ന്യൂഡൽഹി: റഷ്യൻ എണ്ണ ഇറക്കുമതി ചെയ്യുന്നതിന് ശിക്ഷാനടപടിയായി ഇന്ത്യയ്ക്കുമേൽ ഏർപ്പെടുത്തിയിരുന്ന 25% അധിക ഇറക്കുമതി തീരുവ അമേരിക്ക പിൻവലിക്കുന്നു. പ്രസിഡന്റ് ഡൊണാൾഡ് ട്രംപിന്റെ താരിഫ് നയത്തിന്റെ ഭാഗമായി നിലവിൽ ഇന്ത്യൻ ഉൽപ്പന്നങ്ങൾക്ക് യുഎസിൽ 50% തീരുവയാണ് ചുമത്തിയിരിക്കുന്നത്. പിഴച്ചുങ്കം ഒഴിവാക്കുന്നതോടെ ഇത് 25 ശതമാനമായി കുറയും.(Relief for India, US to lift 25% tariff on Russian oil)
ഇന്ത്യൻ കമ്പനികൾ റഷ്യയിൽ നിന്നുള്ള എണ്ണ ഇറക്കുമതി ഏറക്കുറെ നിർത്തിയെന്ന വിലയിരുത്തലിന്റെ അടിസ്ഥാനത്തിലാണ് പിഴ ഒഴിവാക്കുന്നത്. എണ്ണ വാങ്ങുന്നത് നിർത്താൻ പ്രേരിപ്പിക്കുന്ന ട്രംപിന്റെ താരിഫ് നയത്തിന്റെ വിജയമാണിതെന്ന് സ്കോട് ബെസ്സന്റ് വിശേഷിപ്പിച്ചു.
യുഎസ് ഉൽപ്പന്നങ്ങൾക്ക് ഇന്ത്യ 30% തീരുവ ചുമത്തിയത് അമേരിക്കൻ കാർഷിക മേഖലയെ ബാധിച്ചിരുന്നു. ഇത് കുറയ്ക്കാൻ സെനറ്റർമാർ ട്രംപിന് മേൽ സമ്മർദ്ദം ചെലുത്തിയിരുന്നു. അയൽരാജ്യങ്ങളെക്കാൾ ഇപ്പോഴും ഇന്ത്യയ്ക്ക് ഉയർന്ന തീരുവയാണ്. റഷ്യൻ എണ്ണയുടെ പേരിലുള്ള പിഴ ഒഴിവാക്കിയാലും ഏഷ്യൻ എതിരാളികളെ അപേക്ഷിച്ച് ഇന്ത്യ നൽകേണ്ട തീരുവ ഇപ്പോഴും കൂടുതലായിരിക്കും.
ബംഗ്ലാദേശ്, വിയറ്റ്നാം, ഫിലിപ്പീൻസ് എന്നിവയ്ക്ക് ഇത് 20 ശതമാനത്തിൽ താഴെയാണ്. പാക്കിസ്ഥാനാകട്ടെ 19 ശതമാനം ആണ്. ഇന്ത്യയ്ക്കുമേൽ കനത്ത തീരുവ ചുമത്താനുള്ള ട്രംപിന്റെ ആവശ്യം യൂറോപ്യൻ രാജ്യങ്ങൾ തള്ളിയിരുന്നു. ഇന്ത്യയുമായുള്ള വമ്പൻ വ്യാപാരക്കരാർ ലക്ഷ്യമിട്ടാണ് യൂറോപ്പ് ഈ നിലപാട് സ്വീകരിച്ചത്. ഇന്ത്യയും യൂറോപ്യൻ യൂണിയനും തമ്മിലുള്ള സ്വതന്ത്ര വ്യാപാരക്കരാർ ഒപ്പുവെക്കുന്നതോടെ ഇന്ത്യയ്ക്ക് ആഗോള വ്യാപാരത്തിൽ വലിയ കരുത്ത് ലഭിക്കും. യുഎസ്-ഇന്ത്യ വ്യാപാരക്കരാർ കൂടി യാഥാർത്ഥ്യമായാൽ തീരുവ 20 ശതമാനത്തിന് താഴെയെത്തുമെന്നും പ്രതീക്ഷിക്കപ്പെടുന്നു.
