മുംബൈ : മൂന്ന് ദിവസത്തെ ഇന്ത്യ സന്ദർശനത്തിനായി ഫ്രഞ്ച് പ്രസിഡന്റ് ഇമ്മാനുവൽ മാക്രോൺ ഇന്ന് രാത്രി മുംബൈയിലെത്തും (Emmanuel Macron India Visit). സന്ദർശനത്തിന്റെ ഭാഗമായി നാളെ അദ്ദേഹം പ്രധാനമന്ത്രി നരേന്ദ്ര മോദിയുമായി കൂടിക്കാഴ്ച നടത്തും. പ്രതിരോധം, ബഹിരാകാശം, ഊർജ്ജം തുടങ്ങിയ മേഖലകളിൽ നിർണ്ണായകമായ കരാറുകൾ ഈ സന്ദർശന വേളയിൽ ഒപ്പിടുമെന്നാണ് പ്രതീക്ഷിക്കുന്നത്.
ഞായറാഴ്ച (ഫെബ്രുവരി 15) രാത്രിയോടെ മാക്രോൺ മുംബൈ വിമാനത്താവളത്തിലിറങ്ങും. മഹാരാഷ്ട്ര ഗവർണറും മുഖ്യമന്ത്രിയും ചേർന്ന് അദ്ദേഹത്തെ സ്വീകരിക്കും. തിങ്കളാഴ്ച (ഫെബ്രുവരി 16) പ്രധാനമന്ത്രി നരേന്ദ്ര മോദിയുമായി മാക്രോൺ ഉഭയകക്ഷി ചർച്ചകൾ നടത്തും. പ്രതിരോധ ഇടപാടുകൾ, പ്രത്യേകിച്ച് സ്കോർപീൻ ക്ലാസ് സബ്മറൈനുകൾ, ജെറ്റ് എഞ്ചിൻ സാങ്കേതികവിദ്യ എന്നിവ ചർച്ചകളിൽ പ്രധാനമാകും.
മുംബൈയിൽ നടക്കുന്ന ഇൻഡോ-ഫ്രഞ്ച് ബിസിനസ് സമ്മിറ്റിൽ അദ്ദേഹം പങ്കെടുക്കും. ഇരുരാജ്യങ്ങളിലെയും പ്രമുഖ വ്യവസായ പ്രമുഖരുമായി അദ്ദേഹം സംവദിക്കും. മുംബൈയിലെ പ്രശസ്തമായ ഗേറ്റ്വേ ഓഫ് ഇന്ത്യയും മറ്റ് ചരിത്ര സ്മാരകങ്ങളും അദ്ദേഹം സന്ദർശിക്കാൻ സാധ്യതയുണ്ട്.
സുരക്ഷാ ക്രമീകരണങ്ങൾ: പ്രസിഡന്റിന്റെ സന്ദർശനം പ്രമാണിച്ച് മുംബൈ നഗരത്തിൽ കനത്ത സുരക്ഷാ ക്രമീകരണങ്ങളാണ് ഏർപ്പെടുത്തിയിരിക്കുന്നത്. ദക്ഷിണ മുംബൈയിലെ പ്രധാന റോഡുകളിൽ ഗതാഗത നിയന്ത്രണമുണ്ടാകും.
