കാഠ്മണ്ഡു: നേപ്പാളിലെ ധാഡിംഗ് ജില്ലയിലുണ്ടായ ബസ് അപകടത്തിൽ വിദേശ പൗരനടക്കം 19 പേർക്ക് ജീവൻ നഷ്ടമായി. നിയന്ത്രണം വിട്ട ബസ് റോഡിൽ നിന്ന് ത്രിശൂലി നദിക്കരയിലെ ആഴമുള്ള കൊക്കയിലേക്ക് മറിയുകയായിരുന്നു. 25 പേർക്ക് അപകടത്തിൽ പരിക്കേറ്റു.(Nepal bus accident, Death toll rises to 19)
പൊഖാറയിൽ നിന്ന് തലസ്ഥാനമായ കാഠ്മണ്ഡുവിലേക്ക് പുറപ്പെട്ട സ്വകാര്യ ബസാണ് ബെനിഘട്ടിന് സമീപം അപകടത്തിൽപ്പെട്ടത്. കുത്തനെയുള്ള ചരിവിലൂടെ നിയന്ത്രണം നഷ്ടപ്പെട്ട ബസ് താഴേക്ക് പതിക്കുകയായിരുന്നു.
അപകടത്തിൽ 19 പേർ കൊല്ലപ്പെട്ടു. ഇതിൽ 24 വയസ്സുള്ള ഒരു ബ്രിട്ടീഷ് പൗരനും ഉൾപ്പെടുന്നുണ്ടെന്ന് ധാഡിംഗ് ജില്ലാ പോലീസ് സ്ഥിരീകരിച്ചു. പരിക്കേറ്റവരിൽ ന്യൂസിലൻഡിൽ നിന്നുള്ള ഒരു സ്ത്രീയും ഒരു ചൈനീസ് പൗരനും ഉൾപ്പെടുന്നു. ഇതിൽ ചൈനീസ് പൗരന്റെ പരിക്ക് ഗുരുതരമാണെന്നാണ് റിപ്പോർട്ട്. അപകടത്തിന് പിന്നാലെ ഒരു ചൈനീസ് പൗരനെ കാണാതായതായി റിപ്പോർട്ടുകളുണ്ട്. ത്രിശൂലി നദി കേന്ദ്രീകരിച്ച് തിരച്ചിൽ തുടരുകയാണ്.
