ലണ്ടൻ: യുഎസ്-ഇസ്രായേൽ-ഇറാൻ യുദ്ധത്തെത്തുടർന്ന് അടച്ചുപൂട്ടിയ ഹോർമുസ് കടലിടുക്ക് വീണ്ടും തുറക്കുന്നതിനായി ബ്രിട്ടന്റെ നേതൃത്വത്തിൽ അന്താരാഷ്ട്ര തലത്തിൽ നയതന്ത്ര നീക്കം ശക്തമാകുന്നു (Keir Starmer International Meeting). ബ്രിട്ടീഷ് പ്രധാനമന്ത്രി കീർ സ്റ്റാർമറുടെ നേതൃത്വത്തിൽ വ്യാഴാഴ്ച നടക്കുന്ന വെർച്വൽ യോഗത്തിൽ ഫ്രാൻസ്, ജർമ്മനി, ഇറ്റലി, കാനഡ, ജപ്പാൻ, യുഎഇ ഉൾപ്പെടെ 35 രാജ്യങ്ങൾ പങ്കെടുക്കും. ലോകത്തെ എണ്ണക്കടത്തിന്റെ നിർണ്ണായക പാതയായ ഹോർമുസ് കടലിടുക്ക് ഇറാൻ ഭാഗികമായി തടഞ്ഞതോടെ ആഗോളതലത്തിൽ ഇന്ധനവില കുതിച്ചുയരുന്ന സാഹചര്യത്തിലാണ് ഈ അടിയന്തര നീക്കം.
കപ്പൽ ഗതാഗതത്തിന്റെ സ്വാതന്ത്ര്യം പുനഃസ്ഥാപിക്കുക, കുടുങ്ങിക്കിടക്കുന്ന കപ്പലുകളുടെയും നാവികരുടെയും സുരക്ഷ ഉറപ്പാക്കുക, അവശ്യസാധനങ്ങളുടെ നീക്കം പുനരാരംഭിക്കുക എന്നിവയാണ് യോഗത്തിന്റെ പ്രധാന ലക്ഷ്യങ്ങൾ. ഇറാൻ നിരന്തരമായി വാണിജ്യ കപ്പലുകൾക്ക് നേരെ നടത്തുന്ന ആക്രമണങ്ങൾ ഭയന്ന് മിക്ക കമ്പനികളും ഈ പാതയിലൂടെയുള്ള യാത്ര ഒഴിവാക്കിയിരിക്കുകയാണ്. മേഖലയിൽ മിസൈലുകളും ഡ്രോണുകളും ഉപയോഗിച്ചുള്ള ആക്രമണ സാധ്യത നിലനിൽക്കുന്നതിനാൽ സൈനിക നീക്കത്തിലൂടെ കടലിടുക്ക് തുറക്കുന്നത് നിലവിൽ പ്രായോഗികമല്ലെന്നാണ് രാജ്യങ്ങളുടെ വിലയിരുത്തൽ. എങ്കിലും യുദ്ധം അവസാനിച്ചാലുടൻ സുരക്ഷ ഉറപ്പാക്കുന്നതിനുള്ള പദ്ധതികൾ തയ്യാറാക്കാൻ സൈനിക ഉദ്യോഗസ്ഥരുടെ പ്രത്യേക യോഗവും ഉടൻ ചേരും.
അതേസമയം, ഈ നിർണ്ണായക നീക്കത്തിൽ നിന്ന് അമേരിക്ക വിട്ടുനിൽക്കുന്നത് ശ്രദ്ധേയമാണ്. ഹോർമുസ് കടലിടുക്കിന്റെ സുരക്ഷ ഉറപ്പാക്കുന്നത് അമേരിക്കയുടെ ജോലിയല്ലെന്നും സഖ്യകക്ഷികൾ സ്വന്തം നിലയ്ക്ക് എണ്ണ കണ്ടെത്തണമെന്നുമാണ് യുഎസ് പ്രസിഡന്റ് ഡൊണാൾഡ് ട്രംപിന്റെ നിലപാട്. നാറ്റോയിൽ നിന്ന് പിന്മാറുമെന്ന ട്രംപിന്റെ ഭീഷണിയും യൂറോപ്യൻ രാജ്യങ്ങൾക്കിടയിൽ ആശങ്കയുണ്ടാക്കുന്നുണ്ട്. ഈ സാഹചര്യത്തിൽ അമേരിക്കയെ ആശ്രയിക്കാതെ സ്വന്തം സുരക്ഷയും സാമ്പത്തിക താല്പര്യങ്ങളും സംരക്ഷിക്കാൻ യൂറോപ്യൻ രാജ്യങ്ങൾ ഒരുമിച്ചു നിൽക്കുന്നതിന്റെ സൂചന കൂടിയാണ് ലണ്ടനിൽ നടക്കുന്ന ഈ ഉച്ചകോടി.
Summary: Britain is leading an international diplomatic effort to reopen the Strait of Hormuz, a vital shipping route currently choked off due to the ongoing conflict between Iran and the US-Israeli alliance. Prime Minister Keir Starmer announced that 35 countries, excluding the US, will meet virtually to discuss measures to restore freedom of navigation and ensure the safety of seafarers.
