ദുബായ്: ഇന്ത്യൻ റിപ്പബ്ലിക് ദിനത്തോടനുബന്ധിച്ച് വിവിധ ഗൾഫ് രാജ്യങ്ങളിൽ പതാക ഉയർത്തലും കലാ-സാംസ്കാരിക പരിപാടികളും നടന്നു. പ്രവാസി ഇന്ത്യക്കാരുടെ വലിയൊരു നിര തന്നെ ആഘോഷങ്ങളിൽ പങ്കുചേരാൻ എംബസികളിലും കോൺസുലേറ്റുകളിലും എത്തിച്ചേർന്നു.(Extensive Republic Day celebrations in Gulf countries)
ദുബായ് ഇന്ത്യൻ കോൺസുലേറ്റിൽ കോൺസുൽ ജനറൽ സതീഷ് ശിവൻ ദേശീയ പതാക ഉയർത്തി. ഭാരതത്തിന്റെ കരുത്തും പ്രവാസികളുടെ പങ്കും വ്യക്തമാക്കുന്ന സന്ദേശം അദ്ദേഹം കൈമാറി. ആഘോഷങ്ങളുടെ ഭാഗമായി വിവിധ ഇന്ത്യൻ കലാപരിപാടികൾ കോൺസുലേറ്റ് പരിസരത്ത് അരങ്ങേറി.
മസ്കറ്റിലെ ഇന്ത്യൻ എംബസിയിൽ സ്ഥാനപതി പതാക ഉയർത്തുകയും ഒമാനിലെ ഇന്ത്യൻ സമൂഹത്തിനും ഒമാൻ ഭരണകൂടത്തിനും ആശംസകൾ നേരുകയും ചെയ്തു. റിപ്പബ്ലിക് ദിനം പ്രമാണിച്ച് ഇന്ന് മസ്കറ്റ് എംബസിക്ക് അവധിയാണെന്ന് അധികൃതർ അറിയിച്ചു.
റിപ്പബ്ലിക് ദിനത്തോടനുബന്ധിച്ച് എംബസികൾ ദേശീയ പതാകയുടെ വർണ്ണങ്ങളാൽ അലങ്കരിച്ചിരുന്നു. ലേബർ ക്യാമ്പുകളിലും സ്കൂളുകളിലും വിവിധ പ്രവാസി സംഘടനകളുടെ നേതൃത്വത്തിൽ മധുരപലഹാര വിതരണവും സാംസ്കാരിക പരിപാടികളും നടന്നു.
