വാഷിംഗ്ടൺ: 50 വർഷത്തിലധികം നീണ്ട കാത്തിരിപ്പിന് ശേഷം മനുഷ്യരെ വഹിച്ചുകൊണ്ടുള്ള നാസയുടെ ചന്ദ്രയാത്ര മാർച്ച് 6-ന് നടക്കും (NASA Artemis 2 Moon Mission). ആർട്ടെമിസ് 2 ദൗത്യത്തിന്റെ വിക്ഷേപണ തീയതിയായി മാർച്ച് 6 ആണ് നാസ നിലവിൽ നിശ്ചയിച്ചിരിക്കുന്നത്. വിക്ഷേപണത്തിന് മുന്നോടിയായി നടത്തിയ നിർണ്ണായകമായ ‘വെറ്റ് ഡ്രസ് റിഹേഴ്സൽ’ (Wet Dress Rehearsal) വിജയകരമായി പൂർത്തിയാക്കിയതോടെയാണ് ദൗത്യത്തിന് വേഗതയേറിയത്.
കഴിഞ്ഞ ഫെബ്രുവരിയിൽ ഹൈഡ്രജൻ ചോർച്ചയെത്തുടർന്ന് വിക്ഷേപണ പരീക്ഷണം നിർത്തിവെച്ചിരുന്നു. എന്നാൽ കഴിഞ്ഞ വ്യാഴാഴ്ച ഫ്ലോറിഡയിലെ കേപ് കാനവറലിൽ നടത്തിയ പരീക്ഷണങ്ങൾ തടസ്സങ്ങളില്ലാതെ പൂർത്തിയായി. മൂന്ന് അമേരിക്കൻ ബഹിരാകാശ സഞ്ചാരികളും ഒരു കനേഡിയൻ സഞ്ചാരിയുമാണ് ഈ ദൗത്യത്തിലുള്ളത്. ചന്ദ്രനെ ചുറ്റി സഞ്ചരിച്ച് ഭൂമിയിൽ തിരിച്ചെത്തുന്ന ഈ ദൗത്യം വിജയകരമായാൽ, മനുഷ്യനെ ചന്ദ്രനിൽ ഇറക്കാനുള്ള ആർട്ടെമിസ് 3 ദൗത്യത്തിന് അത് വഴിയൊരുക്കും. വിക്ഷേപണത്തിന് മുൻപുള്ള അവസാനഘട്ട സാങ്കേതിക പരിശോധനകൾ ഇപ്പോൾ നടന്നുവരികയാണെന്ന് നാസ ഉദ്യോഗസ്ഥ ലാരി ഗ്ലേസ് അറിയിച്ചു.
Summary: NASA has scheduled the Artemis 2 mission, the first crewed lunar flyby in over 50 years, for as early as March 6, 2026.
