Follow on Google News
മനാമ/കുവൈത്ത് സിറ്റി: മേഖലയിൽ സമാധാനം പുനഃസ്ഥാപിക്കാൻ ലക്ഷ്യമിട്ടുള്ള യുഎസ്-ഇറാൻ വെടിനിർത്തൽ പ്രഖ്യാപനം നിലനിൽക്കെ, കുവൈത്ത് നാഷണൽ ഗാർഡ് ആസ്ഥാനത്തിന് നേരെ വീണ്ടും ഡ്രോൺ ആക്രമണം (Kuwait National Guard Drone Attack April 2026). വ്യാഴാഴ്ച രാത്രിയുണ്ടായ ആക്രമണത്തിൽ നിരവധി സൈനികർക്ക് പരിക്കേറ്റു. മാർച്ച് 29-ന് നടന്ന സമാനമായ ആക്രമണത്തിന് പിന്നാലെ രണ്ടാമതും സൈനിക കേന്ദ്രം ലക്ഷ്യമിടുന്നത് ഗൗരവത്തോടെയാണ് കുവൈത്ത് കാണുന്നത്.
ആക്രമണത്തിന് പിന്നിൽ തങ്ങളാണെന്ന ആരോപണം ഇറാൻ പൂർണ്ണമായും നിഷേധിച്ചു. വെടിനിർത്തൽ കരാർ നിലവിൽ വന്ന ശേഷം ഒരു തരത്തിലുള്ള സൈനിക നീക്കവും നടത്തിയിട്ടില്ലെന്ന് ഇസ്ലാമിക് റെവല്യൂഷണറി ഗാർഡ് കോർപ്സ് (IRGC) വ്യക്തമാക്കി. മേഖലയിൽ അസ്ഥിരതയുണ്ടാക്കാൻ അമേരിക്കയോ ഇസ്രയേലോ നടത്തുന്ന നീക്കങ്ങളാണിതെന്നാണ് ഇറാന്റെ പക്ഷം.
അതേസമയം , സൗദി അറേബ്യയിലെ പ്രധാന എണ്ണ വിതരണ പാതയായ ഈസ്റ്റ്-വെസ്റ്റ് പൈപ്പ് ലൈനിന് നേരെയുണ്ടായ ആക്രമണം രാജ്യത്തെ എണ്ണ കയറ്റുമതിയെ സാരമായി ബാധിച്ചു. ആക്രമണത്തിൽ ഒരു സുരക്ഷാ ഉദ്യോഗസ്ഥൻ കൊല്ലപ്പെടുകയും ഏഴ് പേർക്ക് പരിക്കേൽക്കുകയും ചെയ്തു. പ്രതിദിനം 7,00,000 ബാരൽ എണ്ണയുടെ ഒഴുക്ക് തടസ്സപ്പെട്ടു. ഹോർമുസ് കടലിടുക്ക് വഴിയുള്ള കയറ്റുമതി തടസ്സപ്പെട്ട സാഹചര്യത്തിൽ സൗദിയുടെ ഏക പ്രധാന എണ്ണക്കടത്ത് പാതയാണിത്.
റിയാദ്, യാൻബു, കിഴക്കൻ പ്രവിശ്യ എന്നിവിടങ്ങളിലെ റിഫൈനറികൾക്കും പൈപ്പ് ലൈനുകൾക്കും നേരെയുണ്ടായ തുടർച്ചയായ ആക്രമണങ്ങൾ മൂലം ആകെ ഉൽപാദനത്തിൽ പ്രതിദിനം 6,00,000 ബാരലിന്റെ കുറവ് രേഖപ്പെടുത്തി. റാസ് തനൂറ, ജുബൈലിലെ സാതോർപ്പ് (SATORP), യാൻബുവിലെ സാംറെഫ് (SAMREF) തുടങ്ങിയ വൻകിട റിഫൈനറികളുടെ പ്രവർത്തനത്തെയും ഈ ആക്രമണങ്ങൾ ബാധിച്ചിട്ടുണ്ട്.
പ്രധാന ഊർജ്ജ കേന്ദ്രങ്ങൾക്ക് നേരെയുണ്ടാകുന്ന ആക്രമണങ്ങൾ ആഗോള എണ്ണ വിപണിയിൽ വലിയ അസ്ഥിരതയ്ക്ക് കാരണമാകുമെന്ന് സൗദി ഊർജ്ജ മന്ത്രാലയം മുന്നറിയിപ്പ് നൽകി. വെടിനിർത്തൽ കരാർ നിലവിലിരിക്കെ ഇത്തരം ആക്രമണങ്ങൾ തുടരുന്നത് നയതന്ത്ര നീക്കങ്ങളെ കൂടുതൽ സങ്കീർണ്ണമാക്കുകയാണ്.
Story Summary:
Despite the US-Iran ceasefire, a drone attack hit a Kuwait National Guard base on Thursday night, injuring several soldiers. This marks the second such attack on the facility. Meanwhile, Saudi Arabia reported a significant drop in oil production—about 6,00,000 barrels per day—due to strikes on the East-West pipeline and major refineries like Ras Tanura and SAMREF. Iran’s IRGC denied involvement, labeling the incidents a provocation by the US or Israel. The disruption of Saudi oil supply is expected to create global market instability.
