ലോസ് ഏഞ്ചൽസ്: കാലിഫോർണിയയിലെ സീറ നെവാഡ പർവതനിരകളിൽ ഉണ്ടായ അതിശക്തമായ മഞ്ഞുവീഴ്ചയെത്തുടർന്ന് പത്ത് സ്കീയിംഗ് താരങ്ങളെ കാണാതായി (California Avalanche Sierra Nevada). ചൊവ്വാഴ്ച രാവിലെ ട്രക്കീ മേഖലയിലെ കാസിൽ പീക്കിന് സമീപമാണ് അപകടമുണ്ടായത്. കാണാതായവർക്ക് പുറമെ ആറ് പേർ അപകടസ്ഥലത്ത് കുടുങ്ങിക്കിടക്കുകയാണെന്നും അധികൃതർ അറിയിച്ചു.
നാല് ഗൈഡുകളും പന്ത്രണ്ട് സഞ്ചാരികളും അടങ്ങുന്ന 16 അംഗ സംഘമാണ് അപകടത്തിൽപ്പെട്ടത്. കനത്ത മഞ്ഞുവീഴ്ചയും കാഴ്ചമറയ്ക്കുന്ന മൂടൽമഞ്ഞും കാരണം രക്ഷാപ്രവർത്തകർക്ക് ഇതുവരെ അപകടസ്ഥലത്ത് എത്താൻ സാധിച്ചിട്ടില്ല. കുടുങ്ങിക്കിടക്കുന്ന ആറ് പേർ താൽക്കാലിക ഷെൽട്ടറുകളിൽ അഭയം പ്രാപിച്ചിരിക്കുകയാണെന്നും റേഡിയോ ബീക്കണുകൾ വഴി ഇവർ രക്ഷാപ്രവർത്തകരുമായി ആശയവിനിമയം നടത്തുന്നുണ്ടെന്നും നെവാഡ കൗണ്ടി ഷെരീഫ് ഓഫീസ് അറിയിച്ചു. പ്രദേശത്ത് ഇപ്പോഴും മഞ്ഞുവീഴ്ചാ സാധ്യത നിലനിൽക്കുന്നത് രക്ഷാദൗത്യത്തെ പ്രതികൂലമായി ബാധിക്കുന്നുണ്ട്.
കാലാവസ്ഥാ മുന്നറിയിപ്പ് അവഗണിച്ചാണോ സംഘം സ്കീയിംഗിന് പോയതെന്ന് പോലീസ് അന്വേഷിക്കുന്നുണ്ട്. കാണാതായ പത്ത് പേരെയും കണ്ടെത്താനായില്ലെങ്കിൽ അമേരിക്കൻ ചരിത്രത്തിലെ ഏറ്റവും വലിയ മഞ്ഞുവീഴ്ചാ ദുരന്തങ്ങളിൽ ഒന്നായി ഇത് മാറും. നിലവിൽ ബോറിയൽ മൗണ്ടൻ റിസോർട്ടിൽ നിന്നുള്ള വിദഗ്ധ സംഘങ്ങൾ സ്ഥലത്തേക്ക് നീങ്ങിക്കൊണ്ടിരിക്കുകയാണ്. വരും മണിക്കൂറുകളിൽ കൂടുതൽ മഞ്ഞുവീഴ്ചയുണ്ടാകാൻ സാധ്യതയുള്ളതിനാൽ അതീവ ജാഗ്രത പാലിക്കാൻ നിർദ്ദേശം നൽകിയിട്ടുണ്ട്.
Summary: At least ten skiers are missing and six others are stranded after a massive avalanche hit the Sierra Nevada mountains in California.
