ഐപിഎൽ 2026 സീസണിൽ രാജസ്ഥാൻ റോയൽസിനെ ഓൾറൗണ്ടർ റിയാൻ പരാഗ് നയിക്കും (Riyan Parag Captain). ദീർഘകാലം ടീമിനെ നയിച്ച മലയാളി താരം സഞ്ജു സാംസൺ ചെന്നൈ സൂപ്പർ കിംഗ്സിലേക്ക് (CSK) മാറിയതിനെത്തുടർന്നാണ് 24-കാരനായ പരാഗിനെ ക്യാപ്റ്റനായി മാനേജ്മെന്റ് ഔദ്യോഗികമായി പ്രഖ്യാപിച്ചത്.
11 സീസണുകൾ രാജസ്ഥാൻ റോയൽസിനൊപ്പം ചെലവഴിച്ച സഞ്ജു സാംസൺ ടീം വിട്ടു. പകരം ചെന്നൈ സൂപ്പർ കിംഗ്സിൽ നിന്ന് രവീന്ദ്ര ജഡേജയെയും സാം കറനെയും രാജസ്ഥാൻ സ്വന്തമാക്കി. സഞ്ജുവിനെ ചെന്നൈ സ്വന്തമാക്കിയത് 18 കോടി രൂപയ്ക്കാണ്. രവീന്ദ്ര ജഡേജ, യശസ്വി ജയ്സ്വാൾ തുടങ്ങിയ പ്രമുഖ താരങ്ങളെ മറികടന്നാണ് റിയാൻ പരാഗ് നായകസ്ഥാനത്തെത്തുന്നത്. 2019 മുതൽ രാജസ്ഥാൻ ടീമിന്റെ ഭാഗമായ പരാഗ്, കഴിഞ്ഞ സീസണിൽ സഞ്ജുവിന് പരിക്കേറ്റപ്പോൾ എട്ട് മത്സരങ്ങളിൽ ടീമിനെ നയിച്ചിരുന്നു.
താൽക്കാലിക ക്യാപ്റ്റനായിരുന്നപ്പോൾ എട്ടിൽ രണ്ട് മത്സരങ്ങളിൽ മാത്രമാണ് പരാഗിന് വിജയിക്കാനായത്. എങ്കിലും അദ്ദേഹത്തിന്റെ ആക്രമണാത്മക ശൈലിയിലും ടീമിനോടുള്ള കൂറിലും മാനേജ്മെന്റ് വിശ്വാസമർപ്പിക്കുകയാണ്.രാജസ്ഥാൻ റോയൽസിന്റെ ചരിത്രത്തിലെ ഏഴാമത്തെ ക്യാപ്റ്റനാണ് റിയാൻ പരാഗ്. ഷെയ്ൻ വോൺ, രാഹുൽ ദ്രാവിഡ്, അജിങ്ക്യ രഹാനെ, സ്റ്റീവ് സ്മിത്ത്, ഷെയ്ൻ വാട്സൺ, സഞ്ജു സാംസൺ എന്നിവരാണ് മുൻപ് ടീമിനെ നയിച്ചിട്ടുള്ളത്.
