വാഷിംഗ്ടൺ: അമേരിക്കയിലെ തന്റെ പ്രസിഡന്റ് കാലാവധി പൂർത്തിയാക്കിയ ശേഷം വെനിസ്വേലയിൽ പ്രസിഡന്റ് സ്ഥാനത്തേക്ക് മത്സരിക്കാൻ തനിക്ക് താൽപ്പര്യമുണ്ടെന്ന് ഡൊണാൾഡ് ട്രംപ്. വാർത്താസമ്മേളനത്തിൽ തമാശരൂപേണയാണ് ട്രംപ് ഈ പ്രസ്താവന നടത്തിയത്. വെനിസ്വേലയിൽ തനിക്ക് വലിയ ജനപ്രീതിയാണെന്നും അവിടുത്തെ മുൻപുള്ള ഏതൊരു നേതാവിനേക്കാളും ഉയർന്ന പോളിംഗ് തനിക്ക് ലഭിക്കുമെന്നും അദ്ദേഹം അവകാശപ്പെട്ടു.(After I’m finished with this, I can go to Venezuela, jokes Trump )
മയക്കുമരുന്ന് കടത്ത് കേസുമായി ബന്ധപ്പെട്ട് വെനിസ്വേലൻ പ്രസിഡന്റ് നിക്കോളാസ് മഡുറോയെയും ഭാര്യ സിലിയ ഫ്ലോറസിനെയും ജനുവരിയിൽ യുഎസ് സേന പിടികൂടിയിരുന്നു. നിലവിൽ മഡുറോ അമേരിക്കയിൽ വിചാരണ നേരിടുകയാണ്. ഈ പശ്ചാത്തലത്തിലാണ് ട്രംപിന്റെ പ്രതികരണം.
വെനിസ്വേലയിലെ ജനങ്ങൾ പറയുന്നത് ഞാൻ അവിടെ പ്രസിഡന്റ് സ്ഥാനത്തേക്ക് മത്സരിക്കുകയാണെങ്കിൽ ഇതുവരെയുള്ള എല്ലാ റെക്കോർഡുകളും തകർക്കുന്ന പോളിംഗ് എനിക്ക് ലഭിക്കുമെന്നാണ്. അതുകൊണ്ട് അമേരിക്കയിലെ എന്റെ ദൗത്യം കഴിഞ്ഞാൽ ഞാൻ വെനിസ്വേലയിലേക്ക് പോയേക്കാം, ട്രംപ് പറഞ്ഞു. സ്പാനിഷ് ഭാഷ താൻ വേഗത്തിൽ പഠിക്കുമെന്നും ഭാഷകൾ കൈകാര്യം ചെയ്യാൻ തനിക്ക് പ്രത്യേക കഴിവുണ്ടെന്നും അദ്ദേഹം കൂട്ടിച്ചേർത്തു. നിലവിൽ വെനിസ്വേലയിലെ നിയുക്ത പ്രസിഡന്റുമായി നല്ല ബന്ധമാണെന്നും അദ്ദേഹം പറഞ്ഞു.
