്ടിയെടുക്കുമെന്ന ഭയമാണ് ഹെഗ്സെത്തിനെ വേട്ടയാടുന്നത്. ഡ്രിസ്കോളിനോട് അടുപ്പമുള്ളവരെയെല്ലാം ഭരണകൂടത്തിൽ നിന്ന് നീക്കം ചെയ്യാനാണ് ഹെഗ്സെത്തിന്റെ നീക്കം.
2025 മാർച്ചിൽ ദേശീയ സുരക്ഷാ ഉദ്യോഗസ്ഥരുമായി ഹെഗ്സെത്ത് നടത്തിയ രഹസ്യ ഗ്രൂപ്പ് ചാറ്റിൽ അബദ്ധത്തിൽ ഒരു മാധ്യമപ്രവർത്തകൻ ഉൾപ്പെട്ടത് അദ്ദേഹത്തെ കൂടുതൽ പരിഭ്രാന്തനാക്കിയതായി ട്രംപ് ഭരണകൂടത്തിലെ ഉദ്യോഗസ്ഥർ വെളിപ്പെടുത്തി. ആർമി സെക്രട്ടറി ഡാൻ ഡ്രിസ്കോളിന് യുഎസ് വൈസ് പ്രസിഡന്റ് ജെ.ഡി. വാൻസുമായുള്ള അടുത്ത ബന്ധമാണ് ഹെഗ്സെത്തിനെ ചൊടിപ്പിക്കുന്നത്. യേൽ ലോ സ്കൂളിൽ വാൻസിന്റെ സഹപാഠിയായിരുന്ന ഡ്രിസ്കോൾ ഇറാഖ് യുദ്ധത്തിലും സേവനമനുഷ്ഠിച്ചിട്ടുണ്ട്.
യുക്രെയ്ൻ യുദ്ധത്തിലെ മുഖ്യ മധ്യസ്ഥനായി വാൻസ് ഡ്രിസ്കോളിനെ നിയമിച്ചതാണ് ഹെഗ്സെത്തിനെ പ്രകോപിപ്പിച്ച അവസാനത്തെ സംഭവം. ഡ്രിസ്കോളിനെ പുറത്താക്കാൻ ഹെഗ്സെത്ത് ആഗ്രഹിക്കുന്നുണ്ടെങ്കിലും വൈസ് പ്രസിഡന്റ് വാൻസിന്റെ ശക്തമായ പിന്തുണ അദ്ദേഹത്തിനുണ്ട്. ഡ്രിസ്കോൾ പുറത്താക്കപ്പെട്ടാൽ ആ സ്ഥാനത്തേക്ക് എത്താൻ ഹെഗ്സെത്തിന്റെ വക്താവ് ഷോൺ പാർനെൽ ശ്രമിക്കുന്നതായും റിപ്പോർട്ടുകളുണ്ട്. അഫ്ഗാനിസ്ഥാനിലെ സേവനത്തിന് ബ്രോൺസ് സ്റ്റാറും പർപ്പിൾ ഹാർട്ടും ലഭിച്ച പാർനെൽ, പ്രതിരോധ വകുപ്പിലെ പ്രമുഖനായ ആർമി വെറ്ററനാണ്.
ഹോംലാൻഡ് സെക്യൂരിറ്റി സെക്രട്ടറി ക്രിസ്റ്റി നോമിനെയും അറ്റോർണി ജനറൽ പാം ബോണ്ടിയെയും പുറത്താക്കിയ ട്രംപിന്റെ സമീപകാല നടപടികൾ മന്ത്രിസഭയിൽ വലിയ അഴിച്ചുപണികൾക്ക് സാധ്യത വർദ്ധിപ്പിക്കുന്നു. നിലവിൽ ഹെഗ്സെത്തിനെയോ ഡ്രിസ്കോളിനെയോ പുറത്താക്കാൻ ട്രംപ് തീരുമാനിച്ചിട്ടില്ലെങ്കിലും പെന്റഗണിലെ ഈ ആഭ്യന്തര കലഹം ഭരണകൂടത്തെ പ്രതിസന്ധിയിലാക്കുന്നുണ്ട്.
