വാഷിംഗ്ടൺ: പാക് അധീന കശ്മീരും അക്സായ് ചിന്നും ഇന്ത്യയുടെ ഭാഗമായി അടയാളപ്പെടുത്തിക്കൊണ്ടുള്ള വിവാദ ഭൂപടം അമേരിക്കൻ ട്രേഡ് റെപ്രസെന്റേറ്റീവ് (USTR) ഓഫീസ് പിൻവലിച്ചു (India US Map Controversy). ഫെബ്രുവരി 7-ന് ഇന്ത്യ-യുഎസ് വ്യാപാര കരാറുമായി ബന്ധപ്പെട്ട പോസ്റ്റിലാണ് മുഴുവൻ കശ്മീരും ഇന്ത്യയുടെ ഭാഗമായി കാണിക്കുന്ന ഭൂപടം അമേരിക്ക പങ്കുവെച്ചിരുന്നത്. ഇതിനെതിരെ പാകിസ്ഥാൻ ഔദ്യോഗികമായി പ്രതിഷേധം അറിയിച്ചതിനെത്തുടർന്നാണ് പോസ്റ്റ് നീക്കം ചെയ്തത്.
യുഎസ് ട്രേഡ് റെപ്രസെന്റേറ്റീവ് പങ്കുവെച്ച ഭൂപടം തെറ്റാണെന്നും ഐക്യരാഷ്ട്രസഭയുടെ അംഗീകൃത ഭൂപടത്തിന് വിരുദ്ധമാണെന്നും പാകിസ്ഥാൻ വിദേശകാര്യ മന്ത്രാലയം വാഷിംഗ്ടണിനെ അറിയിച്ചു. ജമ്മു കശ്മീർ ഒരു തർക്ക പ്രദേശമായാണ് ഐക്യരാഷ്ട്രസഭ അടയാളപ്പെടുത്തിയിട്ടുള്ളതെന്നും പാകിസ്ഥാൻ ചൂണ്ടിക്കാട്ടി. പാകിസ്ഥാന്റെ ആവശ്യം പരിഗണിച്ച് അമേരിക്ക പോസ്റ്റ് നീക്കം ചെയ്തതിൽ സംതൃപ്തിയുണ്ടെന്ന് പാക് വിദേശകാര്യ വക്താവ് താഹിർ അന്ദ്രാബി പറഞ്ഞു.
നേരത്തെ, ഇന്ത്യയിലെ ഉൽപ്പന്നങ്ങൾക്കുമേൽ ചുമത്തിയിരുന്ന ഉയർന്ന നികുതി കുറച്ചുകൊണ്ടുള്ള കരാർ പ്രഖ്യാപിച്ചപ്പോഴാണ് ഈ ഭൂപടം പ്രത്യക്ഷപ്പെട്ടത്. പതിറ്റാണ്ടുകളായി പാക് അധീന കശ്മീരിനെ തർക്ക പ്രദേശമായി അടയാളപ്പെടുത്തിയിരുന്ന അമേരിക്കയുടെ നയത്തിലെ മാറ്റമായാണ് ഇന്ത്യൻ വിദഗ്ധർ ഇതിനെ കണ്ടിരുന്നത്. എന്നാൽ, പാകിസ്ഥാന്റെ കടുത്ത പ്രതിഷേധത്തെത്തുടർന്ന് അമേരിക്കൻ ഏജൻസിക്ക് ഈ നീക്കത്തിൽ നിന്ന് പിന്നോട്ട് പോകേണ്ടി വന്നു. ഇത് പാകിസ്ഥാന് വലിയ ആശ്വാസമായെങ്കിലും ഇന്ത്യയുമായുള്ള ട്രംപ് ഭരണകൂടത്തിന്റെ അടുത്ത ബന്ധത്തെക്കുറിച്ചുള്ള ചർച്ചകൾക്ക് ഈ സംഭവം തുടക്കമിട്ടിട്ടുണ്ട്.
Summary: The US Trade Representative deleted an Indian map showing PoK and Aksai Chin as part of India after Pakistan’s formal protest, calling it a “cartographic error” inconsistent with UN maps.
